20 Jul 2020, 14:15
ބްރަސަލްސް (ޖުލައި 20) : ކޮވިޑް-19 ގެ ސަބަބުން ޔޫރަޕްގެ ގައުމުތަކަށް ލިބުނު އިގްތިސާދީ ގެއްލުންތަކުން ޔޫރަޕްގެ އިއްތިހާދު (އީޔޫ) ގެ ގައުމުތައް އަރައިގަތުމަށްޓަކައި ގުޅިފައިވާ އިގްތިސާދީ ޕްލޭނެއް އެކަށައެޅުމަށް އެގައުމުތަކުގެ އިސްވެރިން ބޭއްވި ސަމިޓް ނާކާމިޔާބު ވެއްޖެއެވެ.
އިއްޔެ ބޭއްވި މިސަމިޓަށްފަހު ނޫސްވެރިންނަށް މައުލޫމާތު ދެއްވަމުން ޔޫރަޕިއަން ކައުންސިލްގެ ރައީސް ޗާލްސް މިޗައިލް ވިދާޅުވީ ކޮވިޑް-19 އިން ޔޫރަޕްގެ ގައުމުތަކަށް ލިބުނު އިގްތިސާދީ ގެއްލުންތައް ކިތަންމެ ބޮޑުނަމަވެސް އެކަމުން އަރައިގަތުމަށްޓަކައި ގުޅިފައިވާ އިގްތިސާދީ ޕްލޭނެއް އެކަށައެޅުމުގައި އީޔޫގެ ގައުމުތަކުގެ އިސްވެރިން ނާކާމިޔާބުވެފައިވާ ކަމުގައެވެ. މިމައްސަލާގައި ޔޫރަޕްގެ އިއްތިޙާދުގެ ލީޑަރުން ގެ ޚިޔާލުތައް ވަރަށް ތަފާތުކަމަށް މިޗައިލް ވިދާޅުވިއެވެ.
ކޮވިޑް-19 ފެތުރެން ފެށި ދުވަސްވަރު އެ ރޯގާއާ ކުރިމަތިލުމަށްޓަކައި ސިއްޙީ ގޮތުންނާއި މާލީގޮތުން އެކައްޗެއް ކިޔައި އެއްޕްލޭނެއްގެ ދަށުން މަސައްކަތް ކުރުމުގައިވެސް ޔޫރަޕްގެ އިއްތިޙާދުގެ ގައުމުތައް ވަނީ ނާކާމިޔާބުވެފައެވެ. މި ނާކާމިޔާބީއާއެކު އީޔޫ ގެ ކޮންމެ ގައުމަކުންވެސް ކޮވިޑް އާ ކުރިމަތިލީ އެކަހެރިގޮތެއްގައެވެ. ފަރުދީގޮތެއްގައެވެ. އެއްގައުމު އަނެއްގައުމަށް އެހީތެރިވުމުގެ ރޫހެއް ނެތިއެވެ.
ކޮވިޑް އާ ކުރިމަތިލުމަށްޓަކައި ސިއްޙީ ގޮތުން އެއްގައުމު އަނެއް ގައުމަށް އެހީތެރިވެ ވިލަރެސް ކުރުމަށާއި އެއްގައުމުން އަނެއްގައުމަށް ސިއްހީ ސާމާނާއި ތަކެތި ފޯރުކޮށްދިނުމަށް އެއްބަސްވުމަކަށް އައުމުގައިވެސް އެދުވަސްވަރު އީޔޫ ގެ ގައުމުތައްވަނީ ނާކާމިޔާބުވެފައެވެ. މިކަމުގެ ސަބަބުން ކޮވިޑްއާ ކުރިމަތިލުމުގައި އީޔޫގެ ގައުމުތަކަށް ބޮޑެތި ގެއްލުންތަކެއްލިބުމުގެ އިތުރުން އެތަށް ހާސްބަޔަކު މަރުވެ އެތަށް ސަތޭކަ ބިލިޔަން ޑޮލަރެއްގެ ގެއްލުން ލިބިފައިވެއެވެ.
އީޔޫ ގެ 27 ގައުމުގެ އިސްވެރިން ބެލްޖިޔަމްގެ ވެރިރަށް ބްރަސަލްސްގައި އިއްޔެ ސަމިޓް ބައްދަލުވުމެއް ބާއްވާފައިވަނީ ކޮވިޑުގެ ސަބަބުން ލިބުނު އިގްތިސާދީ ގެއްލުންތަކާއި އަދި ކުރިޔަށް އޮތް ހަމަސްތެރޭގައި ލިބޭނެކަމަށް އަންދާޒާކުރާ ގެއްލުންތައް ފޫބެއްދުމަށްޓަކައި އެގައުމުތައް ހިއްސާވާގޮތަށް ގުޅިފައިވާ އިގްތިސާދީ ޕްލޭނެއް އެކަށައެޅުމަށެވެ. މި ޕްލޭން ބިނާވެފައިވަނީ 1.8 ޓްރިލިޔަން ޑޮލަރުގެ މައްޗަށެވެ.
މިޕްލޭނަށް އެންމެ ބޮޑަށް ވާކާލާތުކުރީ ޖަރުމަނާއި ފަރަންސޭސިވިލާތުންނެވެ. މި ޕްލޭނަށް އީޔޫގެ ގިނަ ގައުމުތަކުގެ ލީޑަރުން ދެކޮޅުހަދާފައިވާއިރު މި ޕްލޭނަށް މަދު ގައުމެއްގެ ތާއީދު ނޫނީ ނުލިބުމުން ޖަރުމަނުގެ ޗާންސެލާ އެންގެލާ މާކަލް އާއި ފަރަންސޭސި ރައީސް އެންމަނުއެލް މެކްރޯން ވަނީ އެކަމާ ކޯފާވެވަޑައިގެންފައެވެ.
އިއްޔެގެ ސަމިޓްގައި ވާހަކަ ދެއްކެވި އީޔޫގެ ގިނަ ގައުމުތަކުގެ ލީޑަރުން ވިދާޅުވެފައިވަނީ ކޮވިޑްގެ ސަބަބުން ލިބުނު އިގްތިސާދީ ގެއްލުންތަކުން އަރައިގަތުމަށްޓަކައި އެގައުމުތަކުން ދުނިޔޭގެ މާލީ އިދާރާތަކުގެ އެހީ ހޯދާނީ ފަރުދީގޮތުން ކަމަށާ ޔޫރަޕްގެ އިއްތިޙާދު މެދުވެރިކޮށް ނޫންކަމަށް ވިދާޅުވެފައެވެ.
ކޮވިޑްގެ ސަބަބުން މިދިޔަ ޖޫންމަހުގެ ނިޔަލަށް އީޔޫގެ ގައުމުތަކުގެ އިގްތިސާދަށް 1.6 ޓްރިލިޔަން ޑޮލަރުގެ ގެއްލުމެއް ލިބިފައިވާކަމަށާ މިގެއްލުންތައް މިއަހަރުގެ ނިޔަލަށް 3.4 ޓްރިލިޔަން ޑޮލަރަށް އަރާނެކަމަށް ރިޕޯޓްތައް ބުނެއެވެ. (ނޫސްއެޖެންސީތައް)