05 Feb 2022, 13:37
އުރީދޫ މޯލްޑިވްސް އިން މިދިޔަ އަހަރުގެ ފައިދާގެ ތެރެއިން ކޮންމެ ހިއްސާއަކަށް 2.70 ރުފިޔާ ދިނުމަށް އެ ކުންފުނީގެ ބޯޑުން ނިންމައިފިއެވެ.
މިދިޔަ އަހަރުގެ ހިއްސާ ލިބޭނީ މިމަހުގެ 17ވަނަ ދުވަހާ ހަމަައަށް ހިއްސާދާރުންގެ ގޮތުގައި ތިބޭ ފަރާތްތަކަށް ކަމަށް އުރީދޫން ބުނެއެވެ.
އެ ކުންފުނިން ނެރުނު ބަޔާނުގައި ބުނެފައި ވަނީ އެ ބައްދަލުވުމުގައި މިދިޔަ އަހަރުގެ މާލީ ހިސާބުތައް ވެސް ފާސް ކުރެވިފައިވާ ކަމަށެވެ. އެ ހިސާބުތައް މިމަހުގެ އަށްވަނަ ދުވަހުގެ ކުރިން ޝާއިއު ކުރެވޭނެ ކަމަށް ވެސް އެ ބަޔާނުގައި ވެއެވެ.
މި ހިސާބުތަކާއި، އެހެނިހެން ނިންމުންތައް މާޗު މަހު އޮންނަ އަހަރީ ޖަލްސާގައި ހިއްސާދާރުންނަށް ހުށަހެޅޭނެ ކަމަށް ވެސް އެ ކުންފުނިން ބުނެއެވެ.
މާޗު މަހު އޮންނަ އަހަރީ އާންމު ޖަލްސާގެ ޔައުމިއްޔާއާއި، ޖަލްސާގެ ތާރީހު ހިމެނޭ ނޯޓިސް މިމަހުގެ 20ގެ ކުރިން އުރީދޫގެ ވެބްސައިޓުގައި ޝާއިއު ކުރެވޭނެއެވެ.