02 Feb 2022, 17:28
އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ބައި-އިލެކްޝަންތަކުގައި، ކޮވިޑް-19 އަށް ޕޮޒިޓިވް މީހުނާއި ކަރަންޓީނުގައި ތިބޭ މީހުން ވޯޓުލާން ދާއިރު ރައްކާތެރިކަމުގެ ފިޔަވަޅު އަޅަން އިލެކްޝަންސް ކޮމިޝަނުން އެދެފިއެވެ.
އަންނަ ހޮނިހިރު ދުވަހު ބާއްވާ ބައި އިލެކްޝަން އަކީ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަނާއި، ތ. ވިލުފުށި އަދި ގއ. ގެމަނަފުށީ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަންގައި ވޯޓުލުމެވެ.
އެ ކޮމިޝަނުން އިއްޔެ ކުރި އިއުލާނެއްގައި ބުނީ، ވޯޓުލުމަށް ރަޖިސްޓަރީވެފައިވާ މީހުންގެ ތެރެއިން ކޮވިޑް-19އަށް ޕޮޒިޓިވް ވެފައިވާ މީހުންނާއި ކަރަންޓީނުގައި ތިބޭ މީހުން ވޯޓުލުމަށް ކަނޑައެޅިފައިވަނީ، ހޮނިހިރު ދުވަހުގެ 15:00 އިން 16:00 އަށް ކަމަށެވެ.
އެފަދަ މީހުން ވޯޓުލާ މަރުކަޒަށް ވޯޓުލުމަށް ދާއިރު ހެލްތު ޕްރޮޓެކްޝަން އެޖެންސީން ކަނޑައަޅާފައިވާ ރައްކާތެރިކަމުގެ ފިޔަވަޅުތައް އަޅައިގެން ދިއުމަށް އިލެކްޝަންސް ކޮމިޝަނުން ވަނީ އެދިފައެވެ.
އަންނަ ހޮނިހިރު ދުވަހި ބާއްވަން ހަމަޖެހިފައިވާ ކޮމަންޑޫ ދާއިރާގެ ބައި އިލެކްޝަނުގެ ވޯޓުލާ ދުވަސް ކައިރިވާއިރު، އެ ދާއިރާގެ ކެމްޕޭން ފޯރި އަންނަނީ ގަދަވަމުންނެވެ. ވެރިކަން ކުރާ އެމްޑީޕީން ކޮމަންޑޫ ދާއިރާގައި ގިނަ މަޝްރޫތުތަކެއް ހިންގަން ފަށާފައި ވާއިރު، އިދިކޮޅު ޕާޓީތަކުން ދަނީ ވައުދުތައް ވަމުންނެވެ. އިންތިޚާބު ކައިރިވެފައިވަނިކޮށް ސަރުކާރުން އެކި ކަހަލަ މަޝްރޫޢުތައް އެ ދާއިރާގައި ކުރިއަށް ގެންދާތީ އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
ރައްޔިތުންގެ މަޖިލީހުގައި ކޮމަންޑޫ ދާއިރާ ތަމްސީލުކުރާ ގޮނޑި ހުސްވީ އެ ދާއިރާގެ މެންބަރުކަމުގައި ހުންނެވި ހުސައިން ވަހީދު އަވަހާރަވުމުންނެވެ.