08 Jul 2020, 09:43
ބޮޑުފިނޮޅުގައި ހިންގި ހަމަނުޖެހުމާ ގުޅިގެން ހައްޔަރު ކުރި 19 ބިދޭސީންގެ ބަންދުގެ މުއްދަތު ކަނޑައަޅަށް ކުރިއަށް ގެންދިޔަ މަޖިލީހުގައި، ބިދޭސީންނަށް ތަރުޖަމާނަކު ހަމަޖައްސާދީފައި ނުވާތީ، އެ މައްސަލަ ޖުޑީޝަލް ސާވިސް ކޮމިޝަނަށް ހުށަހަޅަން ނިންމައިފިއެވެ.
އެ މައްސަލަ ޖޭއެސްސީއަށް ހުށަހަޅަން ނިންމީ، ހައްޔަރު ކުރި އެއް ބިދޭސީގެ ގާނޫނީ ވަކީލު، އާމިނަތު ނަޝްއާ އާދިލް އެވެ.
ނަޝްއާ ވިދާޅުވީ މިމަހުގެ ދެވަނަ ދުވަހު ހައްޔަރުކުރި ބިދޭސީންގެ ތެރެއިން އޭނާގެ މުވައްކިލާއެކު އިއްޔެ ބައްދަލުވުމެއް ކުރިއަށް ދިޔަ ކަމަށެވެ.
ބ. އޭދަފުށީ ޕޮލިސް ސްޓޭޝަން މެދުވެރިކޮށް އޯޑިއޯ ކޮންފަރެންސް މެދުވެރިކޮށް ކުރިއަށް ދިޔަ ބައްދަލުވުމުގައި ބޮޑުފިނޮޅުގައި ހިނގާދިޔަ ހާދިސާ ވަރަށް ތަފްސީލުކޮށް ކިޔައިދީފައިވާ ކަމަށެވެ.
އަދި ވަކީލާ ހިއްސާކުރި ހުރިހާ މައުލޫމާތެއް ހަމަ އެގޮތަށް މުއްދަތު މަޖިލީހުގައި ވެސް ކިޔައިދީފައިވާނެ ކަމަށާއި ނަމަވެސް ތަރުޖަމާނެއް ހަމަޖައްސައިނުދީ ލިޔެކިޔުންތަކެއްގައި ސޮއިކުރުވި ކަމަށް ބިދޭސީ މީހާ ބުނެފައިވާ ކަމަށެވެ.
"ޖިނާއީ ބޮޑު ކުށެއްގެ ތުހުމަތުގައި ގެންދެވުނު ބިދޭސީންތަކެއް ތަރުޖަމާނެއް ނެތި، މުއްދަތު މަޖިލިސް ކުރިއަށް ގެންދިޔަ މައްސަލަ ޖުޑީޝަލް ސާވިސް ކޮމިޝަނަށް ހުށަހެޅުމަށް ނިންމާފައިވާކަމުގައި ދަންނަވަމެވެ." ވަކީލާ ވިދާޅުވި އެވެ.
ނަމަވެސް ފުލުހުން އެކަން ދޮގުކުރެ އެވެ. ފުލުހުންގެ ތަރުޖަމާން މިއަދު ވިދާޅުވީ މުއްދަތު މަޖިލީހުގައި ބިދޭސީންގެ ތަރުޖާނަށް ފުރުސަތު ދީފައިވާނެ ކަމަށެވެ. އަދި މުއްދަތު މަޖިލީސް ކުރިއަށްދިޔައީ ތަރުޖަމާނާ އެކު ކަމަށެވެ.
އެރަށުގައި ބިދޭސީން މުޒާހަރާކޮށް ހަމަނުޖެހުން ހިންގީ ބޮޑުފިނޮޅުގެ ކޮންޓްރެކްޓު މަސައްކަތްތަކެއް ކުރާ އާރުއައިއެކްސް(ރިޒް) ކޮމްޕެނީ ޕްރައިވެޓް ލިމިޓެޑުން މުވައްޒަފުންނަށް މުސާރަ ނުދީގެންނެވެ.
އެ ހަމަނުޖެހުންތަކުގައި ކޮންޓްރެކްޓަރުގެ މުވައްޒަފުން ދިވެހިންތަކެއް ރަހީނުކޮށް، ރަށުގައި ހުރި ތަންތަނަށާއި، ހެވީ މެޝިނަރީތަކަށާއި، ވޯޓާ ޕައިޕްލައިން ތަކަށާއި، އެހެނިހެން ތަކެއްޗަށް ބޮޑެތި ގެއްލުންތައް ވަނީ ދީފައެވެ.
ބޮޑުފިނޮޅުގައި މަސައްކަތް ކުރަމުންދާ މީހުންގެ ހަތަރު މަސް ދުވަހުގެ މުސާރަ ކޮވިޑް19 އާ ގުޅިގެން ނުދެވި ވާ ކަމަށް އެތަނުގައި މަސައްކަތް ކުރަމުންދާ ކުންފުނީގެ މެނޭޖިންގް ޑިރެކްޓަރު، މިލަންދޫ ދާއިރާގެ މެމްބަރު އަލީ ރިޒާ ވަނީ އެއްބަސްވެވަޑައިިގެންފައެވެ.
ރިޒް މޯލްޑިވްސް އިން ބުނީ މުވައްޒަފުންނަށް މުސާރަ ނުދެވި ވަނީ ޑިވެލޮޕަރު ސީލް މޯލްޑިވްސް އާއެކު ވެފައިވާ އެއްބަސްވުމުގައި ބުނާގޮތަށް އެކުންފުންޏަށް ލިބެންޖެހޭ ފައިސާ ލިބިފައި ނުވާތީ ކަމަށެވެ.
ނަޝްއާ ވަނީ މި މައްސަލަ ބ. އަތޮޅު ޖުޑީޝަލް ދާއިރާގައި އިންސާފުން ކުރިއަށް ގޮސްދާނެ ކަމާމެދު ސުވާލުއުފައްދަވައިފައެވެ. އޭނާ ވިދާޅުވީ ސީލް މޯލްޑިވްސް ކުންފުނީގެ ހިއްސާދާރުންނަކީ ބ. އަތޮޅަށް ނިސްބަތްވާ ވިޔަފާރިވެރިން ކަމަށް ވެފައި، ބިރުދައްކާ ހަމަނުޖެހުން ހިންގާނެ ކަމަށް މީގެކުރީގައި ވެސް ރިޕޯޓުކޮށްފައިިވާއިރު، ބ. އަތޮޅު ޕޮލިސް ސްޓޭޝަންގެ ފަރާތުން އެއްވެސް ފިޔަވަޅެއް އަޅާފައި ނުވާ ކަމަށެވެ.