Last Updated: 1 decade 4 year ago
ބުލޮގު ޚުލާސާ
މިއަދަކީ މި އަހަރަށް ރައީސުލްޖުމްހޫރިއްޔާ ރައްޔިތުންގެ މަޖިލިސް ހުޅުއްވާ ދުވަހެވެ. ރައީސްކަމާ ޑރ. މުހަންމަދު ވަހީދު ހަސަން މަނިކު ހަވާލުވި ފަހުން އިއްވާ ފުރަތަމަ ރިޔާސީ ބަޔާން މިއަދު މަޖިލީހަށް އިއްވާނެ އެވެ. އެމްޑީޕީން ވަނީ ރައީސް ރިޔާސީ ބަޔާން އިއްވުމަށް ހުރަސް އަޅާނެ ކަމަށް ބުނެފަ އެވެ. ރައީސް ރިޔަށި ބަޔާން އިއްވަވާނީ މިއަދު 10:00 ޖަހާއިރު އެވެ.
ރައީސް ޑރ.ވަހީދު މަޖިލީހުން ނުކުމެ ވަޑައިގެން ކާރުކޮޅުގައި ވަަޑައިގެންފި. އެވަގުތު އެއްވެސް ހަމަނުޖެހުމެއް ނުހިނގާ.
މެންބަރު އިބްރާހިމް ރަޝީދު (ބޮންޑާ) އަނެއްކާވެސް އެތެރެއަށް ވަދެއްޖެ. މެންބަރު އީސަވެސް އެތެރޭގައި އެބައުޅުއްވާ. އީސަގެ ގަމީހު ގޮއްތައްވެސް ވަނީ ނެއްޓިފައި. ބޮންޑާގެ ކޯޓުވެސް ވަނީ އިރައިގެން ގޮސްފައި.
މަޖިލީހުގެ ރައީސްއަށް ހުރަސް އެޅުމުން ބޭރަށް ނެރުނީ މެންބަރު އިބްރާހިމް ރަޝީދު (ބޮންޑާ) އަދި ބާރަށު ދާއިރާގެ މެންބަރު މުހަންމަދު ޝިފާޒް ކަމަށް އެމްޑީޕީން ބުނެފި. ކެދިކުޅުދޫ ދާއިރާގެ އަހުމަދު އީސަގެ ގަމީސް ވަނީ ވީދީފައި. އޭނާ ވަނީ މަޖިލީހުން ނުކުމެ އެތަން ނޫސްވެރިންނަށް ދައްކާލާފައި.
ނިއުސް ކޮންފަރެންސް ކެންސަލްކޮށްފި. މަޖިލިސް ތެރޭން "ދޫކޮށްލާށޭ" ވަރަށް ބާރަށް ގޮވާއަޑު އިވޭ.
މަޖިލީހުގެ އެތެރޭގެ މައިދޮރު އަނެއްކާވެސް ލައްޕައިފި. ބައެއް މެންބަރުން މިހާރު ތިއްބެވީ ޗެމްބަރުގައި.
މަޖިލީހުގެ އިރުމަތީ ފަރާތު ދޮރުން ބައެއް މެންބަރުން ވަންނަވާ އިށީންނަވަން ފަށައިފި. ބައެއް މެންބަރުން މިހާރުވެސް ތިބީ ގޮނޑިކޮޅު ތަކުގައި އިށީންނަވައިގެން.
ރައްޔިތުންގެ މަޖިލީހުގެ ނާއިބު ރައީސް އަހުމަދު ނާޒިމު ދެންމެ މީޑިއާ އަށް ވިދާޅުވީ، ރައްޔިތުންގެ މަޖިލީހުގެ ރައީސް އަބްދުﷲ ޝާހިދު ހުންނެވީ ރައްޔިތުންގެ މަޖިލީހުގެ މިއަދުގެ ޖަލްސާ ކުރިއަށް ގެންދަވާ ގޮތަށް ކަމަށް. ނަމަވެސް ރައްޔިތުންގެ މަޖިލީހުގެ ރިޔާސަތުގައި މަޖިލީހުގެ ރައީސް އިންނަވާ ގޮނޑިކޮޅުކައިރީގައި ރައީސުލްޖުމްހޫރިއްޔާ އިންނެވުމަށް ބަހައްޓާފައި ހުރި ގޮނޑި، އެމްޑީޕީ މެންބަރުން ވަނީ މަޖިލީސް ކުރާގޭގެ ދޮރުމައްޗަށް ނެރެ ހިސޯރުކޮށްފައި. އަދި އެ ގޮނޑިކޮޅުގެ ވަށައިގެން އެމްޑީޕީ ބޭފުޅުން ތިއްބަވައިގެން ގެންދަވަނީ ފޯރިމަރަމުން.
