01 Apr 2021, 22:09
ރާއްޖެއިން މިއަދު 300 މީހުން ކޮވިޑަށް ޕޮޒިޓިވްވެއްޖެ އެވެ. އޭގެ ތެރެއިން ގިނަ މީހުން ޕޮޒިޓިވްވެފައިވަނީ އަތޮޅު ތެރެއިންނެވެ.
މިއީ އިއްޔެ ރާއްޖެއިން ޕޮޒިޓިވްވި އަދަދާ އަޅާ ބަލާއިރު، 59 ކޭސްގެ އިތުރުވުމެކެވެ. އަދި މިއީ ފަހުގެ ތާރީހެއްގައި ރާއްޖެއިން އެއް ދުވަސް ތެރޭ އެންމެ ގިނަ އަދަދަކަށް މީހުން ޕޮޒިޓިވްވި ދުވަހެވެ. އިއްޔެ ރާއްޖެއިން ޕޮޒިޓިވްވެފައި ވަނީ، 241 މީހުންނެވެ.
އެޗްޕީއޭއިން މިރޭ އާންމު ކުރި ކޮވިޑް ތަފާސް ހިސާބުތައް ދައްކާ ގޮތުން، ވޭތުވެދިޔަ 24 ގަޑި އިރު ނެގި 3،625 ސާމްޕަލްއިން ގިނަ މީހުން ޕޮޒިޓިވްވެފައިވަނީ ރަށްރަށުންނެވެ. އެގޮތުން ރަށްރަށުން 96 މީހަކު ވަނީ ޕޮޒިޓިވެފައެވެ، އަދި ސިނާއީ މަސައްކަތް ކުރާ ރަށްރަށުން 92 މީހަކު ޕޮޒިޓިވްވިއިރު، މާލޭ ސިޓީން 94 މީހަކު ޕޮޒިޓިވްވެފައިވެ އެވެ. އޭގެ އިތުރުން ދެން ހިމެނެނީ، ރިސޯޓުތަކުން ޕޮޒިޓިވްވި 15 މީހެކެވެ.
މިއަދު ޕޮޒިޓިވްވި މީހުންނާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 24،300އަށް އަރާފައެވެ.
މިއަދު ބަލިން ރަނގަޅުވި މީހުންގެ އަދަދަކީ، 127 އެވެ. އެއާއެކު ޖުމްލަ ބަލިން ރަނގަޅުވި މީހުންގެ ޖުމްލަ އަދަދަކީ، 21،282 އެވެ.
މި ބައްޔަށް ފަރުވާ ހޯދަމުންދާ މީހުންގެ އަދަދަކީ، 3،022 އެވެ. އޭގެ ތެރެއިން 101 މީހަކަށް ފަރުވާ ދެމުން އަންނަނީ ހޮސްޕިޓަލުގައި އެޑްމިޓްކޮށްގެންނެވެ. ކޮވިޑް ޖެހިގެން މަރުވި މީހުންގެ އަދަދަކީ، 67 އެވެ.
އަތޮޅުތެރެއިން ގިނަ ކޭސްތަކެއް ފެނުނު އިރު، މިހާރުވެސް ރާއްޖޭގެ 17 ރަށެށް އޮތީ މޮނީޓަރިންގެ ހާލަތުގައެވެ. އެގޮތުން މިއަދު ދެ ރަށެށް ވަނީ ކޮންޓެެކްޓް ޓްރޭސިން ހެދުމަށް މޮނީޓަރިން ހާލަތަށް ގެނެސްފައެވެ. އެއީ، ޅ. ކުރެއްދޫ ށ. މަރޮށި އެވެ. ކުރެއްދޫ މޮނީޓަރިން ހާލަތަށް ގެނައުމާއެކު، ޅ. އަތޮޅުގެ ފަސް ރަށްވެސް މިހާރު އޮތީ ބަންދުކޮށްފައެވެ.