15 Dec 2021, 13:10
ކޮވިޑްގެ އާ ވޭރިއަންޓު، އޮމިކްރޯންއަށް ރާއްޖޭން އިތުރު ހަތަރު މީހަކު ޕޮޒިޓިވް ވެފައިވާ ކަމަށް، ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން މިއަދު ބުނެފިއެވެ.
މިހާރު ކުރިއަށް ދާ ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑަމޮލޮޖިސްޓް ޑރ. އަފްޒަލް އިބްރާހިމް ވިދާޅުވީ އާ ވޭރިއަންޓަށް ޕޮޒިޓިވް ވެފައިވަނީ ރާއްޖެއަށް އައި ހަތަރު ޓޫރިސްޓުން ކަމަށެވެ. އެ ހަތަރު މީހުންނަކީ ވެސް ސައުތު އެފްރިކާއަށް ދަތުރު ކޮށްފައިވާ މީހުން ކަމަށް ވެސް އަފްޒަލް ވިދާޅުވި އެވެ.
އޮމިކްރޯންއަށް ރާއްޖޭން ފުރަތަމަ މީހަކު ޕޮޒިޓިވްވީ މިމަހު ފަސް ވަނަ ދުވަހުއެވެ. އޭނާއަށް ފަރުވާ ދެމުން އަންނައިރު ހާލު ރަނގަޅެވެ.
މިކަމާ ގުޅިގެން ރިސްކު އެސެސްމެންޓްސް ހަދަމުން ދާއިރު އިތުރަށް އަޅަން ވީ ފިޔަވަޅު ތަކާއި މެދުގައި ވާހަކަ ދެކެވެމުން ދާ ކަމަށް ވެސް އަފްޒަލް ވިދާޅުވިއެވެ. އޭނާ އިތުރަށް ވިދާޅުވީ އިތުރު ފިޔަވަޅުތަކެއް އަޅަން އެނގޭނީ މި ފިޔަވަޅުތައް ތަންފީޒު ކުރުމަށް ފަހުގައި ކަމަށެވެ.
"މިހާރު މިއުޅޭ ވޭރިއެންޓަކީ ޓްރާންސްބިލިޓީ، އެކަކު ގައިން އަނެކަކު ގަޔަށް ބަލި ޖެހުމުގެ ފުރުސަތު ބޮޑު ވޭރިއެންޓެއް. މީގެ އިތުރުން ވެކްސިން އިމިއުން އެސްކޭޕްގެ ކެޕޭސިޓީ ހުރި ކަމަށް ފެންނަނީ މިހާރު ލިބިފައި ހުރި މައުލޫމާތުން. އެހެންނަމަވެސް އެއީ ދެވިފައިވާ ޕްރައިމަރީ ވެކްސިން ދެ ޑޯޒަށް އިމިއުން އެސްކޭޕް ހުރިކަމަށް ފެންނަނީ. އެހެން ނަމަވެސް، ބޫސްޓާ ޑޯޒު ޖެހުމަށް ފަހުގަ އެކަމުން ލިބޭ ރައްކާތެރިކަން އިތުރުވެ ރައްކާތެރިވޭ،" އޭނާ ވިދާޅުވިއެވެ.
މިހާރު ފެތުރެމުންދާ ކޮވިޑްގެ އޮމިކްރޯން ވޭރިއަންޓަކީ ކޮވިޑްގެ އެހެން ވޭރިއަންޓްތަކަށްވުރެ ހަލުއިކަމާއެކު ފެތުރޭ އަދި އެއަށް ވެކްސިންގެ އަސަރުކުރާ މިންވަރު ދަށް ވޭރިއަންޓެއްކަމަށް ދުނިޔޭގެ ސިއްހަތާބެހޭ ޖަމިއްޔާ (ޑަބްލިޔުއެޗްއޯ) އިން ވަނީ ބުނެފައެވެ.
އޮމިކްރޯން އަކީ ކޮވިޑް ވެކްސިންގެ އަސަރު އެއަށްކުރާ މިންވަރުކުޑަ ނުވަތަ ވެކްސިންއަށް އެހާބޮޑަށް ރެސްޕޮންސް ނުކުރާ ވޭރިއަންޓެއް ކަމަށް ބެލެވިފައިވީ ނަމަވެސް އެކަމާބެހޭގޮތުން ސައިންސްވެރިން ކުރާ ދިރާސާތަކުގެ ފުރިހަމަ ނަތީޖާ އަދި ނުނެރެވޭކަމަށް އިލްމީ ރިޕޯޓްތައް ބުނެއެވެ.
