27 Jan 2022, 20:21
ރާއްޖޭގައި ކޮވިޑަށް ފަރުވާ ހޯދަމުން ދިޔަ އިތުރު މީހަކު މަރުވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ މިއަދު މަރުވެފައި ވަނީ ހުޅުމާލޭ މެޑިކަލް ފެސިލިޓީގައި ފަރުވާދެމުން ދިޔަ 84 އަހަރުގެ އަންހެނެއް ކަމަށެވެ.
މި ބަލީގައި ރާއްޖެއިން އެންމެ ފަހުން މީހަކު ދުނިޔެ ދޫކޮށްފައި ވަނީ ރޭގައެވެ. އެއީ އުމުރުން 73 އަހަރުގެ ފިރިހެނެކެވެ. އޭނާއަކީ ވެސް ހުޅުމާލޭ މެޑިކަލް ފެސިލިޓީގައި ފަރުވާހޯދަމުން ދިޔަ މީހެކެވެ.
މިއާއެކު މިހާރު ރާއްޖޭގައި ކޮވިޑްޖެހިގެން މަރުވި މީހުންގެ އަދަދު މިވަނީ 274އަށް އަރާފައެވެ.
ރާއްޖެއިން ކޮވިޑަށް ޕޮޒިޓިވްވާ މީހުންގެ އަދަދު މިހާރު އަންނަނީ މަތިވަމުންނެވެ. އެގޮތުން މިވަގުތު މުޅި ރާއްޖެއިން މިބަލި ޖެހިގެން ފާއިތުވި 24 ގަޑިއިރުގެ ތެރޭގައި 2813އަށްވުރެ ގިނަ މީހުން ރިޕޯޓުކޮށްފައިވެއެވެ. މީގެ ތެރެއިން 1273އަށްވުރެ ގިނަ މީހުން ޕޮޒިޓިވްވެފައި ވަނީ މާލެ ސަރަހައްދުންނެވެ.