26 Apr 2022, 10:46
އެމްއެމްޕީއާރުސީ މައްސަލަ އާއި ވެންޓިލޭޓަރުގެ ޚިޔާނާތުގެ މައްސަލަ ބެލިއްޖެނަމަ ސަރުކާރަށް އިތުބާރުލިބޭނެ ކަމަށް އެމްޑީޕީގެ ރައީސް އަދި މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އެމަނިކުފާނު އިއްޔެ ކުރެއްވި ޓްވީޓެއްގައި ވިދާޅުވީ އެމްޑީޕީއާއި އެ މަނިކުފާނު ބޭނުންފުޅުވަނީ ވަރަށް އާދައިގެ ކަންކަން ކަމަށެވެ. އެއީ އެއްވެސް ސަރުކާރަކުން ޚިޔާނާތްތެރި ނުވުމާއި އެކަކު އަނެކަކު ތަފާތު ނުކުރުން ކަމަށް އެ ޓްވީޓުގައިވެއެވެ.
"އަނިޔާވެރި ނުވުން. އެމްއެމްޕީއާރުސީ މައްސަލަ އާއި ވެންޓިލޭޓަރުގެ މައްސަލަ ބެލުން އެއީ އިތުބާރުލިބޭނެ ކަމެއް،" އެ ޓްވީޓުގައިވެއެވެ.
ރައީސް ނަޝީދު ވަނީ މީގެ ކުރިން ވެސް އެތައް ފަހަރަކު ޚީޔާނާތުގެ މައްސަލަތައް ބަލަން ގޮވާލައްވާފައެވެ. އެގޮތުން އެމްއެމްޕީއާރްސީ ޚިޔާނާތުގެ މައްސަލަ ރަނގަޅަށް ތަހުގީގު ނުކުރެވޭނަމަ، ދައުލަތް ފެއިލް ވާނެ ކަމަށް މީގެ ކުރިން އެމަނިކުފާނު ވިދާޅުވިއެވެ. އަދި ވައްކަންކުރާ ސަރުކާރަކާ އެކީ އެމްޑީޕީ އޮންނާކަށް ނޭދޭނެ ކަމަށްވެސް އެމަނިކުފާނު ވަނީ ވިދާޅުވެފައެވެ.
ވެންޓިލޭޓަރު މައްސަލާގައި ދޫ ނުދެއްވާނެ ކަމަށް ވެސް ރައީސް ނަޝީދު މީގެކުރިން ވިދާފާޅުވެފައިވެއެވެ.