އޮމިކްރޯން ފެތުރޭލެއް އެހެން ވޭރިއަންޓްތަކަށްވުރެ ހަލުއިވަނީ ހަށިގަނޑުގެ ދިފާއީ ނިޒާމާއި އަދި ވެކްސިންގެ ސަބަބުން އުފެދިފައިވާ ދިފާއީ ނިޒާމުގެ ތެރެއިން އެވޭރިއަންޓް ބަލިކޮށްނުލެވޭތީކަން ނޫނީ ގައިން ގަޔަށް އެރުމުގެ ގާބިލްކަން އެވޭރިއަންޓްގައި އިތުރުވުމުގެ ސަބަބުންކަން އަދި އިލްމީގޮތުން އަދި ކަށަވަރު ވެފައެއް ނުވެއެވެ.
ނަމަވެސް މިހާތަނަށް ކޮށްފައިވާ ދިރާސާތަކަށް ބަލާއިރު ކޮވިޑުން ދިފާއުވުމަށް މިހާރު ޖަހަމުން އަންނަ ވެކްސިންތަކުގެ ބާރު ދަށް ކޮށްލުމުގެ ގާބިލްކަން، ކޮންމެވެސް ވަރަކަށް އޮމިކްރޯން ވޭރިއަންޓަށް ލިބިފައިވާކަމަށް ސައިންސްވެރިން ކަށަވަރުކޮށް ދެއެވެ.
ކޮވިޑްގެ އެހެން ވޭރިއަންޓްތަކަށްވުރެ އޮމިކްރޯން ފެތުރޭލެއް އަވަސްވެފައި ވެކްސިން އިން އެއަށްކުރާ އަސަރު ކުޑަކަމަށް ރިޕޯޓްތައް ބުނިނަމަވެސް ކޮވިޑްގެ ޑެލްޓާ ވޭރިއަންޓަށްވުރެ އޭގެ ބާރު ކުޑަކަމާއި އަލާމާތްތައްވެސް ކުޑަކަމަށް ޑަބްލިޔުއެޗްއޯ އާ އަދި ރީސާޗަރުންވެސް ބުނެފައިވެއެވެ.
ނަމަވެސް ބާރަށް ފެތުރި ގިނަބަޔަކަށް އޮމިކްރޯން ޖެހޭއިރު އޭގެތެރޭގައި އެހެންބަލިތަކުގެ ސަބަބުން ހަށިގަނޑު ވަރުދެރަވެފައިވާ މީހުން ހިމެނޭނެތީ އޮމިކްރޯން ބޮޑަށް ފެތުރިއްޖެނަމަ މަރުވާ އަދަދު ނުވަތަ މަރުގެ އިންސައްތަ ބޮޑުވާނެ ކަމަށް އެފަރާތްތަކުން ދެކެއެވެ. އޮމިކްރޯން ވޭރިއަންޓް އެންމެ ހަލުވިކޮށް ފެތުރެމުން ދަނީ ދެކުނު އެފްރިކާގައާއި ޔޫރަޕްގެ ބައެއް ގައުމުތަކުގައެވެ.
ޑރ. އަފްޒަލް އިބްރާހިމް އިތުރަށް ވިދާޅުވީ މިހާތަނަށް މޮނިޓަރިންގައި 21 ރަށެއް އޮތް ކަމަށެެވެ. މުޅި ޖުމްލަ 649 ކޭސް އަތޮޅުތެރޭ ރަށްތަކުގައި އުޅޭކަމަށްވެސް އޭނާ ވިދާޅުވިއެވެ. އެގޮތުން އެންމެ ހާލަތު ގޯސް ރަށްތަކަށް ބަލާއިރު ސ.ހިތަދޫ، ދ.ކުޑަހުވަދޫ، ނ މާފަރު، ބ.އޭދަފުށި އަދި ތ. ވިލިފުށި ހިމެނެއެވެ.
ހަމައެހެންމެ، 9 ޑިސެމްބަރުން ފެށިގެން ރާއްޖެއާ ސިންގަޕޫރާ ދެމެދު ޓްރެވަލް ލައިނެއް ގާއިމް ކުރެވިފައި ވާ ކަމަށް ވެސް އަފްޒަލް ވިދާޅުވިއެވެ. ނެގެޓިވް ޕީސީއާރް ޓެސްޓަކާއި އެކު ދެ ޑޯޒު ފުރިހަމަ ކޮށްފައިވާ ފަރާތްތަކުން ސިންގަޕޫރަށް ދަތުރު ކުރާނަމަ ކަރަންޓީނު ވާން ނުޖެހޭނެ ކަމަށް ވެސް އޭނާ ވިދާޅުވިއެވެ.