04 Feb 2021, 20:35
މިއަހަރުގެ މެއި/ޖޫންގައި އޭއެސް/އޭލެވެލް އިމްތިހާނު ނުބާއްވަން ނިންމައިފިއެވެ.
އެޑިއުކޭޝަން މިނިސްޓްރީ އިން ބުނީ އިމްތިހާނު ނުބާއްވަން ނިންމީ ކޮވިޑް19ގެ ހާލަތަށް ރިއާޔަތްކޮށް އިނގިރޭސިވިލާތުގެ ޕިއާސަން އިން ކަމަށެވެ.
މިނިސްޓްރީ އިން ބުނީ ތާވަލު ކޮށްފައިވާގޮތަށް އޭލެވެލް އިމްތިހާނު މެއި/ ޖޫންގައި ކުރިއަށް ނުގެންދިޔަ ނަމަވެސް އޭއެސް/އޭލެވެލް އިމްތިހާނުތަކުގައި ބައިވެރިވާ ދަރިވަރުންގެ ފެންވަރު ވަޒަން ކުރުމާއި ސެޓްފިކެޓު ދިނުމުގެ ކަންތައް ކުރިއަށް ގެންދާނެގޮތެއް މިމަހގުގެ 22 ގައި އިނގިރޭސިވިލާތުގެ "އޮފްކޮލް" އިން އިއުލާނު ކުރާނެ ކަމަށެވެ.
މީގެ އިތުރުން މިނިސްޓްރީ އިން ބުނީ އޮކްޓޯބަރު/ނޮވެމްބަރުގައި ބާއްވާ އޭއެސް/އޭލެވެލް އިމްތިހާނު ތަވަލު ކުރެވިފައިވާ ގޮތަށް ކުރިއަށް ދާނެ ކަމަށެވެ. އަދި އިމްތިހާނަށް ތައްޔާރުވުމަށް ކުރާ މަސައްކަތް ހުއްޓާނުލާ ކުރިއަށް ގެންދަން މިނިސްޓްރީ އިން ވަނީ ދަރިވަރުންގެ ކިބައިން އެދިފައެވެ.
ކޮވިޑުގެ ހާލަތާ ގުޅިގެން މިދިޔަ 2020 ވަނަ އަހަރުގެ މެއި/ޖޫން އޭލެވެލް އިމްތިހާނު ވެސް ބާއްވައިފައެއް ނުވެއެވެ. އެ އިމްތިހާނު ކުރިއަށް ގެންދިޔައީ އޮކްޓޯބަރު/ނޮވެމްބަރުގައެވެ.
މިނިސްޓްރީ އިން ބުނީ ރާއްޖެއިން އެއެސް/އޭލެވެލް އިމްތިހާނުގައި ބައިވެރިވާ ކުދިންގެ އެސެސްމެންޓު ކުރިއަށް ގެންދާނެ ގޮތެއް އޮތްތޯ ބެލުމަށް އެޑެކްސެލްއާއެކު މަޝްވަރާ ކުރަމުންދާ ކަމަށެވެ. އެ މަޝްވަރާތަކުގައި ދަރިވަރުންނާއި ސްކޫލުތަކުގެ އަދި ބެލެނިވެރިންގެ ހިޔާލުވެސް ހޯދާނެ ކަމަށް ބުންޏެވެ.