17 May 2020, 09:42
ދެމަހުގެ މެދުކެނޑުމަކަށްފަހު އިޓަލީގެ ކުލަބުތަކަށް ރަސްމީކޮށް ފުޓުބޯޅަ ޕްރެކްޓިސް ކުރުމުގެ ހުއްދަ އެގައުމުގެ ބޮޑުވަޒީރު ގުސިޕޭ ކޮންޓޭ ދެއްވައިފި އެވެ.
ކޮރޯނާ ވައިރަހުން ރައްކާތެރިވުމަށް އަޅާފައިވާ ފިޔަވަޅުތަކާ އެކު ޔޫރޮޕް ފުޓުބޯޅަ މެދުކަނޑާލީ މިދިޔަ މާޗު މަހުގެ ކުރީކޮޅު އެވެ. އެއަށްފަހު ގައުމުތަކުގެ ލޮކްޑައުން މަހުން މަހަށް އިތުރުކުރަމުން ދިއުމާ ގުޅިގެން ބައެއް ގައުމުތަކުގެ ފުޓުބޯޅަ ސީޒަންތައް ވަނީ ކެންސަލް ކޮށްފަ އެވެ.
އޭގެ ތެރޭގައި ފްރާންސްގެ ލީގާއި، ބެލްޖިއަމްގެ ލީގު އަދި ޑަޗް ލީގުގެ އިތުރުން އާޖެންޓީނާގެ ލީގު ވެސް ވަނީ ނިންމާލައިފަ އެވެ.
އެހެން ނަމަވެސް އިނގިރޭސި ލީގާއި، ސްޕެނިޝް ލީގު އަދި އިޓާލިއަން ލީގުގެ އިތުރުން ޖަރުމަނުގެ ލީގުތައް ނިންމާ ނުލާ ކުރިއަށް ގެންދާނެކަން މީގެ ކުރިން ވެސް އެގައުމުތަކުން އިއުލާންކޮށްފައިވާ އިރު ޖަރުމަނުގެ ބުންޑެސްލީގާގެ ކުޅުން ރޭ ވަނީ ފަށައިފަ އެވެ. އަދި އެހެންމެ އިޓާލިއަން ލީގު ފެށުމަށް ތައްޔާރުވުމުގެ ގޮތުނ ކުލަބުތަކަށް ރަސްމީކޮށް ޕްރެކްޓިސްތައް ފެށުމުފެ ހުއްދަ މިހާރު ވަނީ އެގައުމުން ދީފަ އެވެ.
"ޓީމްތަކުގެ ޕްރެކްޓިސްތައް މި މަހުގެ 18 ވަނަ ދުވަހުން ފެށިގެން ކުރިއަށް ގެންދެވޭނެ." އިޓަލީގެ ބޮޑުވަޒީރު ކޮންޓޭ އިއްޔެ ގައުމާ މުޙާތަބު ކުރައްވަމުން ވިދާޅުވެފައިވެއެވެ.
ކޮންޓޭ ވިދާޅުވީ، ޓީމްތަކަށް ޕްރެކްޓިސް ކުރުމުގެ ހުއްދަ ދިން ނަމަވެސް އެކަން ކުރެވޭނީ ސަރުކާރުން ކަނޑައަޅާ މިންގަނޑެއްގެ ތެރެއިން ކަމަށެވެ. އެގޮތުން ޓީމް ޕްރެކްޓިސްއަށް ނުކުތުމުގެ ކުރިން ހުރިހާ ކުޅުންތެރިން ވައިރަހަށް ޓެސްޓް ކުރަން މަޖުބޫރުވާނެ ކަމަށާއި، ކުޅުންތެރިޔަކު ޕޮޒިޓިވްވެއްޖެ ނަމަ ކަނޑައެޅިފައިވާ މުއްދަތަށް ކަރަންޓީން ވާން ޖެހޭނެ ކަމަށެވެ.
އަދި ކުރިއަށް އޮތް ދުވަސްތަކުގެ ތެރޭގައި އެ އުސޫލުތަކަށް ބަދަލުތައް ގެންނަން ޖެހިދާނެ ކަމަށް ކޮންޓޭ ވަނީ ވިދާޅުވެފަ އެވެ. އަދި ކުލަބުތަކުން އަމަލުކުރާ ގޮތް އެގައުމުގެ ކުޅިވަރާ ބެހޭ ވަޒީރު ސްޕަޑަފޯރާ ވަރަށް ޒިންމާދާރުކަމާ އެކު ބައްލަވާނެ ކަމަސް ކޮންޓޭ ވަނީ ވިދާޅުވެފަ އެވެ.
އިޓާލިއަން ލީގުގެ މެޗެއް އެންމެ ފަހުން ކުޅުނީ މާޗ މަހުގެ ނުވަ ވަނަ ދުވަހު އެވެ. އެ މެޗަށްފަހު އެގައުމުގެ ލީގުގެ ކުޅުން މެދުކަނޑާލި އިރު މިހާތަނަށް އެގައުމުގެ ލީގުގައި ވާދަކުރާ މަޝްހޫރު ބައެއް ކުޅުންތެރިންތަކަކަށް ވަނީ ބައްޔަށް ޕޮޒިޓިވް ވެފަ އެވެ.
އިޓަލީ އަކީ ކޮރޯނާ ވައިރަހުގެ އަސަރު އެންމެ ބޮޑަށް ކޮށްފައިވާ އެއް ގައުމެވެ. އެގޮތުން އެގައުމުގައި މިހާތަނަށް 225 ހާސް މީހުން ބައްޔަށް ޕޮޒިޓިވްވެފައިވާ އިރު 31،763 މީހުން ވަނީ އެ ބަލީގައި މަރުވެފަ އެވެ.