11 Apr 2021, 10:09
އިއްޔެ ބޭއްވި ލޯކަލް ކައުންސިލް އިންތިހާބުގައި މާލެ ސިޓީގެ މޭޔަރު ކަމަށް އިންތިހާބުވެވަޑައިގެންނެވި އިދިކޮޅުގެ ކެންޑިޑޭޓު، ޑރ. މުހައްމަދު މުއިއްޒަށް އެއްބާރުލުން ދެއްވާނެ ކަމަށް ރައްޔިތުންގެ މަޖިލީހުގެ ރައީސް، އަދި އެމްޑީޕީގެ ރައީސް، މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު މިހެން ވިދާޅުވީ، ޑރ. މުއިއްޒަށް މަރުހަބާ ވިދާޅުވެ، ކުރެއްވި ޓުވީޓެއްގަ އެވެ.
ކައުންސިލް އިންތިހާބު އެމްޑީޕީ ކެންޑިޑޭޓު އަނަސް އަބްދުއްސައްތާރާ ވާދަކޮށް މުއިއްޒު ވަނީ ބޮޑު ތަފާތަކުން ކާމިޔާބުކުރައްވައިފަ އެވެ. މުއިއްޒަށް މަރުހަބާ ވިދާޅުވެ، ރައީސް ނަޝީދު ވިދާޅުވީ މާލޭގެ ކަންކަން ހައްލުކުރުމުގައި މުއިއްޒު ބުރަކޮށް މަސައްކަތް ކުރައްވާނެ ކަމަށް އުންމީދުކުރައްވާ ކަމަށެވެ.
"އަޅުގަނޑުގެ ފަރާތުން މަނިކުފާނަށް ދޭންޖެހޭ އެއްބާރުލުން ދޭނަން،" ރައީސް ނަޝީދު ވިދާޅުވި އެވެ.
ރައީސް ނަޝީދު ވަނީ ކައުންސިލް އިންތިހާބުގައި އެމްޑީޕީ ހޯދި ކާމިޔާބީއަށް ވެސް މަރުހަބާ ވިދާޅުވެފަ އެވެ. އެމަނިކުފާނު ވިދާޅުވީ މާލެ ފިޔަވައި، އެހެން ގިނަ ކައުންސިލްތަކުގެ އަގުލަބިއްޔަތު ހޯދާފައިވާ ކަމަށެވެ.
އިންތިހާބީ މޭޔަރު، މުއިއްޒުގެ ކެމްޕެއިންގެ އެންމެ ބޮޑު ވައުދަކީ މާލޭ ރައްޔިތުނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށް ރައްޔިތުން ގެދޮރުވެރިކުރުމެވެ.
މުއިއްޒު ރޭ ވިދާޅުވީ ސަރުކާރާ ގުޅިގެން މާލޭގެ ރައްޔިތުންގެ ގެދޮރުވެރި މަންޒިލަކަށް ގުޅީފަޅު ހަދައިދޭނެ ކަމަށެވެ. މުއިއްޒު މީގެ ކުރިންވެސް ވިދާޅުވެފައި ވަނީ އޭނާ މަސައްކަތް ކުރައްވާނީ ސަރުކާރާ ގުޅިގެން ކަމަށެވެ. އިންތިހާބުވުމަށް ފަހު އެކަން އަނެއްކާ ވެސް އޭނާ ތަކުރާރު ކުރެއްވި އެވެ.
"ސަރުކާރުން ރައްޔިތުންނާ އެކު މަސައްކަތްކުރާހާ ހިނދަކު، ސަރުކާރާއެކު [އަޅުގަނޑު] މަސައްކަތް ކުރާނީ. ސަރުކާރުން ބޭނުންވާ ކަންކަން އިސްވެ ހާސިލްކުރުމަށް ރައްޔިތުންނަށް ފައިދާވާ ގޮތުގައި ކުރިއަށްދާނީ،" މުއިއްޒު ވިދާޅުވި އެވެ.
އޭނާ ވިދާޅުވީ، ރައްޔިތުންނަށް ފައިދާ ނުވާ ގޮތަށް ސަރުކާރުން ކަންކަން ނުކުރާނަމަ، އެކަން ރައްޔިތުންގެ ފަރާތުން ހުށަހަޅައި، އެކަން ބަދަލު ކުރަން މަސައްކަތް ކުރާނެ ކަމަށެވެ.
މުއިއްޒު ވިދާޅުވީ، އިންތިހާބުގައި މާލެ ސީޓީއަށް ޕީޕީއެމް އަދި އެހެން ޕާޓީތަކުން ވެސް އިންތިހާބުވި ކެންޑިޑޭޓުންނާ އެކު ޓީމެއްގެ ގޮތުގައި ގުޅިގެން މަސައްކަތްކޮށް ނަތީޖާ ނެރެދެއްވާނެ ކަމަށެވެ.