ރާއްޖޭގައި މިއަދު ހިނގަމުން އަންނަ ކަންތައްތަކާ ގުޅިގެން އެމެރިކާއިން ކަންބޮޑުވާކަން ހާމަކޮށްފި. އެމެރިކާ އެމްބަސީން އާންމު ކުރި ބަޔާނުގައި ބުނަނީ މުޒާހަރާގައި ހަމަނުޖެހުން ހިނގަމުންދާތީ އާއި މަޖިލިސް ހުރަސް އެޅެމުންދާތީ ކަންބޮޑުވާ ކަމަށް.
ރޯޑްމެޕްގައި އެއްބަސްވި ގޮތަށް، ސުލްހަވެރި ގޮތުގައި ގުޅިގެން ހުރިހާ ފަރާތްތަކުންވެސް މަސައްކަތްކޮށް މައްސަލަތަކަށް ހައްލެއް ހޯދުމަށް ގޮވާލަމެވެ. ހަމަނުޖެހުމުގެ ސަބަބުން ހާލަތު އިތުރަށް ގޯސްވިޔަ ނުދިނުމަށް އެމެރިކާ އިން ހުރިހާ ފަރާތްތަކަކަށް ބާރު އަޅަމެވެ
މިއަދުގެ މުޒާހަރާގައި ހައްޔަރުކުރި މީހުންގެ އަދަދު 44 އަރައިފިކަމަށް ފުލުހުންބުނެފި.
މަޖިލީސް ކުރާގޭގެ ތަޅުމުގައި އެމްޑީޕީ ބައެއް މެންބަރުން އޮށޯވެ، އަދި ރައީސާއި މަޖިލީހުގެ އަމީން އާންމުގެ ގޮނޑިކޮޅަށް ކޮއްޅަށް އަރުއްވި. އަދި ފެންފުޅި އުއްކަވައި ސަރުކާރަށް ތާއީދު ކުރައްވާ މެންބަރުންނާއި އެމްޑީޕީ މެންބަރުންގެ ކުރިމަތިލުން ހިނގި. އަދި އަޑުގަދަ ކުރައްވައި ހަޅޭއްލައްވައި ހެއްދެވި. ހޯރަފުށީ ދާއިރާގެ މެންބަރު އަހުމަދު ރަޝީދު ގަމީހުގެ ގޮއްތައް ނައްޓައި މޭމަތި ހާމަކުރައްވައިގެން ވެސް އުޅުއްވި.
ޓެލެކޮމް ބިލްޑިންގް ކައިރިއަށް އެމްޑީޕީ މީހުން އެއްވެ ފުލުހުންނާ ކުރިމަތިލުމުން ސިފައިންގެ ފައުޖެއް އެ ސަރަހައްދަށް ގޮސްފި.
ރާއްޖެ ވަޑައިގެން މިވަގު އުޅުއްވާ އިންޓަޕާލަމެންޓްރީ ޔޫނިއަންގެ މެންބަރު މރ. މާޓިން ޗައުންގައުން މީޑިއާ އަށް ވިދާޅުވީ ދެ ފަރާތުގެ މަޝްވަރާތައް ކުރުމަށް ހިއްވަރު ދެއްވާ ކަމަށާއި ހަމަ އެއާ އެކު ރައީސުލްޖުމްހޫރިއްޔާ ޑރ. މުހައްމަދު ވަހީދު ހަސަން މަނިކު މަޖީލީސް އަށް ވަޑައިގެން ޕްރެޒިޑެންޝަލް އެޑްރެސް އިއްވެން ޖެހޭނެ ކަމަށް.
އެމްޑީޕީގެ މެންބަރުންގެ ހުރަސްއެޅުމުން މަޖިލީހުގެ ރައީސް ޝާހިދުއަށް ޗެމްބަރަށް ނުވަދެވިގެން އަނެއްކާވެސް އެބުރި ވަޑައިގެންފި. އަނެއްކާވެސް ވަޑައިގަތީ މަޝްވަރާތަކަށް.
