23 Aug 2020, 23:10
ކޮވިޑް-19ގެ ކޭސްތައް މާ ގިނަ ވާނަމަ ބަލި މީހުންގެ ތެރެއިން ފަރުވާދޭން ގެންދާނެ މީހަކު ކަނޑައަޅަން ޖެހޭ ހިސާބަށް ގޮސްދާނެ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)އިން ބުނެފިއެވެ.
ކޭސްތައް ގިނަވަމުންދާކަމުގެ ކަންބޮޑުވުން ފާޅުކުރަމުން މިއަދު އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވެފައި ވަނީ މާލެ ސަަރަހައްދުގައި ކޮވިޑް-19އަށް ފަރުވާ ދޭން ހާއްސަކޮށްފައިވާ އެނދުތަކުގެ 62 ޕަސެންޓު ފުރިފައިވާ ކަމަށެވެ.
މިރޭ އެޗްއީއޯސީއިން ބޭއްވި ނޫސްވެރިންގެ ބައްދަލުވުމެއްގައި ޑރ. އަލީ ލަތީފު ވިދާޅުވީ، މާ ބޮޑަށް ކޭސްތައް ގިނަވެ، ހުސް އެނދުތައް މާ ބޮޑަށް މަދުވެއްޖެ ނަމަ، ބަލި މީހުންގެ ތެރެއިން އެނދަށް ގެންދާނީ ނުވަތަ ވެންޓިލޭޓަރުގައި ފަރުވާދޭން ގެންދާނީ ކާކުތޯ ކަނޑައަޅަން ޖެހޭ ހިސާބަށް ގޮސްދާނެ ކަމަށެވެ.
"މާލޭގައިވެސް މިގޮތަށް ކޭސްތައް ގިނަވެއްޖެއްޔާ އަޅުގަނޑުމެން ޖެހިދާނެ ޓްރައޭޖް ކުރަން. ޓްރައޭޖްގެ މާނައަކީ އެ މީހާ ސަލާމަތް ކުރެވޭނެ ކަމަށް ބަލާ މީހުންގެ ތެރެއިން ކޮން ބަޔަކުތޯ އަޅުގަނޑުމެން އެޑްމިޓްކޮށްގެން ފަރުވާ ދޭނީ. މިހާ ހިސާބަށް އަޅުގަނޑުމެންނަށް ނުޖެހޭ އެއްގޮތަކަށްވެސް އެގޮތަކަށް ޓްރައޭޖް ކުރާކަށް. އެހެންނަމަވެސް، ކޭސްތައް ގިނަވެ ހޮސްޕިޓަލު އެނދުތައް މަދުވެއްޖެ ކަމަށް ވަންޏާ އަޅުގަނޑުމެން ޖެހޭނީ ޓްރޭޖްއެއް ކުރަން،" ޑރ. ލަތީފު ވިދާޅުވިއެވެ.
"މާލެއަކީ ކުޑަ ތަނެއް ވީމާ އަޅުގަނޑުމެންނަށް އެނގޭނެ އެކަކު އަނެކަކު. އެހެންވީމަ އޭގެ ތެރެއިން ކާކުތޯ އަޅުގަނޑުމެން ނަގާފައި ހޮސްޕިޓަލުގައި އެޑްމިޓް ކުރާނީ ކާކުތޯ އަޅުގަނޑުމެން ވެންޓިލޭޓަރަށް ލާނީ މިގޮތަށް އަޅުގަނޑުމެން ސިލެކްޓު ކުރަން ކަމަށް ވަންޏާ މިއީ ވަރަށް އުނދަގޫ ކަމަކަށް ވެދާނެ ވަރަށް ބޮޑު ހިތާމައަކަށް ވެދާނެ،"
މިހާރު ރާއްޖޭގައި މީހުން ކޮވިޑް-19އަށް ޕޮޒިޓިވްވަމުން ދަނީ ރާއްޖެ ކަހަލަ ކުޑަ ގައުމަކަށް ބަލާއިރު ވަރަށް ނުރައްކާ ރޭޓެއްގައި ކަމަށްވެސް ޑރ. ލަތީފު ވިދާޅުވިއެވެ. އަދި އެކަމުގެ ކަންބޮޑުވުން ފާޅުކުރެއްވިއެވެ.
"އަޅުގަނޑުމެންނަށް ފުރަތަމަ ކޭސް ފެނިގެން ދިޔައީ ހަތެއް މާޗްގައި. އެއަށް ފަހުގައި 500 ކޭސް ޕޮޒިޓިވްވާން ނެގީ ގާތްގަނޑަކަށް 56 ދުވަސް. އޭގެ ފަހުން އިތުރަށް 500 މީހުން ޕޮޒިޓިވްވާން މި ނެގީ ހަމައެކަނި 13 ދުވަސް. މިއަދުގެ އަޅުގަނޑުމެންގެ ހާލު އޮތީ ކިހިނެއްތޯ. 500 ކޭސް ޕޮޒިޓިވްވާން މި ނަގަނީ އެންމެ ތިން ދުވަސް ނުވަތަ ހަތަރު ދުވަސް. މި ރޭޓަކީ ވަރަށް ބޮޑު ރޭޓެއް އެނގޭތޯ،" ޑރ. ލަތީފު ވިދާޅުވިއެވެ.
ނަރުހުންނާއި ޑޮކްޓަރުން މަދުވެގެން ދަތިވާ ހިސާބަށް ގޮސްފައިވާކަމަށްވެސް އޭނާ ވިދާޅުވިއެވެ. އަދި ސިއްހީ ދާއިރާގައި ތިބި މުވައްޒަފުން ވަރަށް ބޮޑަށް ވަރުބަލިވެފައި ކަމަށާއި ބައެއް މީހުން ބައްޔަށް ޕޮޒިޓިވްވެފައިވާ ކަމަށްވެސް އޭނާ ވިދާޅުވިއެވެ.
"މިހާރުވެސް އަޅުގަނޑުމެންނަށް ވަރަށް ބޮޑަށް ދަތިކަން އެބަ ލިބޭ ނަރުހުންނާއި ޑޮކްޓަރުންނާއި މަދުވެގެން. އަޅުގަނޑުމެން ބޭނުންވާ ވަރަކަށް އަޅުގަނޑުމެންނަކަށް އެ ބޭފުޅުންނަށް ކެއާ ނުދެވިދާނެ،" ޑރ. ލަތީފު ވިދާޅުވިއެވެ.