18 Jul 2022, 21:29
ނޫސްވެރިން މައުލޫމާތު ހޯދާ މަސްދަރު ހާމަކުރަން މަޖުބޫރުވާ ގޮތަށް އޮތް ހެއްކާބެހޭ ބިލު ރައީސް އިބްރާހީމް މުޙައްމަދު ޞާލިޙު މިއަދު ތަސްދީގު ކުރެއްވުމާ ގުޅިގެން، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)އިން އެކަން ކުށްވެރިކޮށްފިއެވެ.
އެކަމާ ގުޅިގެން "ސަން"އާ ވާހަކަ ދައްކަވަމުން އެމްޖޭއޭގެ ރައީސް އަލީ ރިފްޝާން ވިދާޅުވީ ގިނަ ނޫސްވެރިންތަކެއް ގިނަ ކަންބޮޑުވުންތަކެއް ފާޅުކޮށްފައި ވަނިކޮށް ރައީސް އެ ބިލު ތަސްދީގު ކުރެއްވުމުން އެކަން ކުށްވެރިކުރާކަމަށެވެ.
"މި ސަރުކާރުން އަދި ރައީސް ވެސް ވަރަށް ގިނައިން ވިދާޅުވޭ މި ސަރުކާރުން ނޫސްވެރިންނަށް ފުރިހަމަ މިނިވަންކަން ދޭނެކަމަށް، ނަމަވެސް މި ބިލުގެ ސަބަބުން އެ މިނިވަންކަން އެ ގެއްލެނީ އިނގޭތޯ އަޅުގަނޑުމެނަށް،" އޭނާ ވިދާޅުވިއެވެ.
އޭނާ ވިދާޅުވީ ނޫސްވެރިން ތިބީ މަސްދަރު ހިމާޔަތްކޮށްދޭން ކަމަށެވެ. އަދި މި ބިލާ ދެކޮޅަށް ހިންގާ ކެމްޕޭން އަދި ނިންމާ ނުލާކަމަށާއި މަސްދަރު ހިމާޔަތްކުރާނެކަމަށް އޭނާ ވިދާޅުވިއެވެ.
"މި ކެމްޕެއިންގެ ދަށުން ކުރިއަށްދެން އޮތީ ނޫސްވެރިންގެ އިގުރާރެއް. އެ އިގުރާރުގަ ހިމަނާނީ ނޫސްވެރިންގެ ހިޔާލާ އެއްގޮތައް ނޫސްވެރިން ފާހަގަކުރާނެ ކަންކަން،" އޭނާ ވިދާޅުވިއެވެ.
އެކަމާ ގުޅިގެން އެމްޖޭއޭ އިން ނެރުނު ބަޔާނެއްގައި ވަނީ އެ ޖަމިއްޔާއިން ދެކެނީ މިއީ ނޫސްވެރިންގެ ހައްގަށް ހުރަސްއަޅާ އެ ހައްގުތައް ހަނިކުރުމަށް ހިންގި އަމަލެއްގޮތުގައި ކަމަށެވެ.
"އަދި މިކަމުން އެނގިގެން ދަނީ މީޑިއާގެ މިނިވަންކަން ކަށަވަރުކޮށް ދިނުމަށް ދައިލަތުގެ އިދާރާތަކުގެ ހެޔޮ ނިޔަތް ނެތްކަމެވެ،" އެ ބަޔާނުގައިވެއެވެ.
ނޫސްވެރިން މައުލޫމާތު ހޯދާ މަސްދަރު ހާމަކުރަން މަޖުބޫރުވާ ގޮތަށް އޮތް ހެއްކާބެހޭ ބިލު ތަސްދީގު ނުކުރުމަށް ގިނަ ބަޔަކު އައީ ގޮވާލަމުންނެވެ.
އެކަމާ ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ މިވަގުތަށް އޮތް ގޮތަކީ މިހާރު އޮތްގޮތަށް ހެއްކާބެހޭ ބިލް ފާސްކުރުންކަމަށެވެ.
ނަމަވެސް އެ ބިލަށް ފަހުން އިސްލާހު ގެނެވިދާނެކަމަށް އޭނާ ވިދާޅުވިއެވެ.