03 Jul 2021, 08:32
ބޮލީވުޑްގެ ނުފޫޒުގަދަ ބަތަލާއިންގެ ތެރޭގައި ހިމެނޭ ތާޕްސީ ޕަންނޫ ލީޑު ރޯލުން ފެނިގެންދާ ފިލްމު "ހަސީން ދިލްރުބާ" ނެޓްފްލިކްސްގައި ސްޓްރީމްކުރަން ފަށައިފިއެވެ.
ތާޕްސީ ޕަންނޫ އާ ވިކްރަންތު މެސީ ލީޑު ރޯލުން ފެނިގެންދާ މި ފިލްމުގައި އެދެތަރިން ފެނިގެންދާނީ ދެމަފިރިންގެ ގޮތުގަ އެވެ. މި ފިލްމަކީ ތްރިލާ ޖޯންރާއަށް ތައްޔާރުކޮށް ގެނެސްދޭ ފިލްމެކެވެ. މި ފިލްމުގެ އެ ދެތަރިންގެ އިތުރުން ލީޑު ރޯލަކުން ފެނިގެންދާނީ ހަރްޝްވަރްދަން ރާނޭ އެވެ.
މި ފިލްމު މިހާރު ނެޓްފްލިކްސް އިން ބަލާލެވޭއިރު މި ފިލްމަށް އިންޑިއަން އެކްސްޕްރެސް އިން ދީފައިވަނީ ފަހަކުން ދެ ތަރީގެ ރޭޓިންއެކެވެ.
ގިނަ ފިލްމުތަކުން ފެނިފައިވާ ތާޕްސީ އަކީ މިހާރު ބޮލީވުޑްގައި ހުރި އެންމެ އުންމީދީ އެއް ބަތަލާ އެވެ. އޭނާ ކުޅެފައިވާ ބައެއް ފިލްމުތަކުގެ ތެރޭގައި "ޕިންކް"، "ބަދްލާ" އަދި "ޖުޅްވާ 2" ހިމެނެ އެވެ.