10 Feb 2021, 00:23
މާލޭ ސިޓީގައި ދިރިއުޅޭ އުމުރުން 45 އަހަރުން މަތީގެ މީހުންނަށް މިއަދު ކޮވިޑް ވެކްސިން ދޭން ފަށާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
އެޗްޕީއޭއިން ބުނީ މިއަދުން ފެށިގެން 55-45 އަހަރާ ދެމެދުގެ މީހުންގެ ތެރެއިން ހައިރިސްކު ގްރޫޕުގެ މީހުންނަށް ވެކްސިން ދޭން ފަށާނެ ކަމަށެވެ.
އެޗްޕީއޭ އިން ބުނީ ވެކްސިން ދޭ ތަންތަނަކީ ސޯޝަލް ސެންޓަރާއި ވިލިމާލެ ޔޫތު ސެންޓަރާއި ހުޅުމާލޭ ފްލޫ ކްލިނިކް ހުރި އިމާރާތް ކަމަށެވެ.
މާލެ އާއި ހުޅުމާލޭގައި ވެކްސިން ދިނުން ކުރިއަށްދާނީ ހެނދުނު 9:00 އިން ހަވީރު 5:00 އަށެވެ. ނަމަވެސް ވިލިމާލޭގައި ވެކްސިން ދިނުން ކުރިއަށް ދާނީ ހެނދުނު 9:00 އިން މެންދުރު 13:00 އަށެވެ.
މާދަމާ އިން ފެށިގެން ކޮންމެ ދުވަހަކު އެ ތަންތަނުން ވެކްސިން ދޭނެ އެވެ.
އުމުރުން 45 އަހަރުން މަތީގެ މީހުން ވެކްސިން ދިނުމަށް ރަޖިސްޓްރީ ކުރުމުގައި ވެކްސިން ސެންޓަރަށް ދިޔުމުން އެހީތެރިކަން ފޯރުކޮށްދޭނެ ކަމަށް ވެސް އެޗްޕީއޭ އިން ބުންޏެވެ.
ވެކްސިން ޖަހަންދާއިރު މިކަންކަމަށް ސަމާލުވާތި
އައިޑީކާޑް ނުވަތަ ޕާސްޕޯޓް ގެންދިޔުން
- ބަލީގެ އެއްވެސް އަލާމާތެއް ނެތުން އަދި ކަރަންޓީނުގައި ހުރި މީހަކަށް ނުވުން
- ގަޔަށް ދޫ، ފަސޭހައިން ކޮނޑު ދެއްކޭނެ ހެދުމެއް ލުން
- ވެކްސިން ޖަހަންދާއިރު ރަނގަޅަށް ކައިގެން ހުރުން
- ވެކްސިން ޖަހަންދާއިރު އަމިއްލަ ފެންފުޅިއެއް ގެންދިޔުން
- ވެކްސިން ޖަހަންދާއިރު، އެކުގައި ގެންދެވޭނީ އެންމެ މީހެއް
- ބޭނުންކުރަމުންދާ ބޭހެއް ވާނަމަ ބޭހުގެ މައުލޫމާތު ގެންދިޔުން
މިހާތަނަށް ރާއްހޭގައި 16،000އަށްވުރެ ގިނަ މީހުން ވަނީ ވެކްސިން ޖަހާފައެވެ.