24 Nov 2021, 11:39
އިންޓާނަލް (އެތެރޭގެ) އޮޑިޓެއް ކުރުމުން ނޭޝަނަލް ޑްރަގް އެޖެންސީ (އެންޑީއޭ) ތެރޭގައި ކޮރަޕްޝަންގެ އަމަލުތައް ހިންގަމުން އަންނަ ބަޔަކު ރައްޔިތުންގެ ކުރިމައްޗަށް ބޭޒާރު ވާނެ ކަމަށް ރައްޔިތުންގެ މަޖިލީހުގެ ޕެޓިޝަން ކޮމެޓީން ބުނެފިއެވެ.
މަސްތުވާތަކެތި ބޭނުން ކުރާ މީހުންނަށް ދޭ ފަރުވާ ރަނގަޅު ކުރުމަށް ގޮވާލާ ޖަމިއްޔާއެއް ކަމަށްވާ ހޭންޑްސް ޓުގެދާ އިން ތައްޔާރުކުރި "ޗޭންޖް އެންޑީއޭ ޕެޓިޝަން"އާ ބެހޭގޮތުން މަޖިލީހުގެ ޕެޓިޝަން ކޮމިޓީން އެކުލަވައިލި ރިޕޯޓާ ގުޅޭގޮތުން އިއްޔެ ހަވީރު ވަނީ ނޫސްވެރިންގެ ބައްދަލުވުމެއް ބާއްވާފައެވެ.
އެ ޕެޓިޝަނާ ގުޅިގެން، ރައްޔިތުންގެ މަޖިލީހުގެ ޕެޓިޝަން ކޮމެޓީން ދީފައިވާ ރިކޮމެންޑޭޝަންތަކުގެ ތެރޭގައި ވަނީ އެންޑީއޭގެ ވޭތުވެދިޔަ ފަސް އަހަރުގެ ފައިނެންޝަލް އަަދި، ޕާފޯމެންސް އޮޑިޓެއް ކުރުމަށް އޮޑިޓާ ޖެނެރަލްގެ މައްޗަށް ލާޒިމު ކޮށްފައިއެވެ.
މި ބައްދަލުވުމުގައި "ސަން"އިން ކުރި ސުވާލެއްގެ ޖަވާބުގައި އެ ކޮމެޓީގެ މުގައްރިރު، މުލަކު ދާއިރާގެ މެންބަރު އިބްރާހީމް ނަސީރު ވިދާޅުވީ އޮޑިޓް ރިޕޯޓު ތައްޔާރުވުމުން، އެންޑީއޭ ތެރެއިން އިހުމާލުވެފައިވާ ދާއިރާތައް އެއްވެސް އޮޅުމެއް ނެތް މިންވަރަށް ރައްޔިތުންނަށް ހާމަވާނެ ކަމަށެވެ.
"މި އޮޑިޓުން އެނގޭނެ ކޮން ދިމާލަކުން ކަން އިހުމާލު ވެފައިވަނީ. ކޮން ދިމާލަކުންކަން ވައްކަން ކޮށްފަ ހުރީ. މި އޮޑިޓް ނިމުމުން އިރާދަފުޅު ކުރެއްވިއްޔާ އެ ހުރިހާ ކަމެއް ތިޔަބޭފުޅުންނަށް ތިލަ ވެގެން އަންނާނެ،" ނަސީރު ވިދާޅުވިއެވެ.
ނަސީރު ވިދާޅުވީ ގާނޫނުން އެންޑީއޭއަށް މަތިކޮށްފައިވާ ޒިންމާ ތަކާއި މަސްއޫލިއްޔަތު އަދާކުރުމަށާއި އެކި ދާއިރާ ތަކަށް ހަރަދު ކުރުމަށް ޓަކައި ކޮންމެ އަހަރަކުމެ، ވަރަށް ބޮޑު ބަޖެޓެއް ދޫކުރަމުން އަންނަ ކަމަށެވެ.
އޭނާ ވިދާޅުވީ ދައުލަތުން އެންޑީއޭއަށް ކޮށްފައިހުރި ހޭދަތައް ފެނުމުން ކޮމެޓީގެ މެންބަރުން ހައިރާންވެ، އަންތަރީސް ވެއްޖެ ކަމަށެވެ.
