03 Mar 2021, 10:47
އެންމެ ފަހުން ކުޅުނު 20 މެޗުން ވެސް ސައްތައިން ސައްތަ ރެކޯޑަކާ އެކު އައި މެންޗެސްޓާ ސިޓީއިން ވާދަވެރި ވޮލްވާހަމްޓޮން ފަސޭހަކަމާ އެކު ބަލިކޮށް އެ ޓީމުން ދަމަހައްޓަމުން އަންނަ ރެކޯޑަށް 21 މެޗު އިތުރު ކޮށްފި އެވެ.
ސިޓީގެ އިއްތިހާދު ސްޓޭޑިއަމުގައި ރޭ ވުލްވްސް އަތުން އެ ޓީމު ކުރި ހޯދީ 1-4 ގެ ތަފާތު ބޮޑު ނަތީޖާއަކުންނެވެ. މި މެޗުން ލިބުނު މޮޅާ އެކު ދެވަނަައިގައި އޮތް މެންޗެސްޓާ ޔުނައިޓެޑާ ދެމެދު ސިޓީން 15 ޕޮއިންޓްގެ ލީޑެއް ގާއިމު ކުރި އިރު، ސިޓީ އެއްވަނައިގައި އޮތީ 65 ޕޮއިންޓް ހޯދައިގެންނެވެ. ޔުނައިޓެޑަށް 50 ޕޮއިންޓް ލިބިފައިވާ އިރު، ތިންވަނައިގައި އޮތް ލެސްޓާ ސިޓީއަށް ލިބިފައިވަނީ 49 ޕޮއިންޓް އެވެ.
މިވަގުތު ޔޫރޮޕުގައި އެންމެ ފޯމު ރަނގަޅުކޮށް އޮތް ސިޓީއިން ރޭގެ މެޗުގެ 15 މިނަޓުގައި ވަނީ ލީޑު ނަގައިފަ އެވެ. ވުލްވްސްގެ ލެންޑާ ޑެންޑޮންކާ އަތުން ބައިކޮޅަށް ވަން އެ ގޯލާ އެކު ސިޓީން ނެގި ލީޑު ދެވަނަ ހާފުގެ ކުރީކޮޅު ވަނީ ގެއްލިފަ އެވެ. ވުލްވްސްގެ އަރަމުން އަންނަ ކުޅުންތެރިޔާ ކޯނޯ ކޯޑީ އެ ޓީމަށް ޖަހައިދިން ގޯލާ އެކު ސިޓީއަށް ސިހުމެއް ގެނުވި ނަމަވެސް އެ ޓީމުން ވަނީ ޓީމު ކުރިއަށް ޖައްސައިގެން ކުޅެ، މާ ގިނައިރުތަކެއް ނުވަނީސް ލީޑު އަނބުރާ ނަގައިފަ އެވެ.
އެގޮތުން 80 ވަނަ މިނަޓުގައި ގެބްރިއަލް ޖީސުސް އެ ޓީމަށް ދެވަނަ ފަހަރަށް ލީޑު ނަގައިދިން އިރު، އޭގެ އިރަކޮޅެއް ފަހުން ރިޔާދު މަހްރޭޒް ވަނީ ލީޑު އިތުރަށް ފުޅާ ކޮށްފަ އެވެ. ސިޓީން އެވަރުން ވެސް ނުހުއްޓާ ކުޅެ، މެޗު ނިމެންދަނިކޮށް ވަނީ ހަތަރު ވަނަ ގޯލެއް ވެސް ޖަހައިފަ އެވެ. އެ ގޯލު އެ ޓީމަށް ޖަހައިދިނީ ޖީސުސް އެވެ.
ރޭގެ މެޗުގެ ނަތީޖާއާ އެކު ސިޓީ ބާކީ ހުރިހާ މެޗަކުން ބަލިވެގެން ވެސް ރެލިގޭޓް ނުވާނެ ކަން ޔަގީންވި އިރު، އެ ޓީމު ވަނީ އެހެން ރެކޯޑެއް ވެސް ދަމަހައްޓައިފަ އެވެ. އެންމެ ފަހުން ކުޅުނު 21 މެޗުން މޮޅުވެގެން އެ ޓީމުން އިނގިރޭސި ރެކޯޑް އައު ކުރި އިރު، މީގެ ކުރިން މުޅި ޔޫރޮޕުގައި ވެސް އެކަން ކުރެވިފައި ވަނީ އިތުރު ދެ ކުލަބަކަށެވެ. އެއީ މިދިޔަ އަހަރުގެ ސީޒަނުގައި ބަޔާން މިއުނިކުން ދަމަހެއްޓި ރެކޯޑާއި 2014 ވަނަ އަހަރު ރެއާލް މެޑްރިޑް ހޯދި މޮޅުތަކެވެ.