20 Nov 2020, 10:15
ޑަބްލިން (ނޮވެމްބަރު 20): ރިޕަބްލިކް އޮފް އަޔަލޭންޑުގެ ޑަބްލިން އެއާޕޯޓުގައި ކޮވިޑަށް ޓެސްޓު ކުރަން އެއް ސެންޓަރު ހުޅުވާ، އިތުރު ސެންޓަރެއް ހުޅުވަން ތައްޔާރުވެއްޖެ އެވެ.
ބީބީސީން ރިޕޯޓު ކުރި ގޮތުގައި ޑަބްލިން އެއާޕޯޓުގައި ކޮވިޑަށް ޓެސްޓު ކުރަން އިއްޔެ އެއް ސެންޓަރު ހުޅުވާފައިވާ އިރު، ދެވަނަ ސެންޓަރު ބޭނުން ކުރަން ފަށާނީ ހޯމަ ދުވަހުގަ އެވެ. އަދި އަމިއްލަ ދެ ކުންފުންޏަކުން ހިންގާ އެ ސެންޓަރުތަކުން ޓެސްޓު ހެއްދުމަށް 117 ޑޮލަރާއި 188 ޑޮލަރާ ދެމެދުގެ އަގެއް ނަގާނެ އެވެ.
މީގެ އިތުރުން އޮންލައިންކޮށް ދުރާލާ ބުކްކޮށްގެން ހެދޭ އެ ޓެސްޓުތައް އެއާޕޯޓުން ދަތުރު ނުކުރި ނަމަވެސް ހެއްދޭނެ އެވެ.
ޑަބްލިން އެއާޕޯޓުގައި މިއަދު ހުޅުވި ޓެސްޓިން ސެންޓަރަކީ ކާރުގައި ދަމުން ޓެސްޓު ކުރެވޭ ގޮތަށް ހަދާފައިވާ ޑްރައިވް-ތުރޫ ފެސިލިޓީއެކެވެ. އަދި ދެވަނަ ސެންޓަރު ހުޅުވާނީ އެއާޕޯޓުގެ ދެވަނަ ޓާމިނަލް ކައިރީ ހުންނަ އިމާރާތެއްގަ އެވެ. އެ ދެ ސެންޓަރު ހުޅުވާލަމުން ޑަބްލިން އެއާޕޯޓުން ކޮންމެ ދުވަހަކު 15،000 ޓެސްޓު ހެއްދޭނެ ކަމަށް ބީބީސީގައިވެ އެވެ.
ޑަބްލިން އެއާޕޯޓުގެ މެނޭޖިން ޑިރެކްޓަރު ވިންސެންޓް ހެރިސަން ވިދާޅުވި ގޮތުގައި އެ ސެންޓަރުތައް ހުޅުވުމަކީ ރައްކާތެރިކަމާއެކު ދަތުރު ކުރުމަށް އެޅޭ ވަރަށް މުހިއްމު ފިޔަވަޅެކެވެ. ނަމަވެސް ދަތުރު ކުރާ އިރު އަގުހެޔޮކޮށް ޓެސްޓު ކުރެވޭނެ ނިޒާމެއް ބޭނުންވާ ކަމަށް އޭނާ ވިދާޅުވި އެވެ.
އަޔަލޭންޑުގެ ނޫހެއްގައިވާ ގޮތުން އެގައުމުގެ ހުރިހާ މައި އެއާޕޯޓެއްގައި މިހާރު ވަނީ ކޮވިޑަށް ޓެސްޓު ކުރެވޭ ގޮތް ހަދާފަ އެވެ.