31 Jul 2020, 15:46
ޅ. ހިންނަވަރުގައި ހޯމް ކަރަންޓީނުގައި ހުރި މީހަކު ކޮވިޑް19 އަށް ޕޮޒިޓިވް ވެއްޖެއެވެ.
ހިންނަވަރު ކައުންސިލުން ބުނީ ޕޮޒިޓިވްވި މީހާގެ ފަރާތުން ބަލީގެ އެއްވެސް އަލާމާތެއް ނުފެންނަ ކަމަށާއި އޭނާގެ ހާލު ރަނގަޅު ކަމަށެވެ.
"ކަރަންޓީނު 14 ދުވަސް ހަމަވެ 15 ވަނަ ދުވަހު ނެގި ސާމްޕަލުން ޕޮޒިޓިވްވި ކަމަށް ދައްކަނީ. އޭނާގެ ހާލު ރަނގަޅު" ކައުންސިލުން ބުންޏެވެ.
ކައުންސިލުން ބުނީ ބައްޔަށް ޕޮޒިޓިވްވެފައިވަނީ އުމުރުން 22 އަހަރުގެ މީހެއް ކަމަށެވެ. އޭނާ ކަރަންޓީނުގައި ހުރީ އެކަނި ކަމަށާއި، އިތުރު ބަޔަކާ އޭނާ އާއި ކޮންޓެކްޓު ވެފައިވޭތޯ ބަލަމުންދާ ކަމަށެވެ.
ޕޮޒިޓިވްވި މީހާ އަދިވެސް ހުރީ އޭނާ ހޯމް ކަރަންޓީނުގައި ހުރި ކޮޓަރީގައި ކަމަށް ކައުންސިލުން ބުންޏެވެ.
ހޯމް ކަރަންޓީނުގައި ތިބޭީހުން ޕޮޒިޓިވްވާ މިންވަރު ދަނީ އިތުރުވަމުންނެވެ.
ރާއްޖޭގައި މިހާތަނަށް 3،719 މީހަކު ކޮވިޑް19 އަށް ޕޮޒިޓިވް ވެފައިވާއިރު މިހާރު 1،120 މީހުންނަށް ދަނީ ބައްޔަށް ފަރުވާ ދެމުންނެވެ. ބަލީގައި 16 މީހަކު ރާއްޖެއިން މަރުވެފައިވާއިރު 2،568 މީހުން ވަނީ ބަލިން ރަނގަޅުވެފައެވެ.