19 Aug 2020, 21:23
ރާއްޖެއަށް އިމްޕޯޓްކުރާ ޕްލާސްޓިކްގެ ބޮޑު ބައެއް ރޯ މެޓީރިއަލްގެ ގޮތުގައި ބޭރުކުރަން ޖެހޭ ކަމަށް ޕްލާސްޓިކާ ދެކޮޅަށް ރާއްޖޭގައި މަސައްކަތް ކުރާ ޖަމިއްޔާ ޕާލޭގެ އެކްޒެކިއުޓިވް ޑިރެކްޓަރު މެނޭޖަރު ޝާހީނާ އަލީ ވިދާޅުވެއްޖެއެވެ.
ސިންގަލް ޔޫސް ޕްލާސްޓިކް ބޭނުންކުރުން މަދުކުރުމަށް ޕްލޭން އެކުލަވާލުމަށް އާންމުންގެ ހިޔާލު ހޯދުމަށް މިއަދު ބޭއްވި ވާޗުއަލް ފޯރަމްގައިި ޝާހީނާ ވިދާޅުވީ ރާއްޖޭގައި މިހާރު ރިސައިކަލް ޕްލާންޓެއް ގާއިމްކުރަން ޖެހޭ ކަމަށެވެ.
"އެއީ އަޅުގަނޑުމެން ރިސައިކަލް ކުރަން މިހާރު އެކްސްޕޯޓްކުރާ ގައުމުތަކުން ގްރީންވޯލްސް އައިސްފަ ހުރީ. އެހެންވީމާ އަޅުގަނޑުމެންނަށް އެކްސްޕޯޓެއް ނުކުރެވޭނެ މިއަށްފަހު ހަޑިވެފައި ބޭނުންކޮށްފައި ހުންނަ ޕްލާސްޓިކެއް. އެހެންވީމާ ރާއްޖޭގައި އެބަޖެހޭ 2023-2024 ގެ ކުރިން އަޅުގަނޑުމެންނަށް ހަމަ ރޯ މެޓީރިއަލްގެ ގޮތުގައި ރީޔޫސް ކުރާނެ ޕްލާސްޓިކް ބޭރުކުރެވޭނެ ނިޒާމެއް ގާއިމްކުރެވޭނެ ނިޒާމެއް ހަމަޖެހެން. އަޅުގަނޑުމެން މިނިސްޓްރީއާ ވާހަކަ ދައްކައިގެން ހަމަ ވަރަށް ބޮޑަށް އޭތި ސެޓަޕް ކުރެވޭނެގޮތެއް ހަމަ އެބަބަލަން ރާއްޖޭގައި،" ޝާހީނާ ވިދާޅުވިއެވެ.
މިއަދުގެ ފޯރަމްގައި އެންވަޔަރަމަންޓް މިނިސްޓްރީގެ ޑިރެކްޓާ ޖެނެރަލް އަހުމަދު މުރުތަޟާ ވިދާޅުވީ ދުރުރާސްތާ ޕްލޭނެއްގެ ދަށުން ތިލަފުށީގައި ރިސައިކަލް ފެސިލިޓީއެއް ގާއިމްކުރުމުގެ މަސައްކަތް މިހާރު ކުރިއަށްދާ ކަމަށެވެ.
އެހެން ނަމަވެސް ޕްލާސްޓިކްގެ ތެރެއިންވެސް ބައެއް ވައްތަރުތަކީ ރިސައިކަލް ނުކުރެވޭ ބާވަތްތައްކަން ފާހަގަކުރައްވައި އޭނާ ވިދާޅުވީ އެ ބާވަތްތައްވެސް ކަލެކްޓްކުރެވޭނެ ރަނގަޅު ނިޒާމެއް ގާއިމްކުރެވޭނެ ކަމަށެވެ. އަދި ރިސައިކަލް ފެސިލިޓީގައި ޕްލާސްޓިކާ އެހެނިހެން ތަކެތިވެސް ރިސައިކަލް ކުރެވިގެންދާނެ ކަމަށް މުރުތަޟާ ވިދާޅުވިއެވެ.
