20 Mar 2022, 19:22
ބެއިޖިންގް (20 މާޗް 2022) : ޔުކްރޭން ހަނގުރާމައަށް ދަރުއެޅުމަކީ އެހަނގުރާމަ ދިގުދެމިގެންދާނެ ކަމެއް ކަމަށާ ޗައިނާގެ ސިޔާސަތަކީ އެހަނގުރާމަ ހުއްޓުވުން ކަމަށް އެގަމުން ބުނެފިއެވެ.
ޗައިނާގެ ޚާރިޖީ ވަޒީރު ވާންގް ޔީ ވިދާޅުވީ ޔުކްރޭން ހަނގުރާމައަށް ދަރުއެޅުމަކީ (ޔުކްރޭނަށް ހަތިޔާރު ފޯރުކޮށްދިނުމަކީ) އެހަނގުރާމަ ދިގުދެމިގެންދާނެ ކަމެއްކަމަށާ އޭގެބަދަލުގައި ހުރިހާ ފަރާތްތަކަކުންވެސް މަސައްކަތް ކުރަންވީ ޔުކްރޭން ހަނގުރާމަ ހުއްޓުވައި ރަޝިއާއާއި ޗައިނާ ސުލްހަ ކުރުވަންކަމަށް ވާންގް ޔީ ވިދާޅުވިއެވެ. މިއީ އޭނާ އެމެރިކާއަށް ކުރެއްވި އިޝާރާތެއްކަމަށްވަނީ ބެލެވިފައެވެ.
ވާންގް ޔީ މިހެން ވިދާޅުވީ ޔުކްރެއިން ހަނގުރާމައާބެހޭގޮތުން އެމެރިކާގެ ރައީސް ޖޯ ބައިޑެން، ޗައިނާގެ ރައީސް ޝީ ޖިންޕިންއާ އިއްޔެ ކުރެއްވި މަޝްވަރާތަކާބެހޭ މައުލޫމާތު ނޫސްވެރިންނަށް ހާމަކުރައްވަމުންނެވެ. ބައިޑެން އާއި ޝީގެ ވާހަކަތައް ދެގަޑީއިރަށް ކުރިޔަށްދިޔައިރު އެމެރިކާ ރަޝިއާއާ ދެކޮޅަށް އަޅާފައިވާ ފިޔަވަޅުތަކުގެ ބާރު ކަނޑުވާލެވޭފަދަ ގޮތަކަށް ޗައިނާއިން ރަޝިއާއަށް އެއްބާރުލުން ނުދިނުމަށް ބައިޑެން، ޝީއަށް އިންޒާރު ކުރެއްވިކަމަށް މީޑިއާ ރިޕޯޓްތައް ބުނެއެވެ.
އަދި ޗައިނާއިން ރަޝިއާއަށް އެހީތެރިވެއްޖެނަމަ އެމެރިކާގެ ދަތިކުރުމުގެ ފިޔަވަޅުތަކާ ޗައިނާ ކުރިމަތިލާންޖެހޭނެކަމުގެ އިންޒާރުވެސް ބައިޑެން، ޝީއަށް ދެއްވި ކަމަށް އެމެރިކާގެ ބައެއް މަސްދަރުތަކުން ކަށަވަރުކޮށްދީފައި ވެއެވެ. ނަމަވެސް މިފަދަ ވާހަކައެއް ޗައިނާގެ ޚާރިޖީ ވަޒީރު ވާންގް ޔީ ސީދާ ގޮތެއްގައި ވިދާޅެއް ނުވެއެވެ.
