10 Nov 2020, 21:46
މަދުވެގެން 250،000 ޑޮލަރު އިންވެސްޓް ކުރާ ބޭރުގެ ފަރާތްތަކަށް ކޯޕަރޭޓް ރެސިންޓް ވިސާ ދޭ ގޮތަަށް އިމިގްރޭޝަން ގާނޫނަށް ގެނައި އިސްލާހު ބަލައިނުގަންނަ ކަމަށް އިދިކޮޅު ކޯލިޝަނުން ބުނެފިއެވެ.
މަދުވެގެން 50 މިލިއަން ޑޮލަރު އިންވެސްޓް ކުރާ ފަރާތްތަކަށް ކޯޕަރޭޓް ރެސިޑެންޓް ވިސާ ދޭގޮތަށް އޮތް އޮތުން ބަދަލުކޮށް، ރާއްޖޭގައި 250،000 ޑޮލަރު އިންވެސްޓްކުރާ ބިދޭސީންނަށް ރެސިޑެންޓް ވިސާ ލިބޭ ގޮތަށް އިމިގްރޭޝަން ގާނޫނަށް ގެނައި އިސްލާހު މަޖިލީހުން ވަނީ ފާސްކޮށްފައެވެ.
އެ ބިލު މަޖިލީހުން އިއްޔެ ފާސް ކުރީ 53 ވޯޓުންނެވެ. ވަކި ގޮތަކަށް ވޯޓު ނުދެއްވާ ތިން މެމްބަރުން ތިއްބެވި އެވެ.
އެ އިސްލާހާ ގުޅިގެން ޕްރޮގްރެސިވް ކޮންގްރެސް ކޯލިޝަނުން މިއަދު ނެރުނު ބަޔާނެއްގައި ބުނީ ރާއްޖޭގައި 250،000 ޑޮލަރު އިންވެސްޓްކުރާ ބިދޭސީންނަށް ރެސިޑެންޓް ވިސާ ލިބޭ ގޮތަށް އިމިގްރޭޝަން ގާނޫނަށް ރައްޔިތުންގެ މަޖިލީހުން އިއްޔެ ގެނައި އިސްލާހު އެ ކޯލިޝަނުން ބަލައިނުގަންނަ ކަމަށެވެ.
އެއީ އިސްލާހުގެ ސަބަބުން ގައުމުގެ ހަމަޖެހުމަށާއި މިނިވަން ކަމާއި އިސްތިގްލާލަށް ނޭދެވޭ އަސަރުތަކެއް ކުރާނެތީ ކަމަށް ބަޔާނުގައި ބުނެފައިވެއެވެ.
ހަމައެއާއެކު ރާއްޖޭގެ ވިޔަފާރިތަކަށް އިތުރު ގެއްލުންތައް ކުރިމަތިވެ، ދިވެހި ރައްޔިތުންގެ ދިރިއުޅުމަށްވެސް އޭގެ ސަބަބުން އެތައް ނުރައްކާތަކެއް ކުރިމަތިވެގެން ދާނެ ކަމަށް ގަބޫލުކުރެވޭ ކަމަށް އެ ކޯލިޝަނުން ބުންޏެވެ.
ނަމަވެސް މިފަދަ ގޮތަކަށް ރާއްޖޭގައި ވަޒަންވެރިވެ ހުރުމުގެ މަދަނީ ހުއްދަ ދޫކުރާ ގޮތަށް އިމިގްރޭޝަން ގާނޫނަށް ގެނައި އިސްލާހުގެ ސަބަބުން އެންމެ ބޮޑު ކަންބޮޑުވަނީ، ކައިރި ގައުމުތަކުން އަގުހެޔޮ ލޭބަރުން އިތުރުވެ، އެމީހުން ގެސްޓް ހައުސްއާއި އެހެނިހެން ވިޔަފާރީގެ ކޮންޓްރޯލް ނެގުމާއި ރާއްޖޭގެ އާބާދީގެ ތެރޭގައި ދިވެހިންގެ ގޮތުގައި މަޑު މަޑުން ބަލައިގަންނަން ފެށުން ކަމަށް އެ ކޯލިޝަނުން ބުންޏެވެ.
ހަމައެއާއެކު އެ އިސްލާހު ފާސް ކުރުމުގައި، ސަރުކާރާއި ސަރުކާރު ހިމެނޭ ކޯލިޝަންގެ ޖުމްހޫރީ ޕާޓީ އާއި އެމްއާރްއެމް އަދި އަދާލަތު ޕާޓީން ހަނު ތިބެގެން ކުރާ މަސައްކަތް ވެސް އިދިކޮޅުން ވަނީ ކުށްވެރިކޮށްފައެވެ.
