24 May 2021, 21:27
އިންޓަނެޓް ބޭންކިން އެކައުންޓުގެ ޕާސްވޯޑު ބަދަލުކުރަން އެދި އޮޅުވާލައިގެން މެސެޖު ފޮނުވަމުންދާތީ އެކަމަށް ސަމާލުވުމަށް ގައުމީ ބޭންކު، ބީއެމްއެލްއިން އިލްތިމާސްކޮށްފި އެވެ.
އޮޅުވާލައިގެން ފޮނުވަމުންދާ މެސެޖުގައި ބުނެފައިވަނީ ވައިބާ މެދުވެރިކޮށް ލިންކްތަކަށް ފިތައި، އެ ލިންކުގެ ސްޓެޕްތައް ފުރިހަމަކޮށްފައިވާ ފަރާތްތަކުން ބީއެމްއެލް ކާޑު ސެންޓަރަށް ގުޅުމަށެވެ.
އެފަދަ ފަރާތްތަކުން އިންޓަނެޓް ބޭންކިންގެ ޕާސްވޯޑު ބަދަލުކުރުމަށް ބީއެމްއެލްއިް އިލްތިމާސްކުރަމުންދާ ކަމަށްވެސް އޮޅުވާލައިގެން ކުރަމުންދާ މެސެޖުގައި ބުނެފައިވެ އެވެ.
ބީއެމްއެލްއިން ބުނީ މިއީ އޮޅުވާލައިގެން އެ ބޭންކުގެ ނަމުގައި ފޮނުވަމުންދާ މެސެޖެއް ކަމަށެވެ.
ފޭކު މެސެޖުގެ ސްކްރީން ޝޮޓެއް
މިފަދަ މައުލޫމާތެއް ހޯދުމަށްވެސް އަދި ފައިސާ ފޮނުވުމަށް އެދި ބީއެމްއެލްއިން އެއްވެސް ހާލަތެއްގައި ކަސްޓަމަރުންނަށް ނުގުޅާނެ ކަމަށް އެ ބޭންކުން ބުނެ އެވެ.
މީގެ އިތުރުން ކާޑުގެ އެއްވެސް މައުލޫމާތެއް (ކާޑު ނަންބަރު، މުއްދަތު ހަމަވަ ތާރީހު، ސީވީސީ/ސީވީސީ ކޯޑު) އަދި އިންޓަނެޓް ބޭންކިން މައުލޫމާތާއި އޯޓީޕީ، ފޯނު، އީމެއިލް ނުވަތަ މެސެޖަކުންވެސް އެއްވެސް ފަރާތަކާ ހިއްސާ ނުކުރުމަށް ބީއެމްއެލްއިން ވަނީ އިލްތިމާސްކޮށްފަ އެވެ.