12 Apr 2021, 23:25
މިހާލަތުން އަރައިގަތުމަށް ހުރިހާ ދިވެހި ރައްޔިތުންވެސް ވެކްސިން ޖެހުމަށް އެމްޑީއޭގެ ލީޑަރު އަދި ރައްޔިތުންގެ މަޖިލީހުގެ މީދޫ ދާއިރާ މެމްބަރު އަހްމަދު ސިޔާމް މުހައްމަދު އެދިވަޑައިގެންފި އެވެ.
ސިޔާމް އެގޮތަށް އެދިވަޑައިގެންނެވީ ރަމަޟާން މަހުގެ މުނާސަބަތުގައި ރައްޔިތުންނަށް ތަހުނިޔާ ފޮނުވައި، އާންމު ކުރެއްވި ޚިތޯބުގައެވެ.
ސިޔާމް އިލްތިމާސް ކުރެއްވީ، ކޮވިޑްގެ މިހާލަތުން އަރައިގަތުމަށް ހުރިހާ ރައްޔިތުންވެސް ގަދައަޅައި މަސައްކަތް ކުރުމަށެވެ.
"މިދަނޑިވަޅުގައިވެސް ވީހާވެސް ގިނަ ބަޔަކު ވެކްސިން ޖައްސަވައި، މި ބަލިމަޑުކަމުން އަރައިގަތުމަށް އެހީތެރިކަން ދެއްވުމަކީ އަޅުގަނޑުގެ ވަރަށް ބޮޑު އެދުމެކެވެ" ސިޔާމްގެ ޚިތާބުގައި ވިދާޅުވި އެވެ.
އޭނާ ވިދާޅުވީ، ރޯދަ މަހަކީ މާތްﷲ މާތްކުރައްވާފައިވާ ވަރަށް ރޫހާނީ މައްސަރެއް ކަމަށާއި އެ މައްސަރުގެ ބަރަކާތާއި ދަރުމަ އެންމެންވެސް ލިބިގަންނަން ޖެހޭ ކަމަށެވެ.
"މާތްﷲ އަންގަވާފައިވާ ގޮތުގެ މަތިން ރޯދަ ހިފައި، ރޭ އަޅުކަންކޮށް، ސަދަގާތްދީ، ގިނަގިނައިން ގުރުއާން ކިޔެވުން އިތުރުކުރުމަށް ރާއްޖޭގެ ރައްޔިތުންނަށް ނަސޭހަތްތެރިވެ ވަސިއްޔަތް ކުރަމެވެ،" ސިޔާމް ވިދާޅުވި އެވެ.
މި މާތް މައްސަރުގައި މުސްލިމުންގެ މެދުގައި އެއްބަޑުއެއްބަފާކަމާއި އަޚްވަންތަކަމުގެ ގުޅުން ބަދަހި ކުރަން ޖެހޭ ކަމަށްވެސް ސިޔާމް ވިދާޅުވި އެވެ. އަދި މި މައްސަރަކީ، ގުޅުން ބަދަހިކޮށް، ހަމަޖެހުން ގާއިމްކުރުމަށްވެސް ވަރަށް މުހިންމު ފުރުސަތެއްގެ ގޮތުގައި ސިޔާމް ސިފަ ކުރެއްވި އެވެ.
މާދަމާއަކީ، ރޯދަ މަހުގެ އެއްވަނަ ދުވަހެވެ.