އެ ބައްދަލުވުމުގައި ޕެޓިޝަން ކޮމެޓީގެ ނައިބު މުގައްރިރު އަދި ތިނަދޫ އުތުރު ދާއިރާ މެންބަރު އަބްދުލްމުޣުނީ ވިދާޅުވީ ކޮމެޓީގެ މެންބަރުން އެންޑީއޭއަށް ކުރި ޒިޔާރަތުގައި އެތަނުގެ ތެރެއިން ފެނުނީ ވަރަށް އާދަޔާހިލާފު މަންޒަރުތަކެއް ކަމަށެވެ.
މުޣުނީ ވިދާޅުވީ އެންޑީއޭ ތެރެއަށް މެންބަރުން ވަނުމުން، އެތަނުގެ އިސް ވެރިން އެ މެންބަރުންނާ ބައްދަލުކޮށް، ހަތަރުކަޅި ހަމަ ކުރަން ބޭނުން ނުވި ކަމަށެވެ. އަދި ވިދާޅުވީ އެ ބައްދަލުވުމަށް އެންޑީއޭގެ އިސް ވެރިންނަށް ދައުވަތު ދިނުމުން ވެސް އައުމަށް ދެކޮޅުހަދައި ބައްދަލުވުމަށް ހާޒިރުވެފައި ނުވާ ކަމަށެވެ.
"އަޅުގަނޑުމެން އެންޑީއޭއަށް ކުރި ޒިޔާރަތުގައި އެތަނުގެ އިސް ވެރިން އަޅުގަނޑުމެންނާ ބައްދަލުކުރަން ވެސް ބޭނުމެއް ނުވި،" މުޣުނީ ވިދާޅުވިއެވެ.
މުޣުނީ ވިދާޅުވި ގޮތުގައި ކޮމެޓީން އެއްކުރި މައުލޫމާތުތަކުން ފާހަގަ ކުރެވުނީ އަތޮޅުތެރޭގައި ހިންގާ މަރުކަޒުތަކަށް ބޭނުންވާ ތަކެތި ފޮނުވުމުގައި ވެސް އެންޑީއޭއިން ގެންގުޅެމުން އަންނަނީ ވަރަށް ހަމަނުޖެހޭ ސިޔާސަތުތަކެއް ކަމެވެ.
"ފައިސާ ފޮނުވުމުގެ ބަދަލުގަ އަތޮޅު ތެރެއަށް ކަރުދާސް ރީމެއް އެބަ ފޮނުވާ އެއާފްރައިޓްކޮށް. މި ހާލަތަށް ދިއުމުގެ އެންމެ ބޮޑު ޒިންމާއެއް އަދާކުރަން ޖެހެނީ އެންޑީއޭގަ ތިއްބެވި ޒިންމާދާރު ވެރިން. އެބޭފުޅުންގެ މަސްއޫލިއްޔަތު އަދާ ނުކުރުމުގެ ސަބަބުން މިހާ ހިސާބަށް ދިޔަކަމަށް ކޮމެޓީގެ ހުރިހާ މެމްބަރުންނަށް ވެސް ވަނީ ފާހަގަ ކުރެވިފަ. ރާއްޖެ މިހާލަތަށް ދިއުމުގެ އެންމެބޮޑު ފެއިލިއާ އަކީ މިއީ،" މުޣުނީ ވިދާޅުވިއެވެ.
އޭނާ ވިދާޅުވީ ދެމެހެއްޓެނިވި ގޮތެއްގައި ކަންކަން ކުރެވޭނެ ހަރުދަނާ އުސޫލުތަކެއް ކަނޑައެޅިފައި ނެތްކަން ކޮމެޓީން ކުރި ދިރާސާތަކުން ފާހަގަ ކުރެވިފައިވާ ކަމަށާއި ނަމަވެސް މިހާރު ގެންނަން އުޅޭ ބަދަލުތަކާއެކު އެ ހުރިހާ ކަމެއް ވެސް ބަދަލުވާނެ ކަމުގެ އުއްމީދު ބޮޑު ކަމަށެވެ.