02 Sep 2020, 07:54
ދިއްލީ/ބީބީސީ (ސެޕްޓެމްބަރު1)-- މިދިޔަ މަހު އިންޑިއާގައި ކޮރޯނާ ވައިރަސް ނުވަތަ ކޮވިޑް-19 އަށް ޕޮޒިޓިވްވި މީހުންގެ އަދަދު ދެ މިލިއަނާ ގާތްކުރާ އަދަދަކަށް އަރައިފި އެވެ.
މިއީ މުޅި ދުނިޔޭގައި ވެސް އެއްމަސްތެރޭ އެންމެ ގިނައިން ކޮވިޑް ފެނުނު ފަހަރެވެ.
މިދިޔަ މަހު އެވްރެޖްކޮށް އިންޑިއާއިން ދުވާލަކު 64،000 ވަރަކަށް ކޮވިޑްގެ ކޭސްތައް ފެނިފައިވެ އެވެ. މިއީ ޖުލައި މަހާ އަޅާ ބަލާއިރު 84 ޕަސެންޓް އިތުރުވުމެވެެ.
ބަލި ޖެހޭ މީހުންގެ އަދަދު އިތުރުވި އިރު އިންޑިއާ އިން މިފަހުން ވަނީ ކޮވިޑަށް ޓެސްޓްކުރާ މިންވަރު ވެސް ވަރަށް ބޮޑަށް އިތުރުކޮށްފަ އެވެ. ނަމަވެސް އަދިވެސް ޓެސްޓިން ކެޕޭސިޓީ ވަރަށް ދަށެެވެ. އެގޮތުން ޓެސްޓިން ކެޕޭސިޓީ ހުރީ ކޮންމެ މިލިއަން މީހަކަށް 32،000 ޓެސްޓް ހެދޭ ވަރަށެވެ.
މިފަހުން އިންޑިއާގައި ކޮވިޑްގެ އާ ކޭސްތައް ފެންނަލެއް ހަތަރު ސްޓޭޓެއްގައި ވަނީ އިތުރުވެފަ އެވެ. އޭގެ ތެރޭގައި އުއްތަރު ޕްރެދޭޝް، ޝަޓިސްގަރު، އޮރިއްސާ އަދި ޖަރުކަންދު ހިމެނެ އެވެ. އެ ސްޓޭޓްތަކަށް މިހާރު ވަނީ މެޑިކަލް ޓީމްތައްވެސް ފޮނުވައިފަ އެވެ.
އިންޑިއާއިން އެންމެ ގިނައިން ކޮވިޑްގެ ކޭސްތައް ފެނިފައި ވަނީ މަހާރަޝްތާ ސްޓޭޓުންނެވެ. އެ ސްޓޭޓުން ވަނީ ކޮވިޑްގެ 800،000 ވަވަރަކަށް ކޭސް މިހާތަނަށް ފެނިފަ އެވެ.
ކޮވިޑް ޖެހިގެން އިންޑިއާއިން މިދިޔަ މަހު ވަނީ 28،000 މީހުން މަރުވެފަ އެވެ.
އިންޑިއާ އިން ޖުމްލަ 3.6 މިލިއަނެއްހާ މީހުންނަށް ކޮވިޑް ޖެހިފައިވާ އިރު މިއީ މުޅި ދުނިޔޭގައި ވެސް ތިން ވަނައަށް އެންމެ ގިނައިން ބަލި ފެނުނު ގައުމެެވެ.