މަޖިލީހުން ފާސްކުރީ ބިދޭސީންނަށް ރާއްޖޭގައި ހުރެވޭނެ ހުއްދައެއްގެ ގޮތުގައި ކޯޕަރޭޓް ރެސިޑެންޓް ވިސާ ދެވޭނީ، މަދުވެގެން 250،000 ރުފިޔާ އިންވެސްޓް ކުރުމާއެކު، ރާއްޖޭގެ ބޭންކެއްގައި މަދުވެގެން 250،000 ޑޮލަރު ފަސް އަހަރުގެ މުއްދަކަށް ފިކްސްޑް ޑިޕޮސިޓް އެކައުންޓެއްގައި ބަހައްޓައިގެންނެވެ.
އިންވެސްޓް ކުރަންވާނީ، ސަރުކާރުން ކަނޑައަޅާ އުސޫލެއްގެ މަތިން ސަރުކާރުން ކަނޑައަޅާ ވިޔަފާރިތަކަށް ކަމަށްވެސް ކޮމިޓީން ފާސްކޮށްފައިވާ އިސްލާހުތަކުގައި ބުނެފަ އެވެ.
އޭގެ އިތުރުން އެ ހާލަތްތައް ދެމިއޮތްނަމަ، އެފަރާތަކަށް ދޫކުރާ ކޯޕަރޭޓް ރެސިޑެޓް ވިސާ ކޮންމެ ފަސް އަހަރަކުން އާ ކުރަން ޖެހޭނެ ކަމަށް ކޮމިޓީން ވަނީ ފާސްކޮށްފަ އެވެ. ފުރަތަމަ ހުށަހަޅާއިރު، ލިބޭނީ އެއް އަހަރު ދުވަހުގެ މުއްދަތަކަށެވެ.
އިސްލާހުތަކުގައި ބުނާގޮތުން، ކޯޕަރޭޓް ރެސިޑެންޓް ވިސާއަކީ، ރަޖިސްޓްރާ އޮފް ބިޒްނަސް ކަނޑައަޅާ ގޮތެއްގެ މަތިން ރާއްޖޭގައި ރަޖިސްޓްރީކޮށްގެން ހިންގާ ފޮރިން އިންވެސްޓްމަންޓެއްގެ ހިއްސާދާރެއް ނުވަތަ ޑިރެކްޓަރެއް ނުވަތަ ޕާޓްނަރެއް ނުވަތަ އެނޫންވެސް އިސްފަރާތެއް، އަދި އެއިން ފަރާތެއްގެ އާއިލާ މެންމަބަރެއް، ރާއްޖޭގައި ވަޒީފާއަދާކުރާ މީހެއްގެ ގޮތުގައި ނޫން ގޮތަކަށް، އެ ފޮރިން އިންވެސްޓްމަންޓް ނުވަތަ އެ ވިޔަފާރި ހިންގުމުގެ ބޭނުމަށް ދިގު މުއްދަތަކަށް ރާއްޖޭގައި ހުރުމަށް އެދޭ ބިދޭސީނަށް ދެވޭ ހުއްދައެކެވެ.
ބިލު އިސްލާހުވާތާ 14 ދުވަސް ތެރޭ ކޯޕަރޭޓް ރެސިޑެންޓް ވިސާގެ ގަވާއިދު އިސްލާހު ކުރުމަށް އިސްލާހުތަކުގައި ވަނީ ހިމަނާފަ އެވެ.
ކޯޕަރޭޓް ރެސިޑެޓް ވިސާގެ ގަވާއިދު ބުނާ ގޮތުން، މިހާރު ކޯޕަރޭޓް ރެސިޑޭންޓް ވިސާ ދެނީ މަދުވެގެން 50 މިލިއަން ޑޮލަރު އިންވެސްޓް ކުރާ ފަރާތަކަށެވެ. އަދި ވިސާގެ މުއްދަތަކީ އެ އިންވެސްޓުމަންޓުގެ މުއްދަތެވެ. ނުވަތަ އެއް މިލިއަން ޑޯލަރު ރާއްޖޭގެ ބޭންކެއްގައި ދެއަހަރު ދުވަހުގެ މުއްދަތަކަށް ބަހައްޓާ ފަރާތްތަކަށް ފަސް އަހަރު ދުވަހަށް ވިސާ ދިނުމަށް އެ ގަވާއިދުގައި ބަޔާންކޮށްފައިވެ އެވެ.