07 Jun 2020, 13:30
ރަށްރަށުގައި ކަރަންޓީނުވާ ފަރާތްތަކުން 24 ދުވަސް ކަރަންޓީންގައި ތިބެން ޖެހެނީ އެންޓިބޮޑީ ޓެސްޓް ކުރަން ނިންމާފައި ވާތީ ކަމަށް، އެންއީސޯސީގެ ޓެކްނިކަލް އެޑްވައިޒަރީ ގުރޫޕުގައި ހިމެނިވަޑައިގަންނަވާ ޑރ. ނަޒްލާ މުސްތަފާ ވިދާޅުވެއްޖެ އެވެ.
މާލޭގައި ތާށިވެފައި ތިބި މީހުން ރަށް ގޮސް، އަމިއްލަ ގޭގައި ކަރަންޓީން ވެވޭނެ ގޮތް އިއްޔެ ހަދަން ސަރުކާރުން އިއްޔެ ނިންމި އިރު، އެފަދަ މީހުން ރަށުގައި ކަރަންޓީން ކުރަނީ 24 ދުވަހަށެވެ. މީގެ ކުރިން އެފަދަ މީހުން ރަށަށް ދިޔުމުގެ ކުރިން ސަރުކާރުގެ ކަރަންޓީން ފެސިލީޓަކުގައި ބަހައްޓަމުން އައީ 14 ދުވަހަށެވެ.
ރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި މިކަމާ ގުޅިގެން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޑރ. ނަޒްލާ ވިދާޅުވީ، މީގެ ފަހުން ރާއްޖެއިން ބޭރުން އަންނަ ފަރާތްތައް ވެސް އަދި ރަށްރަށުގައި ކަރަންޓީން ކުރާ މީހުން ވެސް ބަލިން ސަލާމަތްވެފައިވާކަން ޔަގީން ކުރުމަށް ހަދާނީ އެންޓިބޮޑީ ޓެސްޓް ކަމަށެވެ.
"ޓްރެވަލް ރިިލޭޑް މިސާލަކަށް މާލެއިން އެހެން ރަށަކަށް ދިޔަސް ނުވަތަ ރާއްޖެއިން ބޭރުން މީހުން އަޔަސް، މީގެ ފަހުން 24 ދުވަހަށް ކަރަންޓީން ކުރުމަށްފަހު އެންޓިބޮޑީ ޓެސްޓެއް ހަދާގޮތަށް [ނިންމާފައި ވަނީ]،" ޑރ. ނަޒްލާ ވިދާޅުވި އެވެ.
އެންޓިބޮޑީ ޓެސްޓް އަކީ، މީހަކަށް އެއްފަހަރު ވައިރަސް ޖެހުމުން އެ ވައިރަހާ ދެކޮޅަށް ހަށިގަނޑުގައި އުފައްދާ ދިފާއީ ޕްރޮޓީން ހުރިތޯ ބެލުމަށް ކުރާ ޓެސްޓެކެވެ. ހަށިގަނޑުގައި އެންޓި ބޮޑީސް ހުރެއްޖެ ނަމަ، އޭނާއަށް ވައިރަސް ދެން ޖެހުމުގެ ފުރުސަތު ހަނިވެ އެވެ. އަދި އެ މީހެއްގެ ފަރާތުން އެހެން މީހުން ގަޔަށް ވައިރަސް ދިޔުމުގެ ފުރުސަތެއް ނޯވެ އެވެ.
ނަޒްލާ ވިދާޅުވީ، ހަށިގަނޑުގައި ކޮރޯނާވައިރަހުގެ އަސަރު ހުރިތޯ ބެލުމަށް ހަދާ ޓެސްޓް، ޕީސީއާރު ޓެސްޓް ދެން ހަދަމުން ދާނީ، ވައިރަސް ޖެހިފައި ހުރި ފަރާތަކާ ސީދާ ދިމާވެފައިވާ ފަރާތްތަކުގެ އެވެ.
"އެންޓިބޮޑީ ޕޮޒިޓިވްވާން ފަށާނީ ގާތްގަނޑަކަށް 9-11 ދުވަސް ތެރޭ. އެހެންކަމުން މިގޮތަށް ޓްރެވަލް ރިލޭޓެޑް ކަރަންޓީންކޮށްފައި އެންޓިބޮޑީ ޓެސްޓް ހަދާތީވެ 24 ދުވަހަށް [ކަރަންޓީން ކުރަން ޖެހެނީ]،" ޑރ. ނަޒްލާ ވިދާޅުވި އެވެ.
އެޗްޕީއޭގެ ރޭ ހާމަކުރި ގޮތުގައި ރަށުގައި އަމިއްލަ ގޭގައި ކަރަންޓީން ވުމުގެ ފުރުސަތު ދޭން ނިންމީ، ފުރަބަންދަށް ދޭ ލުއިތަކުގެ ތެރެއިން މިހާރު މާލޭގައި ތާށިވެފައި ތިބި މީހުން ރަށަށް ދިޔުމުގައި ލުއި ފަސޭހަ ގޮތެއް އިންތިޒާމް ކުރުމުގެ ގޮތުންނާއި ރައްޔިތުން މިހާރު ބައްޔަށް ހޭލުންތެރިވެފައިވާތީ އެވެ.
ރަށުގައި ކަރަންޓީން ވެވޭނީ އެ މީހަކު ކަރަންޓީނުވާ ގޭގައި ހާއްސަ ޝަރުތައް ހަވާނަމަ އެވެ. އަދި އެ ޝަރުތު ފުރިހަ ނުވާ ނަމަ، އަދިވެސް މީހުން ކަރަންޓީނު ކުރާނީ ރިސޯޓްތަކުގަ އެވެ.
މާލޭގައި ތާށިވެފައި ތިބި މީހުންހުގެ ތެރެއިން މިހާތަނަށް ސަރުކާރުގެ ކަރަންޓީން ފެސިލީތަކަށް ވަނީ 3،000 އަށް ވުރެ ގިނަ މީހުން ގެންގޮސްފަ އެވެ. އޭގެ ތެރެއިން ބައެއް މީހުން ވަނީ 14 ދުވަސް ހަމަވެގެން ދޫވެސްކޮށްލައިފަ އެވެ.