ސޯސަންމަގުން މަޖީދީ މަގު ލައިޓް ސަރަހައްދުގައި އެމްޑީޕީގެ އަންހެނުންގެ މުޒާހަރާއަށް އިތުރު އަންހެނުން ގުޅިއްޖެ. އެމީހުންވެސް ކުނާހިފައިގެން އައިސް ޖައްސާލައިފި.
މަޖިލީހުގެ ޖަލްސާ ފެށުމަށް ހުރަސް އަޅުއްވަނީ 12 މެންބަރަކު. އެ މެންބަރުން މަސައްކަތް ކުރައްވަނީ ރައީސްގެ އަޒުމާއި ހިތްވަރު ދުއްވާލަން ކަމަށް ވިދާޅުވި. އަދި މަޖިލީހުގެ ރައީސް ޝާހިދު މަޖިލިސް ފެށުމަށް ކުރަންޖެހޭ ކަންކަން ކުރައްވާ ކަމަށް ވިދާޅުވި.
އެ މަނިކުފާނުގެ ގާނޫނީ ވާޖިބު އަދާކުރެއްވުމަށް ފަހު ނޫނީ ނުނިކުންނަވަން ހުންނެވީ ކެތްމަދުވެފައި. އެކަން ނިންމެވުމަށްފަހު ރައީސް ގެއަށް ވަޑައިގަންނަވާނެ.
މަޖިލީހުގެ ޖަލްސާ ފެށުމަށް ކުރަންޖެހޭ ކަންކަން ކުރަމުން އަންނަ ކަމަށް ބައެއް މެންބަރުން ވިދާޅުވޭ. އެމްޑީޕީ މެންބަރުން ގެންދަވަނީ އަދިވެސް ހުރަސް އަޅުއްވަމުން.
ރައްޔިތުންގެ މަޖިލީހުގެ ރައީސް އަބްދުﷲ ޝާހިދު މަޖިލީސް ހުޅުއްވައިދެއްވުމަށް ވަންނަވަން މަސައްކަތް ކުރެއްވުމުން އެމްޑީޕީ މެންބަރުން އަނެއްކާ ވެސް ހުރަސްއަޅައިފި.
އެމްޑީޕީ މެންބަރު ރިޔާޒު މަޖިލީހުގެ އެތެރޭގެ މައިދޮރު ހުޅުވުމުން އެމްއެންޑީއެފް ސެކިއުރިޓީން އެ ދޮރު އަނެއްކާވެސް ލައްޕައިފި. އެ ދޮރު ނުހުޅުވޭ ގޮތައް އެމްއެންޑީއެފްގެ ސެކިއުރީޓިން އެ ދޮރު ކުރިމަތީގައި އެބަތިބި.
އަނިޔާވެގެން އައިޖީއެމްއެޗްގައި ފަރުވާދިނީ 14 ފުލުހަކަށް. އެ ހުރިހާ ފުލުހުން މިހާރުވަނީ ދޫކޮށްލާފައި. އެ ފުލުހުންނަށް ސީރިއަސް އަނިޔާތަކެއް ނުވާކަމައްވެސް ބުނޭ.
ސޯސަންމަގުން މަޖީދިއްޔާ ކައިރީ ލައިޓް ސަރަހައްދުގައި މުޒާހަރާ ކުރާ މީހުންނާ އެމްޑީޕީގެ މެންބަރު މާރިޔާ އާއި އީސަ ބައްދަލުކުރައްވަމުން އެބަ ގެންދަވާ.
ސިފައިންގެ 50 އެސްޕީޖީން މަޖިލީހުގެ ހުޅަނގު ގޭޓު ކުރިމައްޗަށް ވާގޮތަށް އެތުރިލައިފި.
އެމްޑީޕީ މެންބަރުން އަލިކިލެގެފާނު މަގުގައި މެންދުރުގެ ކެއުން ވަނީ އިންތިޒާމް ކޮށްފައި. އެމީހުން އަންނަނީ ފުރައިޑް ރައީސް އަށް އިންސާފުކުރަމުން.
އައިޕީޔޫގެ މެންބަރުންނާއި އެމްޑީޕީގެ ޕާލިމަންޓްރީ ގުރޫޕުގެ ރައީސް އިބްރާހިމް މުހަންމަދު ސޯލިހު (އިބޫ)އާ އެކު މަޝްވަރާތަކެއް މަޖިލީހުގެ އިދާރާގައި ހިގާކަމަށް މައުލޫމާތު ލިބޭ.