އޭނާ އިތުރަށް ވިދާޅުވީ ސިންގަލް ޔޫސް ޕްލާސްޓިކް ފޭސްއައުޓްކުރުމަށް އަމާޒު ހިފާފައި އޮތްނަމަވެސް ސިއްހީ ދާއިރާގައި މިހާރުވެސް ބޭނުންކުރާ ސިރިންޖާއި އައިވީ ޕެކެޓް ފަދަ ތަކެތި ބޭނުންކުރުން ހުއްޓާނުލެވޭނެކަމަށެވެެ. އެހެންކަމުން އެ ތަކެތި ކަލެކްޓް ކުރެވޭނެ ރަނގަޅު ނިޒާމެއް ގާއިމްކުުރުމަށް މަސައްކަތްކުރަމުންދާކަމަށް މުރުތަޟާ ވިދާޅުވިއެވެ.
ސިންގަލް ޔޫސް ޕްލާސްޓިކް ފޭސް އައުޓްކުރުމުން އާންމުންއަންނާނެ ހެޔޮ ބަދަލުތަކާ ގުޅޭގޮތުން އެންވަޔަރަަމަންޓް މިނިސްޓްރީގެ ކޮންސަލްޓަންޓް ހައްވާ ނަޝްފާ ވިދާޅުވީ އަމާޒަކީ މިހާރު ދިވެހީންގެ އެއްޗެތި ގަނެ އުކައި ހެދުމުގެ އާދަތައް ބަދަލުކުރުން ކަމަށެވެ.
"މިއީ ފަސް އަހަރުންވެސް 10 އަހަރުންވެސް ނުވެދާނެކަންތައް. އެކަމަމު މި ޕްލޭންގެ ދަށުން ހޭލުންތެރިކަމާއެކު މިއަންނަ ބައެއް ފަހަރު ރެސްޓްރިކްޝަންސް ނުވަތަ ބޭން ކުރުމުގެ ގޮތުން ބައެއް ކަހަލަ ޕްލާސްޓިކް އެތެރެކުރުން ނުވަތަ ގަނެވިއްކުން މަނާކުރުން. ހަމައެއާ ވިދިގެން ތިމާވެއްޓާ ރައްޓެހިތަކެތި ވިއްކުމަށް ބާރުއަޅައި ވިޔަފާރިކުރުން ޕްރޮމޯޓްކޮށް މިހުރިހާ ކަމަކުން އަޅުގަނޑަށް ވިސްނެނީ ދިވެހިންގެ ލޯންގްޓާމަށް ވިސްނާއިރު ސިއްހަތަށްވެސް ގިނަ ގުނަ ފައިދާތަކެއް ކުރާނެ،" ނަޝްފާ ވިދާޅުވިއެވެ.
ސިންގަލް ޔޫސް ޕްލާސްޓިކުން ރާއްޖޭގެ ވެއްޓާއި އިގްތިސާދު ހިމާޔަތް ކުރުމުގެ ގޮތުން، ސަރުކާރުން އިސްނަގައިގެން ކުރަމުން ގެންދާ މަސައްކަތްތަކުގެ ތެރެއިން، ސިންގަލް ޔޫސް ޕްލާސްޓިކް 2023 ވަނަ އަހަރުގެ ނިޔަލަށް ފޭސްއައުޓްކުރަން ވަނީ ނިންމައިފައެވެ.
އެ ލަނޑުދަނޑި ހާސިލު ކުރުމުގެ ގޮތުން ސިންގަލް ޔޫސް ޕްލާސްޓިކަށް ބަރޯސާވާ މިންވަރު މަދުކޮށް، ބޭނުން ކުރުން ހުއްޓާލުމަށްޓަކައި، ސިންގަލް ޔޫސް ޕްލާސްޓިކް ފޭސްއައުޓް ކުރުމުގެ ޑްރާފްޓް ޕްލޭނެއް މިހާރު ވަނީ އެކުލަވާލައިފައެވެ.