08 Dec 2021, 10:41
މުއްދަތު ހަމަވެފައިވާ ކޮވިޑް ވެކްސިނެއް ނުޖަހާނެ ކަމަށާއި ފައިޒާ ވެކްސިންގެ މުއްދަތު، ދުނިޔޭގެ ސިއްހަތު ޖަމިއްޔާއިން ވަނީ އިތުރު ކޮށްފައި ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ތަރުޖަމާނު ޑރ. ފާތިމަތު ނަޒްލާ ރަފީގު ވިދާޅުވެއްޖެއެވެ.
ނަޒްލާ މިހެން ވިދާޅުވީ، މުއްދަތު ހަމަވެފައި ހުންނަ ވެކްސިން އަތޮޅުތެރޭގައި ބޭނުންކުރާ ކަމުގެ މައުލޫމާތު ލިބޭތޯ ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ.
އެކަމާ ގުޅިގެން ނަޒްލާ ވިދާޅުވީ މުއްދަތު ހަމަވެފައިވާ ވެކްސިން ބޭނުން ނުކުރާނެ ކަމަށެވެ. އަދި ފައިޒާ ވެކްސިންގައި ޖަހާފައިވާ މުއްދަތު ހަމަވާ ތާރީހު، އިތުރު ތިން މަހަށް އިތުރުކޮށްފައި ވާކަމަށް ޑަބްލިޔުއެޗްއޯއިން އަންގާފައި ވާ ކަމަށް އޭނާ ވިދާޅުވިއެވެ.
ވެކްސިންގެ މުއްދަތު ހަމަވާ ތާރީހު ކަނޑައެޅުމާ ގުޅޭގޮތުން ޑަބްލިޔުއެޗްއޯއިން ގައިޑެންސްއެއް ނެރެފައިވެއެވެ.
އެއާ ގުޅިގެން ރާއްޖޭގައި ބޭނުންކުރާ ކޮވިޑް-19 ވެކްސިންގެ މުއްދަތު ހަމަވާ ތާރީހަށް އިތުރު ތިން މަސް އިތުރުކުރުމަށް ޓަކައި ކުރަން ޖެހޭ ދިރާސާގެ މަސައްކަތް ފަށާފައިވާކަމަށް ހެލްތު މިނިސްޓްރީން ބުނީ އޮކްޓޯބަރު މަހުގެ ފަހުކޮޅުގައެވެ.
ހެލްތު މިނިސްޓްރީގެ ކޮލިޓީ އެޝުއަރަންސް ކޮމިޝަނަރު ތަސްލީމާ އުސްމާން މީގެ ކުރިން "ސަން"އަށް ވިދާޅުވީ މޯލްޑިވްސް ފުޑް އެންޑް ޑްރަގް އޮތޯރިޓީން އެކަން ބަލަމުންދާ ކަމަށެވެ.
"މިހާރު ޑަބްލިއުއެޗްއޯއިން އެންމެ ފުރަތަމަ ބުނަނީ ހަ މަސް ކަމަށް ބޭނުންކުރެވޭނީ. ނަމަވެސް މިހާރު ތިން މަސް އިތުރުކޮށް، އެކްސްޕަޔާނުވެ ބޭނުންކުރެވިދާނޭ ނުވަ މަސް ދުވަސް ހަމަވަންދެން،" ތަސްލީމާ ވިދާޅުވިއެވެ.