ޗައިނާގެ ނޫސްތަކުންވަނީ އެމެރިކާ މިހާރުވެސް ޗައިނާއާ ދިމާކުރުމަށްޓަކައި ދެ ގްރޫޕެއް (ކުއަޑް ގުރޫޕް އާއި އަކުއަސް ގްރޫޕް) ހަދައިގެން ޗައިނާ އާ ދެކޮޅަށް މަސައްކަތްކުރުމުގެ އިތުރުން އަސްކަރީ މަނަވަރުތައް ޗައިނާގެ ބަނޑުދަށަށް (ދެކުނު ޗައިނާ ކަނޑަށް) ފޮނުވައިގެން ޗައިނާއަށް ޖެއްސުންވެސް ކުރާއިރު، ޗައިނާގެ ކިބައިން މިފަދަ ކަންކަމަށް އެދުމަކީ އެމެރިކާގެ ނުކުޅެދުންތެރިކަން ކަމަށް ސިފަކޮށް އެމެރިކާއަށް ފާޑުކިޔާފައެވެ.
މިކަމަށް އިޝާރާތް ކުރައްވައި ޗައިނާގެ ޚާރިޖީ ވަޒީރު ވިދާޅުވީ އެއްވެސް ގައުމަކުން އަނެއް ގައުމަކާ ދެކޮޅަށް ފިއްތުންތައް ކުރިމަތި ކުރުމަށް ނޫނީ ފިޔަވަޅުތައް އެޅުމަށް ޗައިނާގެ ކިބައިން އެދިގެން ނުވާނެކަމަށާ އެފަދަ ކަމަކަށް އެދުނު ނަމަވެސް އެކަމަށް ޗައިނާގެ އެއްބާރުލުން ނުލިބޭނެ ކަމުގައެވެ. މިއީ އެމެރިކާއަށް ކުރެއްވި އިޝާރާތެއްކަމަށްވަނީ ބެލެވިފައެވެ.
ރަޝިއާ ޔޫކްރޭން އާ ދެކޮޅަށް ހަނގުރާމަ ފެށުމުން އެމެރިކާއާއި ޔޫރަޕުންވަނީ ރަޝިއާއާ ދެކޮޅަށް ދަތިކުރުމުގެ ހަރުކަށި ފިޔަވަޅުތަކެއް އަޅާފައެވެ. ނަމަވެސް އެ ފިޔަވަޅުތައް ތަންފީޒުކުރުމުގައި ޗައިނާގެ އެއްބާރުލުން ނުލިބޭނަމަ އޭގެ މާބޮޑު އަސަރެއް ރަޝިއާއަށް ނުކުރާނެކަން އެމެރިކާއަށް އެނގެއެވެ. މިއާއެކު އެމެރިކާ އެދޭފަދަ އެއްބާރުލުން ޗައިނާގެ ކިބައިން ނުލިބޭނެކަމުގެ ކަންބޮޑުވުން އެމެރިކާގެ މަސްއޫލުވެރިން ގެންދަވަނީ އިހްސާސް ކުރައްވަމުންނެވެ.
އެމެރިކާ އާއި ޔޫރަޕްގެ އިގްތިސާދީ ބާރު ޗައިނާގެ ކުރިމަތީގައި މިހާ ބަލިކަށި ނަމަވެސް އެމެރިކާ އަދިވެސްގެންދަނީ ޗައިނާގެ ކިބައިން ރިވެތިކޮށް ކަންކަމަށް އެދުމުގެ ބަދަލުގައި އަމުރުވެރިގޮތެއްގައި ޗައިނާއަށް ކަންކަން އަންގައި އެގޮތަށް އަމަލުނުކޮށްފިނަމަ ދަތިކުރުމުގެ ފިޔަވަޅުތައް އަޅާނެކަމުގެ އިންޒާރުތައް ދެމުންނެވެ.
އެމެރިކާ މިގޮތަށް އިންޒާރު ދިންނަމަވެސް ޗައިނާއާ ދެކޮޅަށް އެމެރިކާއަށް އެޅޭނެ މާބޮޑު ފިޔަވަޅުތަކެއް ނޯންނާނެ ކަމަށް ތަޖްރިބާކާރުން ވިދާޅުވެއެވެ.