08 Dec 2020, 00:40
މަސްތުވާތަކެތީގެ ވަބާގައި ޖެހޭ ކުޑަކުދިންނާއި އަންހެނުންނަށް ރިހިބިލިޓޭޝަން ސެންޓަރުތައް ގާއިމްކުރަން ޖެހޭކަމަށް ޖެންޑާ މިނިސްޓަރު އައިޝަތު މުހައްމަދު ދީދީ ވިދާޅުވެއްޖެއެވެ.
މަސްތުވާތަކެތީގެ ވަބާގައި ޖެހޭ އަންހެނުންނާއި ކުޑަކުދިންގެ އަދަދު ދަނީ އިތުރުވަމުންދާކަމަށް ޖެންޑާ މިނިސްޓަރު އައިޝަތު މުހައްމަދު ދީދީ ވިދާޅުވެއްޖެއެވެ.
އެމެރިކާގެ ޑިޕާޓްމަންޓް އޮފް ސްޓޭޓް ބިއުރޯ އޮފް އިންޓަނޭޝަނަލް ނާކޮޓިކްސް އެންޑް ލޯ އެންފޯސްމަންޓް އެފެއާޒް އެންޑް ޔުނައިޓެޑް ނޭޝަންސް އޮފީސް ޑްރަގްސް އެންްޑް ކްރައިމްސް އަދި ނޭޝަނަލް ޑްރަގް އޭޖެންސީ ގުޅިގެން މިއަދު ކުރިއަށްގެންދިޔަ ޕްރޮގްރާމްގައި ވާހަކަ ދައްކަވަމުން މިނިސްޓަރު ވިދާޅުވީ މަސްތުވާތަކެތީގެ ވަބާގައި ޖެހޭ އަންހެނުންނާއި ކުޑަކުދިންގެ އަދަދު ދަނީ އިތުރުވަމުންދާކަމަށާއި އެ މައްސަލަތައް ރާއްޖޭގެ އިޖުތިމާއީ މައްސަލަަތަކާ ގުޅިފައިވާ ކަމަށެވެެ. އަދި އެ މައްސަލަަތައް ހައްލުކުރަން މިހާރުވެސް ގިނަ ފިޔަވަޅުތަކެއް އަޅާފައިވާ ކަމަށް އޭނާ ވިދާޅުވިއެވެ.
މިނިސްޓަރު ވިދާޅުވީ އެކަމުގައި އެންމެ ބޮޑަށް އިސްކަން ދޭން ޖެހޭނީ އެފަދަ ފަރާތްތަކަށް ބޭނުންވާ ފަރުވާދީ ރިހިބިލިޓޭޝަނާއި ރީ އިންޓަގްރޭޝަނުގެ ތެރެއިން އަލުން އަނބުރާ މުޖުތަމައުގެ ތެރެއަސް ނެރުމަށް ތަފާތު އެކި ޕްރޮގްރާމްތަކެއް ރާއްޖޭގައި ހުރުމުން ކަމަށެވެ.
މިނިސްޓަރު ވިދާޅުވީ އެ މައްސަލަތައް ހައްލުކުރަން އަޅުގަނޑުމެން މިހާރު ގެންގުޅޭ ވައްޓަފާޅިއަށް ބަދަލުގެންނަން ޖެހޭ ކަމަށެވެ. އެގޮތުން "އެވިޑެންސް ބޭސްޑް"، "ނީޑް ބޭސްޑް" އަދި "ކޮމިއުނިޓީ ބޭސްޑް" އިންޓަވެންޝަން ޕްރޮގްރާމްތަކުގެ މައްޗަށް އަލިއަޅުވާލެއްވިއެވެ. އަދި މަސްތުވާތަކެތި ބޭނުންކުރުމާ ބެހޭ ގައުމީ ސިޔާސަތާއި، ސްޓްރެޓެޖިކް ޕްލޭން އަދި "ކޮސްޓެޑް ވޯކް ޕްލޭން" އެކުލަވާލައި އަންހެނުންނާއި ކުޑަކުދިންނަށް ފަރުވާދޭ ރީހެބް ސެންޓަރުތައް ގާއިމްކުރުމުގެ މުހިންމުކަން މިނިސްޓަރު ފާހަގަކުރެއްވިއެވެ.
ކޮވިޑާގެ ގުޅިގެން ހާއްސަ ރައްކާތެރިކަމާއި އަޅާލުން ބޭނުންވާ ފަރާތްތަކަށް އެހީވުމަށް ހާއްސަ ސަމާލުކަމެއްދިން ކަމަށާއި އެގޮތުން އެފަރާތްތަކުގެ ތެރެއިން އެންމެ ބޮޑަށް ފާހަގަވީ މަސްތުވާތަކެތި ބޭނުންކުރާ މީހުންކަމަށް މިނިސްޓަރު ވިދާޅުވިއެވެ. އަދި އެ މީހުންނަށް ބޭނުންވާ ކާނާއާއި ބޯހިޔާވަހިކަމާއި އަވަސް ފަރުވާގެ ތެރެއިން މެޑިކަލް ޑިޓޮކްސްފިކޭޝަން ދިންކަަން މިނިސްޓަރު ފާހަގަކުރެއްވިއެވެ. މިނިސްޓަރު ވިދާޅުވީ އެ މަސައްކަތުގައި ނެޝެނަލް ޑްރަގް އޭޖެންސީގެ 400 އެއްހާ މުވައްޒަފުން ހަރަކާތްތެރިވި ކަމަށެވެ.