ތައިވޯކްސް ރެސްޓޯރަންޓް ކައިރިއަށް އެމްޑީޕީ މެންބަރުން ދަނީ އެއްވަމުން. އެ ސަރަހައްދަށް މީހުން ދަނީ އިތުރުވަމުން.
ރައީސް ވަހީދުގެ ސްޕޯކްސް ޕާޝަން އައްބާސް އާދިލް ރިޒާ ވިދާޅުވީ ރައީސް ވަހީދު ހުންނެވީ މަޖިލީހުގައި ރިޔާސީ ބަޔާން އިއްވެވުމަށް ކެރިވަޑައިގެން ތައްޔާރަށް ކަމަށް. އަދި ރައީސް އިންތިޒާރުކުރައްވަމުން ގެންދަވަނީ މަޖިލީހުގެ ރައީސް އެ ފުރުސަތު ދެއްވަންދެން ކަމަށް. އަދި ރައީސްއަށް ބަޔާން ނީންވޭނެ ފަދަ ހާލަތެއް މަޖިލީހުގައި ނެތް ކަމައްވެސް އޭނާ ވިދާޅުވި.
މީގެ ކުރިންވެސް މަޖިލީހުގައި އަމަންއަމާން ކަން ގެއްލުނީމައި އަމަުލުކުރާ އުސޫލުތަކެއް އޮވޭ. އެބާރު އޮންނަނީ މަޖިލީހުގެ ރައީސްއަށް. ނަން އިއްވުމާއި މަޖިލީހުގެ ގާޑުން އެ މެންބަރެއް ނެރުން
ޑިފެންސް މިނިސްޓާ ނާޒިމް މީގެ ކުޑައިރުކޮޅެއް ކުރިން ޗެމްބަރުގެ ދޮރުމަތީ ތިބި މަޖިލީހުގެ ބައެއް މެންބަރުންނާ ވާހަކަދައްކެވި. އެކަމަކު ދެއްކީ ކޮންވާހަކައެއް ކަމެއް ސާފުވާގޮތެއް ނުވޭ.
އެމްޑީޕީގެ އަންހެނުން މުޒާހަރާ ކުރާ ނާދީ ސަރަހައްދުގައި ކުނާ އަޅާ އެންމެން އިށީންދެއްޖެ. އެތަނުގައި ފެނާއި ތަފާތު ޖޫސްފަދަ ބުޔުންތައް އަންނަނީ ބަހަމުން.
މެންބަރު އަލްހާން މަޖިލީހުން ނުކުމެވަޑައިގެން މަޖީދިއްޔާ ކައިރީގައި މުޒާހަރާ ކުރާ މީހުންނާ ދިމާލަށް ވަޑައިގެންފި.
އިންޑިއާގެ ހައިކޮމިޝަނާ މުލޭ އާއި ބަގްލަދޭސްގެ ޑިޕްލޮމެޓެއް ދާދިދެންމެއަކު ރައްޔިތުންގެ މަޖިލީހުގެ އިދާރާއިން ނިކުންނަވައިފި. އެބޭފުޅުން ރައީސް އާއި ޕާލިމަންޓްރީ ގުރޫޕުގެ ރައީސުންނާއި މަޝްވަރާ ކުރެއްވި ކަމަށް ހަބަރު ލިބޭ.
ޗެމްބަރުގެ ދޮރުމަތީގައި ތިއްބަވާ އަލީ ވަހީދާއި އެމްޑީޕީގެ ބައެއް މެންބަރުން ހަރުއަޑުން ގާނޫނު އަސާސީގެ ބައެއް މާއްދާތައް ވިދާޅުވަމުން ގެންނަނީ.
މަޖިލީހުގެ އަމީން އާންމު ޗެމްބަރުގެ ދޮރުމަތީގައި ހުންނަވައި އެމްޑީޕީގެ މެންބަރުންނާ ވާހަކަދައްކަވަމުން އެބަ ގެންދަވާ.
ޕާލިމަންޓްރީ ގުރޫޕުގެ ލީޑަރުންނާ އެކު މަޖިލީހުގެ ރައީސް ބައްދަލުވުމެއް ބާއްވަމުން ގެންދަވާކަމަށް މައުލޫމާތުލިބޭ. މަޖިލީހުގެ ރައީސް ޗެމްބަރަށް ވަނުމައްވެސް ހުރަސް އަޅާކަމަށް ބައެއް މެންބަރުން ބުނޭ.
