01 Apr 2022, 22:23
ބަރަކާތްތެރި ރަމަޟާން މަހުގެ ބޭނުން އެންމެ ހެޔޮ ގޮތުގައި ހިފުމަށް، އެމްޑީއޭގެ ލީޑަރު އަދި ދ. މީދޫ ދާއިރާގެ މެންބަރު އަޙްމަދު ސިޔާމް މުޙައްމަދު އިލްތިމާސްކުރައްވައިފިއެވެ.
ރޯދަ މަހުގެ ތަހުނިޔާ ފޮނުއްވަވައި ސިޔާމް ދެއްވެވި ޚިޠާބުގައި ވިދާޅުވީ ރޯދަ މަހަކީ ކީރިތިﷲ، އަޅުގަނޑުމެންނަށް މަތިވެރިކުރައްވަވާފައިވާ ވަރަށް މާތް، އަދި އޭގައި އެތައް ރޫޙާނީ ފައިދާތަކެއް ހިމެނޭ މައްސަރެއް ކަމަށެވެ.
މި ބަރަކާތްތެރިވެގެންވާ މައްސަރަކީ، ﷲ ޛުލްޖަލާލުގެ ރަޙްމަތާއި މަޣުފިރަތު މުސްލިމުންގެ މައްޗަށް އޮހޭ މައްސަރެއް ކަން ފާހަގަކުރައްވައި، މި މަހުގެ ބޭނުން އެންމެ ހެޔޮ ގޮތުގައި ހިފުމަށް ސިޔާމް އިލްތިމާސްކުރެއްވިއެވެ.
"މިފަދަ ބޮޑު ނިޢުމަތެއް އެކުލެވިގެންވާ މައްސަރުގެ ބޭނުން ފުރިހަމަ ގޮތުގައި ހިފުމަށްޓަކައި، ރޯދައިގެ މަތިވެރިވެގެންވާ އަޅުކަން އަދާކޮށް، ނަމާދުކޮށް ކީރިތި ޤުރުއާން ކިޔަވައި، ވީހާވެސް ގިނައިން ޞަދަޤާތްކޮށް، ހެޔޮކަންތައްތަކަށް އަމުރުކޮށް، ނުބައި ކަންތައްތައް ނަހީކުރާ ބަޔަކު ކަމުގައި އަޅުގަނޑުމެން ވާން ވާނެ،" ސިޔާމް ވިދާޅުވިއެވެ.
ހަމައެހެންމެ މި މައްސަރަކީ އަހަރެމެންގެ ދިރިއުޅުމަށް ބޮޑެތި ބަދަލުތަކެއް އަންނަ މައްސަރެއް ކަމަށްވުމާއެކު، އިސްރާފު ކުޑަ ކުރުމަށް ވެސް ސިޔާމް އިލްތިމާސް ކުރައްވައިފައިވެއެވެ.