23 Jan 2021, 17:16
ވޮޝިންޓަން (ޖަނަވަރީ 23) : އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ފަހަތުގައި ތިބި ދޮންމީހުންގެ ހަރުކަށި ޖަމާއަތްތަކުގެ އިތުބާރު ޓްރަމްޕަށް ގެއްލި އެޖަމާއަތްތަކުން މިހާރު ޓްރަމްޕް ދޫކޮށްލައިފި ކަމަށް އިނގިރޭސިވިލާތުގެ ނޫހެއްކަމަށްވާ "ދަ ޓައިމްސް" އިން ބުނެފިއެވެ.
"ދަ ޓައިމްސް" ބުނާގޮތުން ދޮންމީހުންނަކީ އެހެން ނަސްލުތަކުގެ މީހުންނަށްވުރެ މާމަތިވެރި ބައެއްކަމަށް ދެކޭ އެމެރިކާގެ ވައިޓް ސްޕްރެމަސީ ފިކުރުގެ ހަރުކަށި ޖަމާއަތްތަކުން ޓްރަމްޕް ދޫކޮށްލީ ޓްރަމްޕަކީ އެޖަމާއަތްތައް އެދޭފަދަ ބަދަލުތައް އެމެރިކާއަށް ގެނެވޭވަރުގެ ހިތްވަރާއި ފަންވަރު ނެތް ފިނޑި ލީޑަރެއްކަން އެފަރާތްތަކަށް ގަބޫލުކުރެވިގެންނެވެ.
ޓްރަމްޕް
އެމެރިކާގެ ވައިޓް ސްޕްރެމަސީ ފިކުރުގެ ހަރުކަށި ޖަމާއަތްތަކުގެ ތެރޭގައި "ޕްރަވްޑް ބޯއީސް" އާއި "ކިޔު އެނޮން" އަދި "އެމެރިކާ ފަސްޓް" ފަދަ ޖަމާއަތްތައް ހިމެނެއެވެ. މީގެތެރެއިން "ޕްރަވްޑް ބޯއީސް" އަކީ ހަތިޔާރު ހިފައިގެން އެމެރިކާގެ ޖަންގަލިތަކުގައި އަސްކަރީ ތަމްރީންތައްވެސް ކުރިޔަށް ގެންގޮސް އެޖަމާއަތުގެ މެންބަރުންނަށް ތަޅާފޮޅުމުގެ ތަމްރީންތައް ދެމެންގެންދާ ޖަމާއަތެކެވެ.
އެމެރިކާގެ ކޮންކޯޑިއާ ޔުނިވާސިޓީގައި ހަރުކަށި ޖަމާއަތްތަކާބެހޭ ދިރާސާތައް ކުރައްވާ ބޭފުޅެއްކަމަށްވާ އެންޑްރޭ އާޖެންޓީނޯ ވިދާޅުވާގޮތުގައި މިމަހުގެ 6 ވަނަ ދުވަހު ޓްރަމްޕަށް ސަޕޯޓްކުރާ މިޖަމާއަތްތަކުގެ މެންބަރުން އެމެރިކާގެ ކޮންގްރެސް އިމާރާތްކަމަށްވާ ކެޕިޓޯލް އަށް އަރައިގަނެ އެތަން ލޫޓުވާލީ ކޮންގްރެސްގެ ބައެއް މެންބަރުން އަވަހާރަކޮށް ވެރިކަމުގެ ހުވާކުރުމުގެ ފުރުސަތު ބައިޑެންއަށް ގެއްލޭގޮތަށް އެމެރިކާއަށް އިންގިލާބެއް ގެނަސް ޓްރަމްޕްގެ ކޮންޓްރޯލްގެ ދަށުގައި އެމެރިކާގެ ވެރިކަން ބޭއްވުމުގެ ރޭވުމުގެ ދަށުންނެވެ.
ނަމަވެސް އެކަން ކާމިޔާބުނުވުމާއެކު ސޯޝަލް މީޑީއާގެ ޕްލެޓްފޯމްތަކުން ޓްރަމްޕް އެއްފަރާތްކޮށް އެމެރިކާގެ ޑީޕްސެޓޭޓްގައި ހިމެނޭ ނުފޫޒުގަދަ ކުންފުނިތަކުން ޓްރަމްޕަށާއި އޭނާގެ ރިޕަބްލިކަން ޕާޓީއަށް ކުރި ޕްރެޝަރުތަކާއެކު ޓްރަމްޕް ބަލިކަށިވެ އިންގިލާބީ ޕްލޭންތައް ވިއްސި ވިހާލިވެގެންދިޔައެވެ. އަދި ޕެންޓަގަންއިން އެމެރިކާގެ އެތަށްހާސް ސިފައިން ވޮޝިންޓަނަށްނެރެ ބައިޑެން ރައީސްކަމުގެ ހުވާކުރެއްވުމުގެ ރަސްމިއްޔާތު ކާމިޔާބު ކަމާއެކު ކުރިޔަށް ގެންދިޔުމުން ޓްރަމްޕަކީ އެމީހުންގެ ބޭނުންތައް ފުއްދައިދެވޭ ވަރުގެ ލީޑަރެއްނޫންކަމާއި އެކަންކަމާ ކުރިމަތިލުމުގައި ޓްރަމްޕްގެ ފިނޑިކަން ހަރުކަށި ޖަމާއަތްތަކުގެ ލީޑަރުން ދެކެންފަށާފައިވާ ކަމަށް އެންޑްރޭ އާޖެންޓީނޯ އާ ހަވާލާދީ "ދަ ޓައިމްސް" ބުނެއެވެ.