އިންޓަ ޕާލިމެންޓްރީ ޔޫނިއަން (އައިޕީޔޫ)ގެ އޮފިޝަލަކު އެބަ ހަރަކާތްތެރިވޭ. މެންބަރު އީވާ އަންނަނީ އެބޭފުޅާ އާ ވާހަކަދައްކަވަމުން.
މިއަދު އިރުއޮއްސުނަސް ޖަލްސާ ކުރިއަށް ގެންދަން ބޭނުންކަމަށް އިލްހާމް ވިދާޅުވި. އަދި އެވާހަކަ މުލަކު ދާއިރާގެ މެންބަރު ޔާމީން މަޖިލީހުގެ ރައީސްއަށް އަންގަވާފައިވާ ކަމައްވެސް ވިދާޅުވި. މަޖިލީހުގެ ރައީސް މިދަޑިވަޅުގައި މަޖިލިސް ކުރިއަށް ގެންދެވޭނެ ގޮތްތަކެއް ހަމަޖައްސައިދިނުމައްވެސް އޭނާ ވަނީ ޝާހިދުއަށް ގޮވާލައްވާފައި.
ރައީސް އިންނެވީ މަޖިލީހުގެ ރިޔާސަތާ ވަރަށް ކައިރީގައި ސެކިއުރިޓީގައި އަދި ހެޔޮހާލުކޮޅުގައި. ކިތަންމެ ގިނަ އިރެއް ވިޔަސް ރައީސް ވަާޑއިގަންނަވާނީ ރިޔާސީ ބަޔާން އިއްވާފައި
އައިޖީއެމްއެޗުން ބުނީ ހަމަނުޖެހުމުގައި އަނިޔާވި ހަތަރު މީހަކަށް އެމެޖެންސީގައި ފަރުވާދިން ކަމަށް. އޭގެ ތެރެއިން އެކަކު ނޫން އެންމެން ވަނީ ދޫކޮށްލާފައި.
އަލިކިލެގެފާނު މަގަށް އަނެއްކާވެސް އެމްޑީޕީ މެންބަރުން އެއްވަން ފަށައިފި. ފުލުހުން އެމީހުން ފަހަތައް ޖައްސަން އަންނަނީ މަސައްކަތް ކުރަމުން.
އެމްޑީޕީ މަޖިލިސް މެންބަރުން ރިޔާސަތުގައި ހުރި ގައުމީ ދިދަ އާއި ރައީސް އިށީންނަވާ ގޮޑި ނަގައިފި. ބައެއް މެންބަރުން އެއްބޭފުޅެއް އަނެއް ބޭފުޅެއްގެ ގަޔަށް އަތްލާ މަންޒަރުވެސް އެބަފެނޭ. އެމްޑީޕީ މެންބަރުން ވަނީ ރިޔާސަތު ހިސޯރުކޮށްފައި.
އަލިކިލެގެފާންގެ މަގުން ދުރަށް ޖެއްސި އެމްޑީޕީ މީހުން، ކޯޅިކޯލިއަށް މަޖީދީމަގުގައި. އަދި އެމްޑީޕީ މީހުން "މަނީ މަނީ" އޭ ގޮވަން ފެށުމުން ފުލުހުން، "ޔެސް ސާ' އޭ ވެސް ކިޔި. އަދި ފުލުހުން އަމިއްލަ އަށް ވެސް މިހާރު މަނީ މަނީ ޔޭސް ސާއޭ ކިޔަމުން އެބަދޭ.
މަޖިލީޙުގެ ޗެމްބަރުގައި އެމްޑީޕީ މެންބަރުން ކޮޅަށް ތިބެ ދަނީ ޝުއޫރުފާޅުކުރަމުން. އެމީހުން ގެންދަނީ ހަރުއަޑުން ޗެމްބަރު ތެރޭގައި ހަޅޭއްލަވައި އަޑުގަދަ ކުރަމުން. ބައެއް މެންބަރުން ރިޔާސަތު ކުރިމަތީ އިށީންދެގެންވެސް އެބަތިއްބެވި. އެއީ ކޮންމެންބަރުންނެއް ކަމެއް އަދި ސާފެއް ނުވޭ.
އަލިކިލެގެފާންމަގުގައި ތިބީ މީހުން އެ ސަރަހައްދުން ނެރެ، މުޅި މަގު ފުލުހުން ސާފުކޮށްލައިފި.
