01 Sep 2020, 22:42
ކޮވިޑް-19 އާ ގުޅޭ ގޮތުން އާންމުން ހޭލުންތެރިކޮށް އެ ބަލި ފެތުރުން ހުއްޓުވުމަށް ދިވެހި މީޑިއާތައް އިސް ނަގައިގެން 'ކޮވިޑް ހުއްޓުވާނީ އަހަރެން' ނަމުގައި ކެމްޕެއިނެއް ފަށައިފި އެވެ.
އެ ކެމްޕެއިން ރަސްމީކޮށް ފައްޓަވައި ދެއްވީ ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު އެވެ.
ކެމްޕެއިން ރަސްމީކޮށް އިފްތިތާހު ކޮށްދެއްވައި ދިވެހިރާއްޖޭގެ އަޑުގެ ސެނެކޯ މާލަމްގައި ބޭއްވި ހާއްސަ ރަސްމިއްޔާތެއްގައި، ވީޑިއޯ މެދުވެރިކުރައްވައި ވާހަކަފުޅު ދައްކަވަމުން ރައީސް ވިދާޅުވީ، ވަނީ ނޫސްވެރިން އިސްނަގައިގެން އެފަދަ ކެމްޕެއިން ފެށުމުން ޝުކުރު އަދާކުރައްވައި ތައުރީފް ކުރައްވާފަ އެވެ.
ރައީސް ވިދާޅުވީ، ދިވެހި ނޫސްވެރިންނަކީ ގައުމީ ކަންކަމަށް ވަރަށް ބޮޑަށް އިސްކަންދޭ ބައެއް ކަމަށާއި، ނޫސްވެރިން އެކުގައި، އެއް އަޒުމެއްގައި ކަމެއް ކުރަން ތެދުވެއްޖެނަމަ އެކަމެއް ހާސިލްކުރާނެ ކަމަށެވެ.
ރާއްޖޭގައި ކޮވިޑް-19 އިގެ ކޮމިއުނިޓީ ސްޕްރެޑެއް އޮތް އިރު މިހާތަނަށް ޖުމްލަ 8،003 މީހަކަށް ވަނީ އެ ބަލި ޖެހިފަ އެވެ. މިވަގުތު ވެސް 2،703 މީހުން ބައްޔަށް ފަރުވާ ހޯދަމުން ދާއިރު އެ ބަލީގައި 29 މީހަކު ވަނީ މަރުވެފަ އެވެ.