01 Sep 2021, 12:41
ޕިކްނިކް އައިލެންޑެއްގެ ގޮތުގައި ކ. ކުޑަގިރި ތަރައްގީކޮށް، ކުރިއަށް އޮތް ހަ މަސް ތެރޭ އެ ރަށަށް ދަތުރު ދެވޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ މެނޭޖިން ޑިރެކްޓަރު އާދަމް އާޒިމް ވިދާޅުވެއްޖެއެވެ.
އާޒިމް އެހެން ވިދާޅުވީ ކުޑަގިރި ތަރައްގީ ކުރުމުގެ މަޝްރޫއު އެމްޓީސީސީއާ ހަވާލު ކުރުމަށް މިއަދު ޕްލޭނިން މިނިސްޓްރީގައި ބޭއްވި ރަސްމިއްޔާތުގައެވެ.
އެ މަޝްރޫއުގައި ޕްލޭނިން މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ޑިރެކްޓާ ޖެނެރަލް ފާތިމަތު ޝާނާ ފާރޫގުއެވެ. އަދި އެމްޓީސީސީގެ ފަރާތުން ސޮއިކުރެއްވީ އާޒިމްއެވެ.
ކުޑަގިރި ޕިކްނިކް އައިލެންޑްގެ މަޝްރޫގައި ސޮއިކުރެއްވުމަށްފަހު އާޒިމް ވިދާޅުވީ އެ ރަށް ތަރައްގީ ކުރުމުގެ އަމަލީ މަސައްކަތް މި މަސްތެރޭ ފެށޭނެ ކަމަށެވެ. އަދި ކުރިއަށް އޮތް ހައެއް ނޫނީ އަށް މަސް ތެރޭގައި ކ. ކުޑަގިރި އަށް ޕިކްނިކް ދެވޭ ވަރު ވާނެ ކަމަށެވެ.
"ސެޕްޓެމްބަރު މަސްތެރޭ މަސައްކަތް ފަށާ، ޕިކްނިކަށް މީހުންނަށް ދެވޭނެ އިންތިޒާމުތައް ކުރިއަށް އޮތް 8-6 މަސް ތެރޭގައި ހަމަޖައްސާނެ،" އާޒިމް ވިދާޅުވިއެވެ.
މީގެ އިތުރުން ކުޑަގިރި އަކީ ކުޑަބަނޑޮހަށް ވުރެ ބޮޑު ރަށެއްކަން އާޒިމް ފާހަގަ ކުރެއްވިއެވެ. އަދި މި ސަރުކާރަކީ މަސައްކަތްތައް ވަރަށް ބާރަށް ހިންގަން ބާރުއަޅާ ސަރުކާރެއް ކަމަށާއި އޭގެ ސަބަބުން އެމްޓީސީސީގެ މަޝްރޫތައް ބާރަށް ކުރިއަށް ގެންދަން އިތުރަށް ބާރުއެޅޭ ކަމަށް އޭނާ ވިދާޅުވިއެވެ.
ކުޑަގިރި މަޝްރޫއަށް 41 މިލިއަން ރުފިޔާ ހަރަދު ވާނެއެވެ.