25 Apr 2022, 12:50
ގިނަ އަހަރުތަކަކަށް ފަހު, ނެޓްފްލިކްސްގެ ސަބްސްކްރައިބަރުންގެ އަދަދު މަދުވެ، އެކުންފުނީގެ ހިއްސާގެ އަގު 25 ޕަސެންޓު ދަށްވެއްޖެއެވެ.
މިއީ މީގެ ހަ އަހަރު ކުރިން ނެޓްފްލިކްސްގެ ޚިދުމަތް ގިނަ ގައުމުތަކަށް ފުޅާ ކުރި ފަހުން ނެޓްފްލިކްސްގެ ސަބްސްކްރައިބަރުންގެ އަދަދު މަދުވި ފުރަތަމަ ފަހަރެވެ.
މިދިޔަ ހަފުތާގައި ނެޓްފްލިކްސްއިން އެ ކުންފުނީގެ އާމްދަނީއާ ބެހޭ ގޮތުން ނެރުނު ރިޕޯޓުގައިވާ ގޮތުން ޖެނުއަރީ އަދި މާޗް މަހުގެ ތެރޭގައި ނެޓްފްލިކްސްގެ 200،000 ސަބްސްކްރައިބަރުން އެ ޚިދުމަތް ދޫކޮށްލާފައިވެއެވެ.
ނެޓްފްލިކްސްގެ ސަބްކްސްކްރައިބަރުންގެ އަދަދު މަދުވި އެއް ސަބަބަކީ، ޔޫކްރޭން ހަނގުރާމައާ ގުޅިގެން އެ ކުންފުނިން ރަޝިއާއަށް ޚިދުމަތް ދިނުން ހުއްޓާލާފައިވާތީއެވެ.
ނެޓްފްލިކްސް އިން ލަފާކުރާ ގޮތުގައި އަންނަ މަހާއި ޖޫން މަހުގެ ތެރޭގައި އިތުރު ދެ މިލިއަން ސަބްސްކްރައިބަރުން އެ ޚިދުމަތް ބޭނުން ކުރުން ހުއްޓާލާނެއެވެ.
ނެޓްފްލިކްސް ބޭނުންކުރާ މީހުންގެ އަދަދު މަދުވަމުން ދަނީ، އެ ޚިދުމަތް ބޭނުން ކުރެވޭ ގޮތަށް ބަދަލު ގެންނަމުންދާ ދަނޑިވަޅެއްގައެވެ. އެގޮތުން އެންމެ އެކައުންޓަކުން ގިނަ ބަޔަކު އެ ޚިދުމަތް ބޭނުންކުރުން ހުއްޓުވުމުގެ ގޮތުން، ނެޓްފްލިކްސްއިން ވަނީ ވަކި ފީއެއް ދެއްކުމުން ނޫނީ އެއް އެކައުންޓު ބޭނުން ކުރެވޭ މީހުންގެ އަދަދު އިތުރު ނުކުރެވޭ ގޮތަށް ހަދާފައެވެ. މިވަގުތު އެ ބަދަލު ގެނެސްފައި ވަނީ ޗިލީ، ޕެރޫ އަދި ކޮސްޓަރިކާގައެވެ.
މީގެ އިތުރުން، އިތުރު ފީ އަކާއިނުލައި ނެޓްފްލިކްސްއިން ވީޑިއޯ ގޭމްތައް ކުޅެވޭނެ އިންތިޒާމު ހަމަޖެއްސުމަށް ވެސް އެ ކުންފުނިން ދަނީ މަސައްކަތް ކުރަމުންނެވެ.