އެމެރިކާގެ ދޮން ނަސްލުގެ ހަރުކަށި ޖަމާއަތްތައް
އެމެރިކާގެ ދޮންމީހުންގެ ހަރުކަށި ޖަމާއަތްތަކުން އެމެރިކާގައި ދާޚިލީ ހަނގުރާމައެއް ފަށަން މަސައްކަތް ކުރިނަމަވެސް ލީޑަރަކުނެތި ހަރުކަށި ޖަމާއަތްތަކަށް އެމީހުންގެ މަގްސަދުތައް ހާސިލް ނުކުރެވޭނެކަމަށް އެމެރިކާގެ ދިރާސީ މުހައްލިލެއް ކަމަށްވާ އެންޑްރޭ އާޖެންޓީނޯ ވިދާޅުވެއެވެ.
އެމެރިކާގެ ނޫހެއްކަމަށްވާ "ވޮޝިންޓަން ޕޯސްޓް" ބުނާގޮތުން ވެރިކަމުގައި ހުންނެވިއިރު ޓްރަމްޕް ގެ ބާރު ކިތަންމެ ގަދަ ނަމަވެސް ޓްރަމްޕްގެ ވެރިކަން ނިމުމަކަށް އައިސް ސޯޝަލް މީޑއާ ބޭނުންކުރުމުގެ ފުރުސަތުން ޓްރަމްޕް މަހްރޫމް ކޮށްފައިވާތީ ހީކުރެވިފައިޥާ ވަރަށްވުރެ މާއަވަހަށް ޓްރަމްޕްގެ ތަރި އޮއްސިގެންދާނެއެވެ. ޓްރަމްޕަކީ އެމެރިކާގެ ދޮންމީހުންގެ ހަރުކަށި ޖަމާއަތްތަކުން އެމެރިކާއަށް ގެންނަން ބޭނުންވާފަދަ އިންގިލާބީ ބަދަލުތައް ގެނައުމުގެ ރިވޮލިއުޝަނަރީ ހުނަރާއި ލީޑާޝިޕް ހުރި ބޭފުޅެއްނޫންކަމަށާ ޓްރަމްޕަކީ އެއަށްވުރެ މާފިނޑި އަދި މާގިނަ ގޯސްތައް ހައްދަވާ ބޭފުޅެއްކަމަށް "ވޮޝިންޓަން ޕޯސްޓް" ގައި އެމެރިކާގެ މުހައްލިލެއް ކަމަށްވާ ހެންރީ އޮލްސެން ލިޔުއްވާފައިވެއެވެ.
ހެންރީ ލިޔުއްވާފައިޥާ ގޮތުގައި ރިޕަބްލިކަން ޕާޓީ މިހާރުވަނީ ދެބައަށް ބެހިފައެވެ. އެއްބަޔަކީ ދޮންމީހުންގެ ހަރުކަށި ޖަމާއަތްތަކުގެ މީހުންނާއި އެޖަމާއަތްތަކަށް ތާއީދުކުރާ ވައިޓް ސްޕްރެމަސީ ފިކުރުގެ މީހުންނެވެ. ޓްރަމްޕަކީ ވައިޓް ސްޕްރެމަސީ ފިކުރުގެ މީހުންގެ މަގްސަދުތައް ހާސިލްކޮށްދެވޭ ވަރުގެ ލީޑަރެއްގެ ގޮތުގައި ނުފެންނާތީ ދެން އެމީހުން މަސައްކަތްކުރާނީ އެމީހުންގެ ވިސްނުމުގެ އެހެން ލީޑަރަކު ހޯދުމަށް ކަމަށާ މިހާލަތުގައިވެސް ރިޕަބްލިކަން ޕާޓީ ދާނީ ބައިބައިވެގެންކަމަށް ހެންރީ ދެކެވަޑައިގަންނަވައެވެ. (ދަ ޓައިމްސް+ ވޮޝިންޓަން ޕޯސްޓް)