08 May 2020, 02:27
ބޭރަށް ނުކުމެ އުޅޭ ގްރޫޕުތަކުން، މީހުން ދިރިއުޅޭ ގޭބިސީތަކަށް ކޮރޯނާވައިރަސް ވަންނަން ފަށާފައިިވާ ކަމަށް ނޭޝަނަލް އެމަޖެންސީ އޮޕަރޭޝަން ސެންޓަރުން ބުނެފިއެވެ.
މިރޭ އެންއީއޯސީގައި ކުރިއަށް ދިޔަ ނޫސްވެރިންްގެ ބައްދަލުވުމުގައި ޑރ. ޝީނާ މޫސާ ވިދާޅުވީ މާލެ ސަރަހައްދު ލޮކްޑައުން ކުރި ފަހުން މިހާރު 24 ދުވަސް ވެފައިިވާއިިރު، މިހާރު މާލެ ސަރަހައްދުގައި ކޮވިޑް19 ފެތުރެމުންދާ މިސްރާބާއި ޕްރޮޖެކްޝަންތަކުގެ އަންދާޒާއެއް ލިބިފައިވާ ކަމަށެވެ.
އަދި މިހާރުގެ ޕްރޮޖެކްޝަންތަކުން ދެ ގްރޫޕެއްގެ މެދުގައި ބަލި ފެތުރެމުން އަންނަކަން ފާހަގަކުރެވިފައިވާ ކަމަށެވެ. އެއީ ގިނަ އަދަދެއްގެ ބަޔަކު އެކީގައި ދިރިއުޅޭ ނުވަތަ ކޮމިއުނަލް ގްރޫޕާއި، ގޭބިސީ ނުވަތަ ހައުސްހޯލްޑް ގްރޫޕެވެ.
މީގެ ތެރެއިން ހަލުވިކަމާއެކު ބަލި ފެތުރެމުން އަންނަނީ ކޮމިއުނަލް ގްރޫޕުގެ މެދުގައެވެ. އެ ގްރޫޕުގެ "ކޮންޓެކްޓް ބަބުލް" އެވްރެޖްކޮށް 45 ގައި އުޅޭއިރު، އެމީހުންގެ ތެރޭގައި ބައްޔަށް ހުށަހެޅޭ މިންވަރާއި ފެތުރޭ މިންވަރު ވެސް އަވަހެވެ.
ކޮމިއުނަލް ގްރޫޕާ އަޅާބަލާއިރު، ގޭބިސީތަކުގެ ގްރޫޕުގައި ބަލި ފެތުރޭ މިންވަރު ކުޑައެވެ. އެ ގްރޫޕުގެ "ކޮންޓެކްޓް ބަބުލް" އުޅެނީ އެވްރެޖްކޮށް އަށް މީހުންނެވެ.
މި ޓްރެންޑަށް ބަލާއިިރު މި މަހުގެ 31 ވަނަ ދުވަހު "ސާޖެއް" އަންނާނެ ކަމަށް މިހާރު ވަނީ އަންދާޒާކޮށްފައެވެ. ޑރ. ޝީނާ ވިދާޅުވީ އެ ސާޖު "ޑްރައިވް" ކުރާނީ މި ދެ ގްރޫޕުން ނަމަވެސް، އެންމެ ގިނަ ވާނީ ކޮމިއުނަލް ގްރޫޕުގެ މީހުން ކަމަށެވެ.
އޭގެ ތެރޭގައި ކޮންމެސް ވަރަަކަށް ގޭބިސީތަކުން ފެންނަ ކޭސްތައް ހިމެނުނު ނަމަވެސް ޑރ. ޝީނާ ވިދާޅުވީ މިހާރު އަންދާޒާކުރެވިފައިވާ ސާޖް ކުޑަކުރެވިއްޖެނަމަ، ދިވެހިންގެ ގޭބިސީތަކުން ފެންނަ ކޭސްތައް މަދުކުރެވޭނެ ކަމަށެވެ.
އެހެން ނޫން ނަމަ، ކުރިއަށް އޮތް ދުވަސްތަކުގައި ގޭބިސީތަކުން ފެންނަ ކޭސްތައް އިތުރުވަމުން އަންނާނެ ކަމަށެވެ.
"މިހާރުވެސް މަޑުމަޑުން ގޭބިސީތަކަށް އިންފެކްޝަންތައް ވަންނަން ފަށާފަ މިވަނީ ސާވިސް އަށް ނުކުމެ އުޅޭ ގްރޫޕުގެ ތެރެއިން. މީގެ ތެރޭގައި ފެންނަ ނިސްބަތް ތަންކޮޅެއް ފަހުން ފެންނަން ފަށާނީ،" ޑރ. ޝީނާ ވިދާޅުވިއެވެ.
ޑރ. ޝީނާ ވިދާޅުވީ މި މަހުގެ ވަރަށް ބޮޑަށް ސަމާލުވާން ޖެހޭނެ ކަމަށާއި، މެއި 31 ވަނަ ދުވަހުގެ ސާޖް ކުޑަނުކުރެވިއްޖެނަމަ، ޖޫން މަހަށް ވެސް ސާޖް ދެމިގެން ހިނގައިދާނެ ކަމަށެވެ.
ހަމައެއާއެކު ރާއްޖެ ޕީކަށް ދާނެކަމަށް އަންދާޒާކުރެވިފައި ވަނީ ރަމަޟާން މަސް ނިމި، އީދާ ދިމާކޮށް ކަމަށްވާތީ، ވިޔަފާރި ކުރުމާއި މީހުންނާ ބައްދަލުކޮށް، ބޭރަށް ނުކުމެ އުޅުމުގައި ހާއްސަ ސަމާލުކަމެއް ދިނުމަށް ޑޮކްޓަރު އިލްތިމާސްކުރެއްވިއެވެ.
އަދި ހުއްދަ ލިބިގެން ބޭރަށް ނުކުންނަ މީހުން ވެސް ގައިދުރުކަން ބަހައްޓައި، އަތް ދޮވުމާއި ސާފުތާހިރުކަން އިސްކުރުމަށް ވެސް ޑރ. ވިދާޅުވިއެވެ.
"މި މަހުގެ ސާޖު ދަށްކޮށްލެއްވިއްޖެއްޔާ ދެން ގޭބިސީތަކަށް ދާ މިންވަރު ވެސް ކުޑަ ކުރެވޭނެ،" ޑރ. ޝީނާ ވިދާޅުވިއެވެ.
ކޮމިއުނަލް ގްރޫޕުގެ ސާޖް ނިމި، ދެން ފެށޭނީ ގޭބިސީތަކުގެ ކުޑަ ސާޖް އެކެވެ. ޑރ. ޝީނާ ވިދާޅުވީ ގޭބިސީތަކުގެ ސާޖް ފެންނާނީ ޖުލައި މަހުގެ ކުރީކޮޅު ކަމަށެވެ. އެއަށްފަހު އެ އަދަދު ދަށްވާން ފަށާނެއެވެ.