31 Jan 2022, 15:54
އެމްއެމްޕީއާރްސީ މެދުވެރިކޮށް ރ. ފުއްގިރި ދޫކުރިއިރު ރިޝްވަތުގެ ގޮތުގައި ފައިސާ ނަގައި މަނީލޯންޑާ ކުރި ކަމަށް ތުހުމަތުކޮށް ކުރީގެ ރައީސް އަބްދުﷲ ޔާމީންގެ މައްޗަށް މިދިޔަ އަހަރު ފަށާފައިވާ ޝަރީއަތުގެ ހުކުމް ޖޫން މަހު އިއްވުމަށް ތާވަލް ކޮށްފިއެވެ.
ކްރިމިނަލް ކޯޓުގައި ޝަރީއަތް ފަށާފައިވާ މި މައްސަލައިގެ ހުކުމް އިއްވުމަށް ކުރިން ވަކި ދުވަހެއް ނިންމާފައިނުވެއެވެ.
ޔާމީންގެ ގާނޫނީ ވަކީލަކު މިއަދު "ސަން" އަށް ވިދާޅުވީ ޖޫން މަހުގެ 30 ވަނަ ދުވަހުގެ ހެނދުނު އެ މައްސަލައިގެ ހުކުމް އިއްވުމަށް ނިންމައި މިއަދު އަންގާފައިވާ ކަމަށެވެ.
ވ. އާރަށް ކުއްޔަށްދޫކުރުމުގެ މުއާމަލާތާ ގުޅިގެން ޔާމީންގެ މައްޗަށް އުފުލާފައިވާ ދެ ދައުވާގެ ހުކުމް އިއްވުން ވެސް މިއަދު ވަނީ އަވަސްކޮށްފައެވެ. އެ މައްސަލައިގެ ހުކުމް އިއްވަން ކުރިން ފަނޑިޔާރު ތާވަލު ކުރެއްވީ އަންނަ ނޮވެމްބަރު މަހުގެ 25 އަށެވެ. ނަމަވެސް މިއަދު ވަނީ ޖޫން މަހުގެ 30 ވަނަ ދުވަހު ހުކުމް އިއްވުމަށް ނިންމައި މައްސަލަ އަވަސް ކޮށްފައެވެ.
ފުއްގިރި މައްސަލައިގައި ދައުވާ އުފުލީ އެ ރަށް ޓޫރިސްޓު ރިސޯޓެއްގެ ގޮތުގައި ތަރައްގީކުރަން ކުއްޔަށް ދޫކުރުމުގެ މުއާމަލާތުގައި ޔާމީން، މަގާމުގެ ނުފޫޒު ބޭނުން ކުރައްވައި 1.1 މިލިއަން ޑޮލަރު ހޯދައި، އެ ފައިސާ ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމެންޓް ޕްރައިވެޓް ލިމިޓެޑް ބޭނުންކޮށް ލޯންޑަކުރި ކަމަށް ތުހުމަތު ކުރެވޭތީއެވެ.
އެ މައްސަލާގައި ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމަންޓްސްގެ މައްޗަށް ކުރާ ތުހުމަތުތައް އެ ދެ ކުންފުނިން ވަނީ ދޮގުކޮށްފައެވެ.
ޔާމީންގެ މައްޗަށް ހުކުމް އިއްވުން ކުއްލިއަކަށް އަވަސް ކޮށްފައިވާއިރު އެމަނިކުފާނުގެ ގާނޫނީ ވަކީލު އާދަމް އާސިފް މިއަދު "ސަން"އަށް ވިދާޅުވީ ހުކުމް އަވަސްކުރީ ސަރުކާރާއި ޖޭއެސްސީ އަދި މަޖިލީހުގެ ޖުޑީޝަރީ ކޮމިޓީން ނުފޫޒުފޯރުވައިގެން ކަމަށެވެ.
"ސަރުކާރުގެ ބައެއް ކުންފުނިތަކުގެ މެނޭޖިން ޑިރެކްޓަރުން ވިދާޅުވެފައި ވަނީ ރޯދައިގެ ކުރިން ރައީސް ޔާމީން ޖަލަށްލާނެ ކަމަށް. އަދި މަޖިލީހުގެ ޖުޑިޝަރީ ކޮމިޓީން ވަނީ ރައީސް ޔާމީންގެ މައްސަލަ މިހާރަށްވުރެ އަވަސްކުރުމަށް ދައުރުން ބޭރުން ކޮމިޓީގެ ބައްދަލުވުމެއް ބާއްވައި ޝަރީއަތާ ގުޅޭ ފަރާތްތައް އެ ކޮމިޓީއަށް ހާޒިރުކުރަން ނިންމާފައި. މިއީ ނުފޫޒު ފޯރުވުން ނޫން ކަމަށް ބެލެވޭނެ އެއްވެސް ގޮތެއް ނޯންނާނެ،" އާސިފް ވިދާޅުވިއެވެ.
ޔާމީން ޖަލަށް ލުމަށް ސަރުކާރުން މަސައްކަތް ކުރަނީ "އިންޑިއާ އައުޓް" ކެމްޕެއިން ހުއްޓުވަން ކަމަށް ވެސް އިދިކޮޅުން ތުހުމަތު ކުރެއެވެ.
މީގެ ކުރިން ރައީސް ޔާމީންގެ މައްޗަށް ކުރި މަނީ ލޯންޑަރިންގެ ދައުވާއެއް ވަނީ ކުރިމިނަލް ކޯޓާއި ހައި ކޯޓްގައި ސާބިތުވެފަ އެވެ. އެހެންވެ ފަސް އަހަރަށް ޖަލަށްލިއެވެ. ނަމަވެސް ފަހުން ސުޕްރީމް ކޯޓުން ވަނީ އެ ހުކުމް ބާތިލް ކޮށްފައެވެ.