27 Jul 2020, 12:49
ލަންޑަން (ޖުލައި 27) : ފަލަ މީހުންނަށް ކޮވިޑް-19ގެ ނުރައްކާތެރިކަން އިންތިހާއަށް ބޮޑުކަމަށް އިނގިރޭސިވިލާތުގެ ސިއްޙަތާބެހޭ ތަޖްރިބާކާރުން ވިދާޅުވެއްޖެ އެވެ.
އިނގިރޭސިވލާތުގެ ޕަބްލިކް ހެލްތް އޮތޯރިޓީގެ ތަޖްރިބާކާރުންނާ ހަވާލާދީ ބީބީސީ ބުނި ގޮތުގައި އިނގިރޭސިވިލާތުގައި ކޮވިޑް-19 ޖެހުނު މީހުންގެ ތެރެއިން ނުރައްކާ ހާލަތަށް ދިޔަ މީހުންގެ ތެރޭގައި އެންމެގިނައީ ހަށިގަނޑުގައި އާދަޔާ ޚިލާފަށް ސަރުބީގިނަ ފަލަމީހުންނެވެ.
ކޮވިޑް-19 ޖެހުނު ފަލަމީހުންގެ ތެރެއިން ގާތްގަނޑަކަށް 40 އިންސައްތަމީހުންނަށް ކޮވިޑްގެ އަސަރު ކުރި މިންވަރާއި އުފުލަންޖެހުނު ވޭން އެހެންމީހުންނަށް ވުރެ އާދަޔާ ޚިލާފަށް ބޮޑުކަން ކޮށްފައިވާ ރިޕޯޓްތަކުން އެނގޭކަމަށާ ކޮވިޑްގެ ސަބަބުން ވެންޓިލޭޓަރަށް ލާހިސާބަށް ހާލަތު ގޯސްވި މީހުންގެ ތެރޭގައި ވެސް ފަލަމީހުންގެ ނިސްބަތް މަތިކަން ފާހަގަ ކުރެވުނުކަމަށް އެއޮތޯރިޓީން ބުނެފައިވެ އެވެ.
އިނގިރޭސިވިލާތަކީ ފަލަމީހުންގެ މީހުންގެ ނިސްބަތް ދުނިޔޭގެ ފެންވަރުގައިވެސް މަތިގައުމެވެ. އިނގިރޭސި ޕަބްލިކް ހެލްތް އޮތޯރިޓީގެ ތަފާސްހިސާބުތައް ދައްކާގޮތުން އެގައުމުގެ ރައްޔިތުންގެ ތެރެއިން ގާތްގަނޑަކަށް ތިންބައިކުޅަ ދެބައި މީހުންނަކީ ފަލަމީހުންނެވެ. އިނގިރޭސި ޒުވާން ޖީލަށް ފަލަވުމުގެ މައްސަލައަކީ ބޮޑުމައްސަލައަކަށް ވެފައިވާއިރު ކޮވިޑް-19 އާ ގުޅިގެން ފަލަވުމުގެ މައްސަލަ އިނގިރޭސި މުޖްތަމައުގައިވަނީ ކުރިޔަށްވުރެ ބޮޑަށް މީހުން ބިރުގަންނަ މައްސަލައަކަށްވެފަ އެވެ.
ކޮވިޑް-19 އާ ގުޅިގެން އިނގިރޭސި ޕަބްލިކް ހެލްތް އޮތޯރިޓީން ނެރުނު ތަފާސް ހިސާބުތަކަށް ބަލާއިރު ކޮވިޑް-19 ޖެހުމުން އެގައުމުގައި ފުރާނައަށް ނުރައްކާވާ ހިސާބަށް ގޮސްފައި ވަނީ ހަތް ވައްތަރެއްގެ މީހުންނެވެ. އެއީ އުމުރުން ދުވަސްވީ މީހުންނާއި ކެންސަރުބަލީގެ މީހުންނާއި ހިތުގެ ބަލީގެ މީހުންނާއި އާދަޔާ ޚިލާފަށް ފަލަމީހުންނާއި އެކި ސަބަބުތަކާ ގުޅިގެން ދިފާއީ ނިޒާމު ބަލިކަށިވެފައިވާ މީހުންނާ ދުންފަތުގެ އިސްތިއުމާލުކުރުން ފަދަ ކަންކަމުގެ ސަބަބުން ފުއްޕާމޭގެ ބަލިތައް ތަހައްމަލު ކުރާމީހުންނާ އަދި މާބަނޑު މީހުންނެވެ.
ފަލަމީހުންގެ ހާލަތު ގޯސްވަނީ ފަލަވުމުގެ ސަބަބުން ހަށިގަނޑުގައި ސިއްހީ ގިނަ މައްސަލަތަކެއް އުޅޭތީ ކަމަށްވެސް އެއޮތޯރިޓީން ބުނެއެވެ. އިނގިރޭސިވިލާތަކީ ދުނިޔޭގައި 10 ވަނައަށް ކޮވިޑް-19 ޖެހޭމީހުންގެ އަދަދު އެންމެ ގިނަ ގައުމެވެ.
ގާތްގަނޑަކަށް 67 މިލިޔަން މީހުންގެ އާބާދީއެއް އޮންނަ އިނގިރޭސިވިލާތުގައި ތިން ލައްކައަށްވުރެ ގިނަ މީހުންނަށް ކޮވިޑް-19 ޖެހިފައިވާއިރު އޭގެތެރެއިން 45 ހާހަށްވުރެ ގިނަ މީހުން ވަނީ މަރުވެފަ އެވެ. ކޮވިޑްގެ ޝިކާރައަކަށް ވެގެން މަރުވި މީހުންގެ ތެރެއިން ގާތްގަނޑަކަށް 80 ޕަސެންޓް އެހެން ބަލިތައް ތަހައްމަލްކުރާ މީހުންކަމަށްވެއެވެ. މީގެތެރޭގައި ފަލަމީހުންވެސް ހިމެނެއެވެ.
އިނގިރޭސިވިލާތުގައި ފަލަމީހުން ހިމަނާފައިވަނީ ކޮވިޑްގެ ރިސްކު އެންމެބޮޑު މީހުންގެ ކެޓަގަރީގައެވެ. (ބީބީސީ)