24 Aug 2021, 14:54
ސްރީލަންކާގެ ތިން މިނިސްޓްރީއެއްގައި މީގެ ކުރިން އިސްކޮށް ހުންނެވި މަންގަލަ ސަމަރަވީރަ މިއަދު އަވަހާރަވެއްޖެއެވެ.
ލަންކާގެ ޑެއިލީ މިރާ ނޫހުގައިވާ ގޮތުން ސަމަރަވީރަ އަވަހާރަވީ ކޮވިޑް-19އަށް ޕޮޒިޓިވްވެ، ފަރުވާ ހޯއްދަވަމުން ގެންދަވަނިކޮށެވެ. އެގޮތުން ކޮލޮމްބޯގެ ޕްރައިވެޓް ހޮސްޕިޓަލެއްގެ އައިސީޔޫގައި އޭނާއަށް ފަރުވާ ދިން ކަމަށް ރިޕޯޓުތަކުގައިވެއެވެ.
ލަންކާގެ ފިނޭންސް އަދި މީޑިއާ މިނިސްޓަރުކަން ސަމަރަވީރަ 2017އިން 2019އަށް ކުރެއްވިއެވެ. އަދި ފޮރިން މިނިސްޓަރުކަން ދެ ދައުރަކަށް ކުރެއްވިއެވެ. އެއީ 2005އިން 2007އަށް އަދި 2015އިން 2017އަށެވެ.
ސަމަރަވީރަ އަވަހާރަވުމާ ގުޅިގެން ރައީސް އިބްރާހިމް މުހައްމަދު ސޯލިހު ވަނީ ތައުޒިޔާގެ މެސެޖެއް ފޮނުއްވާފައެވެ. އަދި އޭނާ އަކީ ލަންކާއަށް ގިނަގުނަ ހިދުމަތްތައް ކޮއްދެއްވާ، ރާއްޖެ އާއި ލަންކާގެ ގުޅުން ވަރުގަދަ ކުރުމަށްޓަކައި މަސައްކަތް ކުރެއްވި ބޭފުޅެއް ކަމަށް ވިދާޅުވެފައެވެ.