މަޖިލިސް ކިތަންމެ ހަލަބިލިވިޔަސް ރައީސް މަޖިލީހާ މުހާތަބުކުރައްވާނެ ކަމަށް ސްޕޯކްސް ޕާޝަން އައްބާސް އާދިލް ރިޒާ ވިދާޅުވި. މަޖިލިސް ހަލަބޮލިވިޔަސް ރައީސް ބިރުފުޅު ނުގަންނާނެ ކަމަށް ވިދާޅުވި.
އެ މަނިކުފާނަކީ ވަރަށް ހިތްވަރު ގަދަ ބޭފުޅެއް. ގާނޫނު ނެގެހެއްޓުމަށް ފުރާނަ އަށް ބިރުފުޅުގަތުމެއް ނެތި އެ ކަން ކުރައްވާނެ.
އަލިކިލެގެފާންމަގުގައި ތިބި އެމްޑީޕީ މީހުންގެ މުޒާހަރާ "ގޭންގެއް" ލީޑްކުރަން ފެށުމުން އެމްޑީޕީގެ އާންމުންގެ ބައެއް މީހުން އެ ސަރަހައްދު ދޫކޮށްދާން ފަށައިފި.
ރެއިންބޯ މަގުގައި ތިބި އެމްޑީޕީ މީހުން ބޮޑެތި ގާތަކާއި ލަޓިބުރިތަކާއި ބޮޑެތި ދަނގަޑު ބުރި ފަދަ ތަކެތި ފުލުހުންނާ ދިމާލަށް ދަނީ އުކަމުން. އެމްޑީޕީ މީހުން މިހާރު ފަހަތަށް ޖައްސައި ތިބީ، އަލިކިލެގެފާންނުމަގުގެ މެދެއްހާ ހިސާބުގައި. އެމްޑީޕީގެ މުޒާހަރާ ހިއުމަންރައިޓްސް ކޮމިޝަނުން ވެސް ދަނީ ބަލަމުން.
މަޖިލިސް ފަށަން އޮތީ 10:00 ޖަހާއިރު. ނަމަވެސް މަޖިލިސް އަދިވެސް ނުފަށާ.
މަޖިލީހުގެ ބައެއް މެންބަރުން ރިޔާސަތު ކައިރީގައި ކޮޅައް އެބަ ތިއްބެވި. އެއީ ކޮން މެންބަރުންނެއް ކަމެއް ސާފެއްނުވޭ. ޗެމްބަރުން ފެންނަނީ ހަލަބޮލިކޮށް.
އެމްޑީޕީ މެންބަރުން ސޯސަން މަގު މަޖީދިއްޔާ ކައިރި ލައިޓް ކުރިމަތީ ހުރި ބެރެކޭޑް ތައް ފަޅާލާފައި ވަދެއްޖެ. އެމީހުން މިހާރު ތިބީ މަޖީދިއްޔާ މައިގޭޓާ ހިސާބުގައި. ފުލުހުން އަންނަނީ އެތަނުން އެމީހުން ފޮނުވާލަން މަސައްކަތް ކުރަމުން.
ބަންދުކޮށްފައިވާ ސަރަހައްދު ފަޅާލައި ބަޔަކު އެތެރެއަށް ވަދެއްޖެ. އެތަނުން އެމީހުން ފޮނުވާލަން މިދަނީ އިންޒާރުދެމުން
ގިނަ މަޖިލިސް މެންބަރުން މިވަގުތު ވަނީ މަޖިލީހަށް ވަޑައިގެންފައި. އެމްޑީޕީގެ މެންބަރުން މަޖިލީހަށް ވަޑައިގަތީ ހިންގަވާފައި އެކުއެކީގައި.
އެމްޑީޕީން އަންހެނުންނަށް މަޖީދިއްޔާ ކައިރިން މަޖިލިސް ކުރާ ގެ ކައިރިއަށް ނުވަދެވުނު. އެމީހުން މިހާރު ތިބީ މަޖީދިއްޔާ ލައިޓްކައިރީ ސޯސަންމަގުގައި އިށީންދެގެން.
އެމްޑީޕީގެ މެންބަރުން ސުނާމީ ބިނާ ސަރަހައްދުން ނައްޓާލައިފި. ގިނަ އަދަދެއްގެ އަންހެނުންނާ ފިރިހެނުން އެކުވެގެން ބޮޑޫތަކުރުފާނު މަގުން މަޖީދީމަގަށް އަޅާލައިފި. އެމީހުން އަދި ދާތަނެއް ނޭންގޭ.