30 Jul 2021, 11:40
ކޮވިޑް-19 ގެ ބަލިމީހުންގެ ތެރެއިން ހާއްސަ ފަރުވާ ބޭނުންވާ މީހުންނަށް ގާއިމްކޮށްފައިވާ ހުޅުމާލޭ މެޑިކަލް ފެސިލިޓީ (އެޗްއެމްއެފް)ގައި މިވަގުތު އެއްވެސް ބަލިމީހެއް އެޑްމިޓްކޮށްފައި ނެތްކަމަށް އެތަން ހިންގާ ހުޅުމާލޭ ހޮސްޕިޓަލުން ބުނެފިއެވެ. އެތަނުގައި ފަރުވާދެމުން ދިޔަ އެންމެ ފަހު ޕޭޝަންޓު ޑިސްޗާޖުކުރުމާއެކު އެތަނުން ޕޭޝަންޓުން ހުސްވީ ރޭގެ ވަގުތެއްގައެވެ.
ހުޅުމާލޭ ފެސިލިޓީ ހިންގެވުމާ ހަވާލުވެ ހުންނެވި ހުޅުމާލޭ ހޮސްޕިޓަލުގެ ސީއީއޯ މާރިޔާ ސައީދު "ސަން"އަށް ވިދާޅުވީ މިވަގުތު އެތަނުގައި އެއްވެް ބަލިމީހެއް ނެތް ކަމަށެވެ. އަދި އެ ފެސިލިޓީގައި އެޑްމިޓް ކުރެވިފައިވާ މީހުންގެ އަދަދު ފަހަކަށް ވުރެ މަދު އަދަދެއްގައި ހިފެހެއްޓިފައި ހުންނަތާ ހަފްތާއަކަށްވުރެ ގިނަ ދުވަސް ވެފައިވާ ކަމަށެވެ.
ހުޅުމާލެ މެޑިކަލް ފެސިލިޓީއަކީ 270 މީހުންނަށް ފަރުވާ ދެވޭ ކެޕޭސިޓީގައި ތައްޔާރުކޮށްފައިވާ ފެސިލިޓީއެކެވެ.
"އަޅުގަނޑުމެން ޕޭޝަންޓުން މި ޑިސްޗާޖުކުރަނީ ހަމަ އެންމެ ރަނގަޅަށް ފަރުވާ ދިނުމަށްފަހު، ރޭގައި އެންމެ ޕޭޝަންޓެއް ހުރީ. ދެން ގެޔަށް ދެވޭ ވަރުވުމާއެކު އަޅުގަނޑުމެން އެ ޕޭޝަންޓުވެސް ގެޔަށް ޑިސްޗާޖުކޮށްލީ," މާރިޔާ ވިދާޅުވިއެވެ.
މާރިޔާ އިތުރަށް ވިދާޅުވީ ފެސިލިޓީގައި މިވަގުތު ޕޭޝަންޓުން ނެތްނަމަވެސް އެ ފެސިލިޓީގައި އަބަދުވެސް ނަރުހުން ތައްޔާރީ ހާލަތުގައި ތިބޭނެކަމަށެވެ. އަދި މިވަގުތު ފެސިލިޓީ ހުސްކޮށް އޮތުމާއެކު ފެސިލީޓީގެ އާބާތުރަ ފިލުވުމުގެ މަސައްކަތް ކުރެވެމުންދާކަމަށް ވިދާޅުވިއެވެ.
މާލެ ސަރަހައްދުގައި ކޮވިޑް-19 ގެ ހާލަތު ވަރަށް ބޮޑުތަނުން ރަނގަޅުވެފައިވާ އިރު, ބަލީގައި އެންމެ ކްރިޓިކަލް ވާ މީހުންނަށް ފަރުވާދެނީ ދަރުމަވަންތަ ހޮސްޕިޓަލުގައެވެ. އެނގިފައިވާ ގޮތުގައި ރޭގެ ނިޔަލަށް އެތަނުގައި އެޑްމިޓުކޮށްގެން ފަރުވާ ދެމުން ދިޔައީ އެންމެ ދެ މީހުންނަށެވެ.
މި އަހަރުގެ އޭޕްރިލް މަހާއި މޭ މަހުގެ ތެރޭގައި ރާއްޖޭގައި ވަރަށް ހަލުއިކޮށް ކޮވިޑް-19 ފެތުރެމުން ދިޔަ އިރު, މާލެ ސަރަހައްދުން ގިނަ އަދަދެއްގެ ބަޔަކު ޕޮޒިޓިވް ވަމުން ދިޔައެވެ. އެގޮތުން އެންމެ ޕީކްވި ދުވަހު އެއްފަހަރާ އެތަނުގައި 200 އަށްވުރެ ގިނަ މީހުން އެއްފަހަރާ އެޑްމިޓްކޮށްގެން ފަރުވާ ދެމުންވެސް ގެންދިޔައެވެ. އަދި އެ ދުވަސްވަރު ފެސިލިޓީގައި މަސައްކަތްކުރާނެ ނަރުހުންނާއި އެހެނިހެން މަސައްކަތްތެރިންގެ ހޯދުމުގެ ދަތިކަން ކުރިމަތިވެ, އެޗްޕީއޭއިން ވަނީ ވޮލަންޓިއަރުންގެ އެހީތެރިކަންވެސް ހޯދާފައެވެ.
އެހެން ނަމަވެސް ބަލި ފެތުރުން ކޮންޓްރޯލުކުރުމުގެ ފިޔަވަޅުތައް އަޅައި, މާލެ ސަރަހައްދުން ޕޮޒިޓިވް ވަމުން ދިޔަ މީހުންގެ އަދަދު މަދުވުމާއެކު ޖޫން މަހުން ފެށިގެން އެޑްމިޓްކުރާ މީހުންގެ އަދަދުވެސް ވަރަށް ދަށްވަމުން ދިޔައެވެ.