01 Jul 2021, 14:56
އިސްލާމްއާބާދު (ޖުލައި 01): ޗައިނާގެ ކޮމިއުނިސްޓް ޕާޓީއަށް 100 އަހަރު ފުރެމުންދާ މިދަނޑިވަޅުގައި ޕާކިސްތާނުގެ ބޮޑުވަޒީރު އިމްރާން ޚާން އެމެރިކާއަށް ފާޑުވިދާޅުވެ ޗައިނާއަށް ވަރަށް ބޮޑަށް ތައުރީފު ކުރައްވައިފިއެވެ.
"ގްލޯބަލް ޓައިމްސް" އަށް ދެއްވި ބަސްދީގަތުމެއްގައި އިމްރާންޚާންވަނީ 1949 ގައި ޗައިނާގެ ކޮމިއުނިސްޓް ޕާޓީ އެގައުމުގެ ވެރިކަމާ ހަވާލުވުމަށްފަހު އެޕާޓީން ޗައިނާއަށް ގެނެސްދީފައިވާ އާދަޔާ ޚިލާފު ތަރައްގީއަށް ތާރީފު ކުރައްވާފައެވެ.
އިމްރާން ޚާން ވިދާޅުވީ ޗައިނާގައި އޮންނަ ގަވަނިންގް ސިސްޓަމަކީ އެމެރިކާއާއި ޔޫރަޕްގައި އޮންނަ އަދި ހުޅަނގުން ޕްރޮމޯޓްކުރާ ލެބެރަލް ޑިމޮކްރެޓިކް ނިޒާމަށްވުރެ އަމަލީ މައިދާނުގައި މާކާމިޔާބު އަދި ގުޑް ގަވަނެންސް މާބޮޑަށްވެސް ރަނގަޅު ނިޒާމެއްކަމެއް ކަމުގައެވެ. ހުޅަނގުގެ ޑިމޮކްރަސީގައި އޮންނަ މުއްސަނދިންނާއި އެލީޓުންނާ އަދި ކުންފުނިތަކުގެ ބާރު ސަރުކާރުގެ މައްޗަށް ގަދަވުމުގެ ބޯދާ "އޮލިގާކީ" އުސޫލު ޗައިނާގެ ނިޒާމުގައި ނޯންނަކަން އިމްރާން ޚާން ފާހަގަ ކުރެއްވިއެވެ.
ޗައިނާގެ ނިޒާމުގައި ހުޅަނގުގެ ޑިމޮކްރަސީ ނެތް ނަމަވެސް އެއީ ގައުމުތައް އަވަށް ތަރައްގީ ކުރުމަށާއި ރައްޔިތުންނަށް ބޭނުންވާ އަސާސީ ޚިދުމަތްތަކާއި ރައްޔިތުންގެ އަތްމަތި ތަނަވަސްކޮށްދީ ލަގްޒަރީ ޚިދްމަތްތައްވެސް ފުރިހަމައަށް ލިބިދޭ އަދި ރައްޔިތުން ފުދުންތެރި ބަޔަކަށް ހެދުގައި ހުޅަނގުގެ ޑިމޮކްރަސީގެ ނިޒާމަށްވުރެ މާ ކާމިޔާބު ނިޒާމެއް ކަމަށް އިމްރާންޚާން ފާހަގަކުރެއްވިއެވެ.
އަނެެއްކޮޅުން ޗައިނާގެ ރަސްމީ މީޑިއާއަށް ދެއްވި ބަސްދީގަތުމެއްގައި އިމްރާން ޚާން ވަނީ ޗައިނާއާއި ޕާކިސްތާނާ ދެމެދު އޮތީ ވަރަށް ހަރުދަނާ އަސާސްތަކެއްގެ މައްޗަށް ބިނާވެފައިވާ ސްޓްރެޓީޖިކް ގުޅުންތަކެއްކަން ކަށަވަރުކޮށް ދެއްވައި ޕާކިސްތާނުގެ ސަރުކާރުތައް ބަދަލުވިޔަސް މި ގުޅުންތަށް ދެމިގެންދާނެކަމުގެ ޔަގީންކަން ދެއްވައި ވާހަކަ ދައްކަވާފައެވެ.
އިމްރާން ޚާން ވިދާޅުވީ ޕާކިސްތާން ޗައިނާއާ ގާތްވެ ޗައިނާއާ ސްޓްރެޓީޖިކް ގުޅުންތަކެއް އުފެއްދީ ޕާކިސްތާނުގެ ތަރައްގީއާއި ޕާކިސްތާނުގެ ގައުމީ މަސްލަހަތަށް އެއީ އެންމެ ރަނގަޅުގޮތް ކަމަށް ފެނިގެންކަމަށާ ޕާކިސްތާނުން އެމެރިކާއާއެކު ބޭއްވި ދުވަސްވީ ގުޅުންތަކުން ޕާކިސްތާނަށް ނުލިބޭ ފައިދާ ކުރު މުއްދަތެއްގެ ތެރޭގައި ޗައިނާއާ ގާތްވުމުގެ ސަބަބުން ލިބިފައިވާ ކަމުގައެވެ.
