06 Mar 2022, 19:31
މޯލްޑިވްސް ސްޕޯޓްސް އެވޯޑްްސް ހަފްލާގައި ބައިވެރިވުމަށް ބްރިޓިޝްގެ ޕްރޮފެޝަނަލް ވީލް ޗެއާ ޓެނިސް ކުޅުންތެރިޔާ ގޯޑޮން ރެއިޑަށް ދިން ދައުވަތު އޭނާ ގަބޫލުކޮށްފިއެވެ.
ޔޫތު މިނިސްޓަރު އަހުމަދު މަހްލޫފް ކުރެއްވި ޓުވީޓެއްގައި ވަނީ ހަފްލާގައި ބައިވެރިވުމަށް ރެއިޑަށް ދިން ދައުވަތު އޭނާ ގަބޫލުކޮށްފައިވާތީ އެކަމަށް ޝުކުރު އަދާކުރާ ކަމަށެވެ.
ރެއިޑަކީ ވީލް ޗެއާ ޓެނިސްގެ ސިންގަލްސް ބައިން ދުނިޔޭގެ ހަތަރު ވަަނައިގައި ރޭންކުކޮށްފައިވާ ކުޅުންތެރިއެކެވެ. އަދި އޭނާ ވަނީ ޑަބަލްސް ބައިން ދުނިޔޭގެ އެއް ވަނައިގައި ރޭންކު ކޮށްފައެވެ.
އުމުރުން 30 އަހަރުގެ ރެއިޑް ހޯދާފައިވާ ކާމިޔާބީތަކަށް ބަލާއިރު، އޭނާ ވަނީ ޕެރަލިމްޕިކްގެ ރަން މެޑަލް ހޯދާފައެވެ. އޭގެ އިތުރުން ޕެރަލިމްޕިކްގެ ރިހި މެޑަލް އާއި ބްރޮންޒް މެޑަލް ވެސް އޭނާ ވަނީ ހޯދާފައެވެ.
އޭނާ ވަނީ ސިންގަލް ބައިން ގްރޭންޑް ސްލޭމްގެ ޗެމްޕިއަންކަން ހޯދާފައެވެ. އޭގެ އިތުރުން އޭނާ ވަނީ ޑަބަލްސް ބައިން ގްރޭންޑް ސްލޭމްގެ ޗެމްޕިއަންކަން 18 ފަހަރު ހޯދާފައެވެ.
ގޯޑޮން ރެއިޑް --
މޯލްޑިވްސް ސްޕޯޓްސް އެވޯޑްސް ހަފްލާގައި ދުނިޔޭގެ މަޝްހޫރު ކުޅުންތެރިންނާއި ލެެޖެންޑުން ބައިވެރިވާއިރު، މިހާރު އަންނަނީ އެ މީހުންގެ ނަންތައް ހާމަކުރަމުންނެވެ. ރެއިޑްގެ އިތުރުން މިހާތަނަށް ވަނީ ތިން މީހެއްގެ ނަން ހާމަކޮށްފައެވެ. އެއީ ސްވިޑެންގެ މަޝްހޫރު ފެތުންތެރިޔާ ސާރާ ޚޮރޮސްޓްރޮމް، ސްޕެއިންގެ ފުޓުބޯޅަ ލެޖެންޑް މިޝޭލް ސަލްގާޑޯ އަދި ބްރެޒިލްގެ ވޮލީ ލެޖެންޑް ގިލްބާޓޯ ގޮޑޮއީ (ގިބާ) އެވެ.
މީގެ އިތުރުންވެސް އަދި އެހެނިހެން ކުޅިވަރުތަކުގެ ލެޖެންޑުންނާއި ރެކޯޑް ހޯލްޑަރުން މި ހަފްލާގައި ބައިވެރިވާނެއެވެ. މިއީ މިފަދަ މީހުންނާއެކު ރާއްޖޭގައި ކުޅިވަރު އެވޯޑެއް ބާއްވާ ފުރަތަމަ ފަހަރެވެ.