17 Jul 2020, 23:27
ރާއްޖޭގައި 10 އަހަރަށް ވުރެ ދިގު މުއްދަތަކަށް ކުއްޔަށް އުޅޭ ބިދޭސީންނަށް ރެސިޑެންސް ވިސާ ދިނުމަށް ރައްޔިތުންގެ މަޖިލިސް ރައީސް، ރައީސް މުހައްމަދު ނަޝީދު އިސްލާހު ހުށަހަޅުއްވައިފިއެވެ.
ރައީސް ނަޝީދު މިގޮތަށް ހުށަހެޅުއްވީ، އިމިގްރޭޝަންގެ ގާނޫނަށް އިސްލާހު ގެންނަން ސަރުކާރުން މަޖިލީހަށް ހުށަހެޅި ބިލް އެ ކޮމިޓީން ދިރާސާކޮށް، ރައްޔިތުންގެ މަޖިލީހުގެ ތަޅުމުން ގޮތެއް ނިންމަން ފޮނުވުމުން، އަނބުރާ ކޮމިޓީ އަށް ބިލު ފޮނުއްވަމުންނެވެ.
އިއްޔެ ބޭއްވި މަޖިލީހުގެ އެ ބިލު ދިރާސާކުރާ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގެ މުގައްރިރު، އަދި މަރަދޫ ދާއިރާގެ މެމްބަރު އިބްރާޙިމް ޝަރީފު ވިދާޅުވީ، މަޖިލިސްގެ ރިޔާސަތުން ބިލު އަނބުރާ ފޮނުވާލުމުން، ރިޔާސަތުން ހުށަހަޅާފައިވާ އިސްލާހާއެކު، އެ ބިލާ މެދު އަލުން ކޮމިޓީގައި ވިސްނުމަށް އެދިވަޑައިގެންފައިވާ ކަމަށެވެ.
ރައީސް ނަޝީދުގެ ހުށަހެޅުއްވީ، އިމިގްރޭޝަންގެ ގާނޫނުގެ 16 ވަނަ މާއްދާގައި ބުނާ ބިދޭސީންނަށް ރެޒިޑެންސް ވިސާ ދެވޭ ހާލަތްތަކަށް އިސްލާހު ގެނައުމަށެވެ. އެގޮތުން މިހާރު ރެޒިޑެންސް ވިސާ ދޭ ބޭރުގެ ވިޔަފާރިވެރިންނަށް އެއްލައްކަ ރުފިޔާއަށް ވުރެ ބޮޑު އިންވެސްޓްމަންޓެއް ރާއްޖޭގައި ކުރާ ބިދޭސީނަށާއި، 10 އަހަރަށްވުރެ ދިގު މުދަތަކަށް ގެއެއް ކުއްޔަށް ދޭ ފަރާތްތަކަށް އަދި ދިވެއްސަކާ ކައިވެނިކޮށްގެން އުޅޭ ބިދޭސިންނަށެް ރެސިޑެންސް ވިސާ ދިނުމަށް އެމަނިކުފާނު ހުށަހެޅުއްވި އިސްލާހުގައި ވެއެވެ.
އިމިގްރޭޝަން ގާނޫނު މިހާރު އޮތް ގޮތުން ރެޒިޑެންސް ވިސާ ދެނީ، އެންމެ ދެހާލަތަކަށެވެ. އެއީ ދިވެއްސަކާ ކައިވެނި ކުރާ ބިދޭސީންނަށާއި ބޮޑެތި އިންވެސްޓްމަންޓްތައް ކޮށްގެންއުޅޭ ބިދޭސީއަކަށް ދެވޭ ހުއްދައެއްގެ ދަށުންނެވެ. ނަމަވެސް އެ އިންވެސްޓުމަންޓުގެ އަދަދު ގާނޫނުގައި ބަޔާންކޮށްފައި ނުވެއެވެ.
އެހެން ނަމަވެސް، އިމިގްރޭޝަންގެ ގާނޫނުގެ ދަށުން ހަދާފައިވާ ކޯޕަރޭޓް ރެޒިޑެންސް ވިސާގެ ގަވައިދުގައި ބުނާ ގޮތުން، ވިޔަފާރިވެރިންނަށް ކޯޕަރޭޓް ރެޒިޑޭންސް ވިސާ ދެވޭނީ، ރާއްޖޭގައި 50 މިލިއަން ޑޮލަރު (771 މިލިއަން ރުފިޔާ)ގެ އިންވެސްޓުކޮށްފައިވާ ފަރާތްތަކާއި، އެއް މިލިއަން ޑޮލަރު (15.4 މިލިއަން ޑޮލަރު) ރާއްޖޭގެ ބޭންކެއްގައި ދެ އަހަރު ދުވަހުގެ މުއްދަތަށް ޑިޕޮސިޓްކޮށްފައިވާ ފަރާތްތަކަށާއި ނުވަތަ މާލީ މުޤާބިލެއް (މާލީ ސެކިއުރިޓީއެއް) ގައި، އެއް މިލިއަން ޑޮލަރު އިންވެސްޓްކޮށްފައިވާ ފަރާތްތައް ކަމަށް ބަޔާން ކޮށްފައިވެއެވެ. އަދި ސަރުކާރުގެ ވުޒާރާއަކުން ހުއްދަކުރާ ރިއަލްއެސްޓޭޓްގައި، މަދުވެގެން އެއް މިލިއަން ޑޮލަރަށްވުރެ މަދުނުވާ އަދަދަކަށް އިންވެސްޓްކޮށްފައިވާ ފަރާތްތައްކަށް ކަމަށްވެސް އެ ގަވައިދުގައި ބަޔާންކޮށްފައިވެއެވެ.
ނަޝީދު ހުށަހެއްޅުވި އިސްލާހު ފާސްވެއްޖެ ނަމަ، ވަރަށް ފަސޭހައިން ބިދޭސީންނަށް ރާއްޖެއިން ބިދޭސީންނަށް ރެޒިޑެންސް ވިސާ ލިބިގެންދާނެއެވެ. އަދި އެމަނިކުފާނު އިސްލާހުގައި ގާނޫނުން ބޭރުގެ ވިޔަފާރިވެރިންނަށް އެއްލައްކަ ރުފިޔާއަށް ވުރެ ބޮޑު އިންވެސްޓްމަންޓަކަށް އެ އަދަދު ބަދަލު ކުރުމަކީ، ނިސްބަތުން ކުޑަ އަދަދެކެވެ.
ނަޝީދު އިސްލާހާ ގުޅޭ ގޮތުން ކޮމިޓީން އަދި ވަކިގޮތެއް ނުނިންމަވައެވެ. އެ އިސްލާހަށް އިދިކޮޅުންނާއި، ބައެއް އާންމުން ދަނީ ކަންބޮޑުވުން ފާޅުކުރަމުންނެވެ.