ޗައިނާ އާއި ޕާކިސްތާނާ ދެމެދުގައިވާ ސްޓްރެޓީޖިކް ގުޅުންތައް ކިލަނބުކޮށް ޗައިނާއާ ދުރަށް ދިޔުމަށް އެމެރިކާއާއި ހުޅަނގުގެ ގައުމުތަކުން ޕާކިސްތާނަށް ބޮޑެތި ފިއްތުންތައް ކުރިމަތިކުރަމުން ގެންދާކަމަށާ ނަމަވެސް ދެން ޕާކިސްތާން ހުޅަނގުގެ ދަޅަތަކަށް ނުހެއްލޭނެކަމަށް އިމްރާންޚާން ވިދާޅުވިއެވެ.
ވަކި ގައުމަކާ ދުރުވެ އެމެރިކާއާއި އެމެރިކާގެ ބައިވެރިންނާ ގާތްވުމަށް އެމެރިކާއާއި ހުޅަނގުގެ ގައުމުތަކުން ޕާކިސްތާނަށް ބާރުއެޅުމަކީ އެމެރިކާއާއި ހުޅަނގުގެ ނުކުޅެދުންތެރިކަން ކަމަށްވެސް އިމްރާން ޚާން ސިފަކުރެއްވިއެވެ. މީގެއިތުރުން އެމެރިކާ އިންޑިއާ އިސްކޮށް ބާއްވައިގެން ޖަޕާނާއި އޮސްޓްރޭލިއާ ހިމެނޭގޮތަށް ކުއަޑް ގްރޫޕްގެ ނަމުގައި ގްރޫޕެއް ހަދައިގެން ޗައިނާއާ ދިމާކުރުމަށް ކުރަމުން ގެންދާ މަސައްކަތްތަކަށްވެސް އިމްރާން ޚާން ފާޑު ވިދާޅުވިއެވެ.
އިނގިރޭސިވިލާތުގެ ނޫހެއްކަމަށްވާ "ދަ ގާޑިއަން" ބުނާގޮތުން 1949 ވަނައަހަރު ޗައިނާގެ ވެރިކަމަށް އައި ކޮމިއުނިސްޓް ޕާޓީވަނީ ހުޅަނގަށްވެސް އިންކާރު ނުކުރެވޭވަރަށް ޗައިނާ ތަރައްގީކޮށް އެގައުމު ދުނިޔޭގެ އިގްތިސާދީ އަދި ޓެކްނިލޮޖީގެ ބޮޑު ބާރަކަށް ހެދުމުގައި އާދަޔާ ޚިލާފު ކާމިޔާބީތަކެއް ހޯދާފައެވެ.
ކޮމިއުނިސްޓް ޕާޓީ ޗައިނާގެ ވެރިކަމަށް އައިއިރު ޗައިނާއަކީ ގިނަޔަކު ހައިހޫނު ކަމުގައި އުޅޭ ދުނިޔޭގެ އެންމެ ފަގީރު އަދި ލިޔަންކިޔަން ނޭނގޭ އެންމެ ގިނަބަޔަކު ތިބި އެއްގައުމު ކަމަށާ ނަމަވެސް އެޕާޓީގެ ވެރިކަމުގައި ޗައިނާގެ ފަގީރުކަމުގެ ނިސްބަތް 70 އިން ސައްތައިން 12 އިންސައްތައަށް ދަށްކޮށް އަންހެނުންނަށް ހައްގުތައް ހޯދައިދީ ދުނިޔޭގައި އިގްތިސާދީ ގޮތުންނާއި ޓެކްނޮލޮޖީ އާއި ސިނާއަތުގެ ގޮތުން ދެވަނަ ގައުމުގެ ގޮތުގައި ޗައިނާ ހަދާފައިވާކަން އެނޫހުން ފާހަގަކޮށްފައިވެއެވެ.
ކޮމިއުނިސްޓް ޕާޓީގެ ވެރިކަމުގައި މިހާރު ޗައިނާ ގެންދަނީ ޒަމާނުއްސުރެ ދުނިޔޭގެ ޒައާމަތުގައި އޮތް އެމެރިކާ ގެ ބާރުވެސް ކަނޑުވާލައި އެމެރިކާގެ ނުފޫޒުން ދުނިޔެ ސަލާމަތް ކުރަމުގައިވެސް ކާމިޔާބު ހޯދަމުންކަމުން އެމެރިކާ ޗައިނާ ގެ ނިޒާމު ދެކެ ޖެހިލުންވާކަމަށް ބުނެފައިވެއެވެ.
މިމޭރުމުން ވާހަކަ ދައްކަމުން ހުޅަނގުގެ ޑިމޮކްރެޓިކް ނިޒާމަކީ ޗައިނާގެ ކޮމިއުނިސްޓް ނިޒާމަށް އަމަލީގޮތުން ފާޑު ކިޔޭވަރުގެ ނިޒާމެއް ނޫންކަމަށާ ހުޅަނގުގެ ޑިމޮކްރެޓިކް ނިޒާމުގައި ހުޅަނގުގައި ފަގީރުން އިތުރުވެ މުއްސަނދިން އިތުރަށް މުއްސަނދި ވެފައިވާއިރު ކޮމިއުނިސްޓް ޕާޓީގެ ނިޒާމުގައި ޗައިނާގައި ފަގީރުންގެ ނިސްބަތް އާދަޔަ ޚިލާފަށް ދަށަށްގޮސް މުއްސަނދިންގެ ނިސްބަތްވެސް ދިޔައީ މައްޗަށްކަން ފާހަގަ ކޮށްފައިވެއެވެ.