17 Apr 2022, 13:08
ކާބުލް (17 އެޕްރީލް 2022): ޕާކިސްތާނުން އިއްޔެ އަފްޣާނިސްތާނަށް ދިން ވައިގެ ހަމަލާތަކުގައި 36 މީހުން މަރުވެފައިވާތީ އެގައުމުގެ ތާލިބާން ސަރުކާރުން ޕާކިސްތާން ވަރަށް ބޮޑަށް ކުށްވެރިކޮށްފިއެވެ.
އަފްޣާނިސްތާނުގެ ޚާރިޖީ ވުޒާރާއިން ބުނެފައިވަނީ ޕާކިސްތާނުގެ އަސްކަރީ މަތިންދާ ބޯޓުތަކުން އަފްޣާން ވައިގެ ސަރަހައްދަށް ގަވައިދާ ޚިލާފަށްވަދެ އުދުވާން ހިންގައި އާންމުން މެރުމަކީ ބަލައިގަނެވޭނެ ކަމެއްނޫންކަމަށާއި މަރުވި 36 މީހުންގެ މަރުގެ ޒިންމާ ޕާކިސްތާނުން އުފުލަންޖެހޭނެ ކަމުގައެވެ.
މިމައްސަލާގައި އަފްޣާން ޚާރިޖީ ވުޒާރާއިންވަނީ ކާބުލްގައި ހުންނަވާ ޕާކިސްތާނުގެ ސަފީރު ހާޒިރުކޮށް އިހްތިޖާޖުގެ ލިޔުމެއް އޭނާއާ ހަވާލުކޮށް މިފަދަ އިތުރު އުދުވާނެއް ނުހިންގުމަށް ސަފީރު މެދުވެރިކޮށް ޕާކިސްތާނަށް އިންޒާރުދީފައެވެ.
ޕާކިސްތާނުގެ ސިފައިން ބުނާގޮތުން އަފްޣާނިސްތާނަށް ހަމަލާދޭން ޖެހުނީ އެގައުމުގެ ސަރަހައްދު ބޭނުންކޮށްގެން ޕާކިސްތާނުގެ ޓެރަރިސްޓު ޖަމާއަތެއްކަމަށްވާ ޕާކިސްތާން ތާލިބާނުންގެ ހަނގުރާމަވެރިން ޕާކިސްތާނަށް ހަމަލާދީ ޕާކިސްތާނު ސިފައިންގެ ހަތް މީހުން މަރާލުމުން އެކަމަށް ރައްދު ދިނުމުގެ ގޮތުންނެވެ.
ޕާކިސްތާނުގެ ބޮޑުވަޒީރު ޝެނެބާޒް ޝަރީފު
ރައްދު ހަމަލާދިނީ ޕާކިސްތާން ތާލިބާނުންގެ މަރުކަޒުތަކަށް ކަމަށާއި އަފްޣާން އާންމުންނަށް ނޫންކަމަށްވެސް ޕާކިސްތާން ސިފައިން ނެރުނު ބަޔާނެއް ބުނެއެވެ. ނަމަވެސް ޕާކިސްތާނުގެ ހަމަލާތަކުގައި އަފްޣާން އާންމުންގެ 36 މީހުން މަރުވެ އެތައް ބަޔަކު ޒަޚަމްވިކަމަށް އަފްޣާން ދިފާއީ ވުޒާރާއިން ބުނެފައިވެއެވެ.
އަފްޣާނިސްތާނުގައި ވެރިކަންކުރާ ތާލިބާން ޖަމާއަތަކީ ޕާކިސްތާނުގެ ޓެރަރިސްޓް ޖަމާއަތެއްކަމަށްވާ ޕާކިސްތާން ތާލިބާން ޖަމާއަތާ ކުރިން ގުޅުންތައް އޮތް ޖަމާއަތެކެވެ. ނަމަވެސް ތާލިބާނުން އަފްޣާން ވެރިކަމާ ހަވާލުވުމަށްފަހު މި ގުޅުންތައްވަނީ ހީނަރުވެފައެވެ.
ޕާކިސްތާން ތާލިބާނުންގެ އިތުރުން ޕާކިސްތާނުގައި ވަކިވެގަތުމަށް މަސައްކަތްކުރާ ސަރަހައްދެއްކަމަށްވާ ބަލޫޗިސްތާން ހަނގުރާމަވެރި ޖަމާއަތްތަކުންވެސް އަފްޣާނިސްތާނުގެ ސަރަޙައްދުތައް ބޭނުންކޮށްގެން ޕާކިސްތާނަށް ހަމަލާތައް ދެމުންގެންދެއެވެ.
އަފްޣާނިސްތާނުގެ ތާލިބާން ސަރުކާރު ބުނާގޮތުން ޕާކިސްތާނުގެ ހަނގުރާމަވެރި ޖަމާއަތްތައް އަފްޣާނިސްތާނުގެ ބިން ބޭނުންކޮށްގެން ޕާކިސްތާނަށްދޭ ހަމަލާތައް ހުއްޓުވުމަށް ޓަކައި ގިނަ ފިޔަވަޅުތަކެއްވަނީ އަޅައިފައެވެ. ނަމަވެސް މިފަދަ ޖަމާއަތްތަކުން އަފްޣާނިސްތާނަށް ވަދެ އަފްޣާން ބިން ބޭނުންކޮށްގެން ޕާކިސްތާނަށްދޭ ހަމަލާތައް އަފްޣާން ބިމުން ޕާކިސްތާނަށް އަމާޒުވަމުންދާތީ، އަފްޣާނިސްތާނުގެ ސަރަޙައްދީ ރޮނގު ހުރަސްކޮށް ޕާކިސްތާން ސިފައިން އެފަދަ ޖަމާއަތްތަކަށް ދޭ ހަމަލާތައް މިފަހަކަށް އައިސްވަނީ އިތުރުކޮށްފައެވެ.