27 Jan 2021, 13:10
މިއަދު ފަށައި ދިރާގު ދިވެހި ޕްރިމިއާ ލީގުގެ ދެވަނަ ބުރުގައި ޓީމުތަކުން އެންމެ އިސްކަމެއް ދޭނީ އެ ޓީމެއްގެ ބައިކޮޅަށް ގޯލުތަކެއް ވަދުނަ ނުދޭން ކަމަށާއި އެއްވެސް މެޗަކުން ބަލިވެއްޖެ ނަމަ ދެން އޮތް ޓީމުތަކުން އޭގެ ފައިދާ ފަސޭހައިން ނަގާނެ ކަމަށް ވެލެންސިއާގެ ކޯޗު މުހައްމަދު އާތިފް (އާތީ) ބުނެފި އެވެ.
މިދިޔަ ސީޒަނުގައި ދެވަނަ ޑިވިޝަންގެ ޗެމްޕިއަންކަން ހޯދައިގެން ފުރަތަމަ ޑިވިޝަނުގެ ޖާގަ ހޯދި ވެލެންސިއާއިން މިފަހަރުގެ ފުރަތަމަ ބުރު ނިންމާލީ ލީގުގެ ދެވަނައިގައި އޮވެގެންނެވެ. އަދި މިއަދު އެއްވަނާގައި އޮތް މާޒިޔާއާ ދެކޮޅަށް ނުކުންނަ އިރު، ވެލެންސިއާއަށް ދިމާވެފައިވާ އެންމެ ބޮޑު އެއް މައްސަލައަކީ ކުޅުންތެރިންގެ ފިޓްނަސް މައްސަލަ ކަމަށާއި، އެގޮތުން ޓީމުގެ "މައި ތަނބު"ގެ ގޮތުގައި އާތީ ސިފަ ކުރާ އަލީ އަޝްފާގު (ދަގަނޑޭ) އަދިވެސް މުޅިޔަކުން ފިޓް ނޫން ކަމަށް އާތީ ވަނީ ބުނެފަ އެވެ.
މިއަދުގެ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި އާތީ ބުނީ، ފުރަތަމަ ބުރު ވެލެންސިއާއިން ރަނގަޅު ހިސާބެއްގައި ނިންމާލި ނަމަވެސް ޕޮއިންޓް ޓޭބަލަށް ބަލާއިރު، ޓީމުތަކުގެ އަސްލު ކުޅުމާއި، ފެންވަރު ނޭންގޭ ކަމަށެވެ. އަދި ކައިރި ކައިރީގައި ޓީމުތަށް ލީގު ތާވަލުގައި އޮތުމުން މި ބުުރު ނިމޭ އިރު، އެންމެ ރަނގަޅު ޓީމުތައް ކުރީގައި އޮންނާނެ ކަމަށާއި ވެލެންސިއާ އަކީ އޭގެން ޓީމަކަށް ވާނޭ ކަމަށް އާތީ ބުންޏެވެ.
"ލީގު ނިމޭ އިރު، ނޫނިއްޔާ ދެ ވަނަ ބުރު ނިމޭ އިރު އަސްލު ޕޮއިންޓް ޓޭބަލް ރީތިކޮށް ފެންނަން އިންނާނީ. އެހެންމަ އެބަޖެހޭ ޕޭޝަންޓް ވާން. މެނޭޖްމެންޓުން ވެސް. ސަޕޯޓަރުުން ވެސް އަދި ޕްލޭޔަރުން ވެސް،" އާތީ ބުންޏެވެ.
އާތީ ބުނީ މިއަދުގެ ނަތީޖާ ނުކުންނަ ގޮތަކުން ބަލިވާ ޓީމަށް ބޮޑު އުނދަގުލެއް ކުރިމަތިވާނެ ކަމަށާއި އެހެން ނަމަވެސް ޓީމުގެ ފެންވަރު ހަގީގަތަށް ވަޒަން ކުރެވޭނީ ބުރު ނިމޭ އިރު އޮންނަ ނަތީޖާއިން ކަމަށެވެ.
"ޕޮއިންޓް ޓޭބަލް މިހާރު އިން ގޮތުން އެއްވެސް ޓީމަކަށް އެއްވެސް މެޗަކުން ޕޮއިންޓެއް ގެއްލެން ކަމުދާ ކަހަލަ ގޮތަކަށް ނޫން މިއިނީ. ވަރަށް ޗެލެންޖިން ވަރަށް ކައިރި ކައިރީގައި މީނީ. އެއް މެޗުން މޮޅުވާއިރަށް ދެ ސްޓެޕްވަރު ޖަމްޕް ކުރެވޭ ކަހަލަ ގޮތަކަށް މީނީ. ވެލެންސިއާ މޮޅުވެއްޖިއްޔާ މާޒިޔާއާ އެއްވަރުވީ. މާޒިޔާ މޮޅުވެއްޖިއްޔާ މާޒިޔާ ބޮޑު ލީޑަކަށް ދިޔައީ. ވެލެންސިއާ ބަލިވެފައި ދަ ގްރާންޑޭ މޮޅުވެއްޖިއްޔާ އެ ޓީމު ދެ ވަނަ އަށް ދިޔައީ،"
"މި ފެންނަ އެއްޗަކީ ހަމަ ހުރިހާ ޓީމެއް ވެސް މި ބުރުގައި ނުކުންނާނީ ކޮޅު ފުރަތަމަ ބެލުމަށް ފަހު ދެން ގޯލެއް ޖަހަން. އިންޓަނޭޝަނަލް މެޗުތައް ބަލާ އިރު ވެސް ލީގު މެޗުތައް ވަރަށް އޯޕަންކޮށް ކުޅެފާނެ. އެކަމަކު ގައުމުތައް ވޯލްޑްކަޕް ފަދަ މެޗުތަކަށް އަންނަ އިރު އޯޕަންއެއް ނޫން ކަންނޭންގެ ކުޅޭ އިރު. ވަރަށް ބަލައިގެން ކޮޅު ޑިފެންސްކޮށްފައި ޖަހަން އަންނަނީ." އާތީ ބުންޏެވެ.