25 Mar 2021, 09:22
ގާހިރާ (މާޗް 25) : މޫސުން ގޯސްވި ދަނޑިވަޅެއްގައި ބޮޑު ކޮންޓެއިނާ ބޯޓެއް ހުރަސްވެ އެބޯޓު ބީހުމުގެ ސަބަބުން މިސްރުގެ ސުވޭސް ކެނަލް ބަންދުވެފައިވާ މައްސަލަ ހައްލުކުރުމަށް ބޮޑެތި މަސައްކަތްތަކެއް ކުރަމުން ގެންދާކަމަށް ސުއޭސް ކެނަލް ކުންފުނިން ބުނެފި އެވެ.
އެކުންފުނީގެ ފަރާތުން ވާހަކަ ދެއްކެވި ތަރުޖަމާނަކު ވިދާޅުވި ގޮތުގައި ހުރަސްވި ބޯޓު ބޮޑުދިޔާގައި ފުންކުރަން ކުރި މަސައްކަތް ވެސް ކާމިޔާބު ނުވުމުން މިހާރު މަސައްކަތްކުރަނީ ހުރަސްވި ބޯޓުގައިވާ ބައެއް ކޮންޓޭނަރުތައް މަދުކުކޮށްގެން ބޯޓު ލުއިކުރުމަށެވެ. ބޮޑެތި ބޯޓުތައް ބީހުގެ ދެތިން މައްސަލަ ކޮންމެ އަހަރަކު ވެސް ސްވޭސް ކެނެލްއަށް ދިމާވާކަމަށާއި ނަމަވެސް މިފަހަރު މިދިމާވިގޮތަށް ބޯޓު ފުންކުރުން މިހާބޮޑަށް ލަސްވެގެން ނުދާކަމަށް ނަންހާމަކުރަން ނޭދޭ ތަރުޖަމާނު ވިދާޅުވި އެވެ.
ސްވޭސް ކެނަލްގައި ބޯޓު ބީހުމުގެ ސަބަބުން އެކެނެލްގައި ހުރަސްވެފައި ވަނީ 400 މީޓަރުގެ ދިގު އަދި 59 މީޓަރުގެ ފުޅާ ކޮންޓޭނަރު ބޯޓެކެވެ. ޕެނަމާގައި ރަޖިސްޓްރީކޮށްފައިވާ އެވާގްރީން ނަމަކަށް ކިޔަ އެބޯޓު ދަތުރު ކުރަމުން ދިޔައީ ސްވޭސްކެނެލް ހުރަސްކޮށް ނެދަލޭންޑްސްގެ ރޮޓަޑަމް ބަނދަރަށެވެ. އެ ބޯޓު ފުން ކުރުމަށްޓަކައި ހަތަރު ޓަގު ބޯޓު ބޭނުންކުރިނަމަވެސް އެބޯޓުން ބައެއް ކޮންޓޭނަރުތައް ބާލައި ބޯޓު ލުއިކޮށްގެންނޫނީ ފުން ނުކުރެވޭނެކަން މިހާރު ޔަގީންވެފައިވާ އިރު އެކަމަށް ހަފްތާއެއްވަރު ހޭދަވާނެ ކަމަށް ވަނީ ބެލެވިފަ އެވެ. ބީހުނު ބޯޓު ބީހި އަދި ހުރަސްވީ އެސަރަހައްދަށް އައި ހިރަފަހުގެ ތޫފާނެއްގެ ގަދަވަޔާއެކު ކެޕްޓަން އަށް ބޯޓުގެ ކޮންޓްރޯލް ނުކުރެވިގެންނެވެ.
ސްވޭސް ކެނެލްގައި ބީހިފައިވާ ކޮންޓޭނަރު ބޯޓު
ދެހާސް ފަނަރަ ވަނަ އަހަރު މިސްރުން ވަނީ ސްވޭސް ކެނެލް ތަރައްގީ ކުރުމުގެ މަޝްރޫއުގެ ދަށުން އެކެނެލް އިތުރަށް ފުޅާކޮށް ފުންކުރުމުގެ ބޮޑު މަޝްރޫއެއް ހިންގައިފަ އެވެ. އެވާގްރީން ބޯޓު އުރުނީ ނުވަތަ ބީހުނީ އަލަށް ފުންކުރި ސަރައްދުގައި ބޯޓުގެ ބޮޑުބައި ވަނިކޮށެވެ. އެހެންކަމުން އަލަށް ފުންކުރި ސަރަހައްދު ސްވޭސް ކެނެލްގައި އެންމެ ކުރީގައި އޮތް ފުން ސަރަހައްދާ އެއްވަރަށް ފުން ނޫންކަމާއި އަލަށް ފުންކުރި ސަރަހައްދުގެ ތިލަކަން ވަނީ ހާމަވެފަ އެވެ.
މި ބޯޓު ސްވޭސް ކެނެލްގައި ހުރަސްވެ ކެނެލް ވަގުތީ ގޮތުން ބަންދުވެފައިވީ ނަމަވެސް ކުދި ބޯޓުތަކަށް ސްވޭސް ކެނެލް އިން މިހާރު ވެސް ދަތުރު ކުރެވެ އެވެ. އެހެންކަމުން ސްވޭސް ކެނެލް އެއްކޮށް ބަންދުވެފައިނުވާ ކަމަށް މިސްރުން ބުނެ އެވެ. ސްވޭސް ކެނެލް އަކީ މެޑިޓަރޭނިޔަން ކަނޑުން ރަތްކަނޑަށް ދިޔުމަށް ބޭނުންކުރާ 194 ކިލޯ މީޓަރުގެ ދިގު ކެނެލް އެކެވެ. އެކެނެލް އަކީ މިސްރަށް ބޮޑު އާމްދަނީއެއް ލިބޭތަނެކެވެ. މިދިޔަ އަހަރު ވެސް 19،000 ބޯޓު ހުރަސްކޮށްގެން ސްވޭސް ކެނެލްއަށް 5.61 ބިލިއަން ޑޮލަރުގެ ފައިދާއެއް ލިބިފައިވެ އެވެ.
(ނޫސްއެޖެންސީތައް)