11 Feb 2021, 08:55
ބޮލީވުޑްގެ ފިލްމުތަކުންނާއި ޓީވީ ސީރީޒްތަކުން ފެންނަ ކުޅަދާނަ ބަތަލާ އަނީތާ ހަސަނަންދާނީ ވިހައިފިއެވެ.
މީގެ ހަތަރު މަހެއްހާ ދުވަސްކުރިން އޭނާ އަލަތު ދަރިފުޅަށް ބަލިވެ އިންކަން ހާމަކުރިއިރު އޭނާ ވިހާފައިވަނީ އަންގާރަ ދުވަހުއެވެ. ބަތަލާ ވިހޭކަން އާންމުކުރަމުން އިންސްޓަގްރާމްގައި އޭނާގެ ފިރިމީހާ ރޯހިތު ރެޑީ ހިއްސާކުރި ޕޯސްޓެއްގައި ބުނީ އޭނާއަށް ލިބުނީ ފިރިހެން ކުއްޖެއް ކަމަށެވެ.
ރޯހިތު އެ ޕޯސްޓް ހިއްސާކުރުމާއެކު ގިނަ ތަރިންނާ އެކުވެރި ގާތް މީހުން އަންނަނީ ދެމަފިރިންނަށް މަރުހަބާކިޔަމުންނެވެ. ބެލެވޭގޮތުގައި މި ދަރިފުޅަށް އަނީތާ ކިޔާނީ ރަވީއެވެ. ސަބަބަކީ ބަނޑުބޮޑުއިރު އަނީތާ ބުނީ ފިރިހެން ކުއްޖެއް ލިބިއްޖެނަމަ އެ ދަރިފުޅަށް އޭނާ ކިޔާނީ ބަފާބެ ރަވީގެ ނަންކަމަށެވެ.
ސްޓާޕްލަސް އިން ކުރިން ދެއްކި ހިންދީ ޑްރާމާ "ޔޭ ހޭ މޮހޮއްބަތައިން"ގެ ޝަގުން ރޯލު ކުޅެގެން އާންމުންގެ ލޯބި ހޯދާފައިވާ އަނީތާ އާއި އޭނާގެ ފިރިމީހާ ރޯހިތު ރެޑީ ގެ ކައިވެންޏަށް ހަތް އަހަރު ފަހުން އަލަތު ދަރިފުޅު ލިބުނުއިރު ދެމަފިރިންވެސް ތިބީ ވަރަށް އުފަލުންނެވެ.
އިންޑިއާގެ އެންމެ މަޝްހޫރު ޑާންސް ޝޯ ނަޗް ބަލިޔޭ ގެ ނުވަ ވަނަ ސީޒަނުގައި ބައިވެރިވި ދެތަރިން ވަނީ އެއިން ދެވަނަ ހޯދާފަ އެވެ.