29 Dec 2021, 11:28
ތަރައްގީގެ ވާހަކަ ދައްކަން ފަށާ ހިސާބުގައި، ގައިން ތާހިރުވުމުގެ ފެން މުޅި ރާއްޖެއަށް ހިނގަން ފަށައިފި ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ފެނާއި ނަރުދަމާގެ މަސައްކަތް ނުފެށި އޮތް 23 ރަށުގައި އެ ހިދުމަތް ގާއިމްކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ މި ހިނގާ ރިޔާސީ ދައުރަކީ ދިވެހި ޖުމްހޫރިއްޔާގެ އެންމެ ސާފުތާހިރު ފަސް އަހަރު ކަމުގައި ވިދާޅުވީ އެމަނިކުފާނު ކަމަށާއި މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާ އަޅާނެ ކަމުގެ ވައުދުވީ ވެސް ޚުދު އެމަނިކުފާނު ކަމަށެވެ.
ރައީސް ވިދާޅުވީ ވެރިކަމާ ހަވާލުވެވަޑައިގެން ފުރަތަމަ ދުވަހު ވެސް، މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާ ގާއިމް ކުރުމުގެ މަސައްކަތް ފަށައިފައިވާނެ ކަމަށެވެ. އަދި މިއަދާ ހަމައަށް އެ މަސައްކަތް ނުފެށި ހުރި 23 ރަށުގެ މަސައްކަތް، މިއަދު ފެށިގެން ދާނެ ކަމަށް ވިދާޅުވިއެވެ.
"މަޝްރޫއުތުތައް ހަވާލުކުރަމުން، މަސައްކަތް ނިންމައި ހިދުމަތް ދިނުމުގައި އަވަދިނެތި ސަރުކާރުން ދެމިއޮތް، އެހެންކަމާއެކު ވެސް މަސައްކަތް ހަވާލުނުވެ، މިއަދާ ހަމައަށް ވަރަށް މަދު ރަށްތަކެއް ހުރި، އެއީ 16 ރަށެއްގެ ނަރުދަމާއާއި 23 ރަށެއްގެ ފެނުގެ ނިޒާމު،" ރައީސް ވިދާޅުވިއެވެ.
މިއަދު ސޮއިކުރެވުނު އެއްބަސްވުންތަކާއެކު، ރާއްޖޭގައި ފުރޮޅި އިންގިލާބު ވެގެން ދާނީ ތަރައްގީގެ މުޅިން އެހެން މަރުހަލާއެއް ކަމަށް ރައީސް ވިދާޅުވިއެވެ.
"ސައިޒުން ކުޑަޔަސް ނުވަތަ ބޮޑަސް، އަދި މީހުން މަދަސް ނުވަތަ ގިނަޔަސް، ސަރުކާރުން މިކަމުގައި ކުރި ފަރަގެއް، ތަފާތެއް، އިރާދަކުރެއްވިއްޔަކާ ނޯންނާނެ، އެހެންކަމުން މިއަދަށް ފަހު ފެނާއި ނަރުދަމާގެ މަސައްކަތް ހަވާލުނުކުރެވޭ މީހުން ދިރިއުޅޭ އެއްވެސް ރަށެއް ދިވެހިރާއްޖެއަކު ނޯންނާނެ،" ރައީސް ވިދާޅުވިއެވެ.
ރައީސް ވިދާޅުވީ މި މަޝްރޫއުތަކާއެކު ތަރައްގީގެ ވާހަކަ ދައްކަން ފަށާ ހިސާބުގައި، ގައިން ތާހިރުވުމުގެ ފެން މުޅި ރާއްޖެއަށް ހިނގަން ފަށާނެ ކަމަށެވެ.
ހުރިހާ ރަށެއްގެ ފެނާއި ނަރުދަމާގެ މަސައްކަތް ގާއިމް ކުރުމަކީ ނުހަނު ބުރަ ކަމެއް ކަން ފާހަގަކޮށް، އެކަމަށް ބުރަ މަސައްކަތްތަކެއް ވެސް ކުރަން ޖެހޭ ކަމަށް ރައީސް ވިދާޅުވިއެވެ.
މީގެ އިތުރުން ރައީސްގެ ވާހަކަފުޅުގައި ވަނީ މާލެ ސަރަހައްދަށް ދިމާވެފައިވާ ގޯތިގެދޮރުގެ މައްސަލައަށް ހައްލެއް ހޯދައިދެއްވާނެ ކަމަށް ވިދާޅުވާ ވާހަކަ ތަކުރާރުކުރައްވައިފައެވެ.
ރައީސް ވިދާޅުވީ ހުޅުމާލޭގައި މިހާރު ވެސް 5000 ފްލެޓު އެޅުމުގެ މަސައްކަތް ކުރިއަށް އެބަ ދާ ކަމަށާއި މާލޭގެ ރައްޔިތުންނަށް ގޯތި ދިނުމުގެ މަޝްރޫއު ވެސް ރާވައިފައިވާ ކަމަށެވެ. އެގޮތުން ގުޅީފަޅުގެ އިތުރުން ހުޅުމާލެއިން 4000 ގޯތި ދޭން ރާވައިފައިވާ ކަމަށް ވިދާޅުވިއެވެ.