30 Apr 2022, 15:24
މި އަހަރުގެ ފުރަތަމަ ކުއާޓަރުގައި އެސްޓީއޯއަށް 150 މިލިއަން ރުފިޔާ ސާފު ފައިދާގެ ގޮތުގައި ލިބިއްޖެއެވެ.
އެ ކުންފުނިން މިއަދު އާންމުކުރި ތަފާސް ހިސާބުތަކުގައި ވާގޮތުން އެއީ މިދިޔަ އަހަރުގެ ފަހު ކުއާޓަރާ އަޅާބަލާއިރު 15 އިންސައްތައިގެ ކުރިއެރުމެކެވެ.
މިދިޔަ ކުއާޓަރުގައި އެސްޓީއޯއަށް ޖުމްލަ އާމްދަނީގެ ގޮތުގައި ހަތަރު ބިލިއަން ރުފިޔާ ލިބުނެވެ. އެއީ އޭގެ ކުރީ ކުއާޓަރާ އަޅާބަލާއިރު 23 އިންސައްތައިގެ ކުރިއެރުމެކެވެ.
އެސްޓީއޯއިން ބުނީ މިދިޔަ ކުއާޓަރުގައި ލިބުނު އާމްދަނީ އިތުރުވުމަށް މެދުވެރިވި އެންމެ ބޮޑު ސަބަބަކީ ތެލުގެ އަގު ބޮޑު ވުމާއި، އެ ކުންފުނިން ވިއްކި ތެލުގެ މިންވަރު އިތުރުވުމެވެ. ނަމަވެސް، ދުނިޔޭގެ ބާޒާރުގައި ތެލުގެ އަގު މައްޗަށް ދިޔަ ނިސްބަތާ އަޅާބަލާއިރު އަގުބޮޑު ކުރަމުން ނުދާ ކަން އެސްޓީއޯއިން ފާހަގަކުރެއެވެ.
އެ ކުންފުނީގެ ބޯޑުން މިދިޔަ ކުއާޓަރުގެ ތެރޭގައި ވަނީ ސަބްސިޑަރީ ކުންފުނި، އެމްއެސްއެސްއަށް އާ ބޯޓެއް ގަތުމަށް ފާސްކޮށްފައެވެ. މީގެ އިތުރުން ޕީޕަލްސް ޗޮއިސް ފިހާރައިން އަމިއްލަ ވިޔަފާރިތަކަށް ފުރުސަތުދީ، ބޮޑެތި ބަދަލުތަކާއެކު އަލުން ހުޅުވާފައިވެއެވެ.
އެސްޓީއޯ އަކީ ދިވެހި ސަރުކާރުގެ 82 އިންސައްތަ ހިއްސާއާއި، އާންމު ހިއްސާދާރުންގެ 18 އިންސައްތަ ހިއްސާ ހިމެނޭ ކުންފުންޏެކެވެ.