09 Apr 2022, 11:44
ކޮންމެ އަހަރަކު ވެސް ރަމަޟާންމަހު ސައުދި އަރަބިއްޔާއިން ރާއްޖެއަށް ހަދިޔާ ކުރާ ކަދުރު މިއަހަރު ލިބޭނީ ރޯދަމަހުގެ ފަހުދިހައިގައި ކަމަށް އިސްލާމިކް މިނިސްޓްރީން ބުނެފިއެވެ.
"ސަން" އާ ވާހަކަދައްކަވަމުން އިސްލާމިކް މިނިސްޓްރީގެ މީޑިއާ އޮފިޝަލް އިސްމާޢީލް އަފްރާހު ވިދާޅުވީ ކަދުރުލިބުން މިއަހަރު ލަސްވާ ސަބަބެއް ނޭނގޭ ކަމަށެވެ.
"ސައުދީ އެމްބަސީން ބުނެފަ ވަނީ މިހާރު ކަދުރު ޝިޕް ކޮށްފި ކަމަށް. ލިބޭނެ ކަމަށް މި ބަލަނީ ރޯދަމަހު ފަހުދިހައަށް،" އޭނާ ވިދާޅުވިއެވެ.
އާންމުކޮށް ސައުދީން ރާއްޖެއަށް ހަދިޔާކުރަނީ 50ޓަނުގެ ކަދުރެވެ. ނަމަވެސް މިދިޔަ އަހަރު ހަދިޔާކުރީ 25 ޓަނުގެ ކަދުރެވެ. މިއަހަރު ހަދިޔާކުރަނީ ކިހާ އަދަދެއްގެ ކަދުރުކަން އަދި ނޭނގޭ ކަމަށް އަފްރާހު ވިދާޅުވިއެވެ.
"އެ މައުލޫމާތު ލިބުނުވަރަކުން އަޅުގަނޑުމެން ހިއްސާކުރާނަން،" އޭނާ ވިދާޅުވިއެވެ.