31 Aug 2022, 12:00
ރާއްޖޭގައި އުފެދުނު އެންމެ މަޝްހޫރު އެއް ރެޕް ލަވަކިޔުންތެރިޔާ, އިސްމާއިލް އިފްހާމް މުޙައްމަދު (ޕެސްޓު)ގެ ޖީބުން މަސްތުވާތަކެތީގެ އިތުރުން 24,000 ރުފިޔާ ފެނުނު ކަމަށް އޭނާއާ ދެކޮޅަށް ކްރިމިނަލް ކޯޓުގައި ހެކިބަސް ދިން ފުލުހަކު ބުނެފިއެވެ.
މަސްތުވާތަކެއްޗާ ދެކޮޅަށް ފުލުހުން ހިންގި އޮޕަރޭޝަނެއްގައި މިދިޔަ އަހަރުގެ ފެބްރުއަރީ މަހުގެ 13 ވަނަ ދުވަހު އަތުލައިގަތް ޕެސްޓްގެ މައްޗަށް ވަނީ ބޮޑު ހުކުމްތަކެއް އަތުވެދޭނެ ހަތަރު ދައުވާއެއް އުފުލާފައެވެ.
އެއީ ކެނަބިސް ޓްރެފިކް ކުރުމުގެ ދަޢުވާ އާއި ޑައިމޯފިން ޓްރެފިކް ކުރުމުގެ ދަޢުވާގެ އިތުރުން ކެނަބިސް ބޭނުން ކުރުމުގެ ދަޢުވާ އާއި ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދަޢުވާ އާއި މަސްތުވާތަކެތީގެ ގާނޫނުގެ ޖަދުވަލު އެކެއްގައިވާ މަސްތުވާއެއްޗެއް ޓްރެފިކް ކުރުމުގެ ކުށުގެ ދަޢުވާއެވެ.
އެ ހުރިހާ ދައުވާތަކަކަށް ވެސް ޕެސްޓް އިންކާރު ކުރުމުން ދައުލަތުން ވަނީ އޭނާއާ ދެކޮޅަށް ގިނަ އަދަދެއްގެ ހެކި ހުށަހަޅާފައެވެ. އެގޮތުން މިއަދު ވަނީ ޕެސްޓް ހައްޔަރުކުރި އޮޕަރޭޝަނުގައި ހަރަކާތްތެރިވި ތިން ފުލުހެއްގެ ހެކިބަސް ނަގާފައެވެ.
ޕެސްޓާ ދެކޮޅަށް މިއަދު ހެކިބަސް ދިން ފުލުހަކު ބުނީ, އޭނާގެ ހަށިގަނޑު ބަލާ ފާސްކުރިއިރު ޖީބުން ނެގި ސިނގިރޭޓް ފޮއްޓެއް ތެރޭގައި މަސްތުވާތަކެތިކަމަށް ޝައްކު ކުރެވޭ އެއްޗެހި ހުރި ކަމަށެވެ. އަދި އެއީ އޭނާ ބޭނުން ކުރަން ހުރި އެއްޗެހި ކަމަށް ބުނެފައިވާ ކަމަށް ވެސް ފުލުސް މީހާ ވަނީ ބުނެފައެވެ.
މަސްތުވާތަކެތީގެ އިތުރުން ޕެސްޓްގެ ޖީބުގައި އޮތް ވޮލެޓުން 24,000 ރުފިޔާ ފެނުނު ކަމަށް ވެސް އެ ފުލުސް މީހާ ވަނީ ބުނެފައެވެ.
މަގުމަތިން ޕެސްޓު އަތުލައިގެން އޭނާ ދިރިއުޅުނު މއ. ވީވާގޭގެ ފުރަތަމަ ފްލޯއަށް ގެންދިޔައެވެ. އެ އެ ޕާޓްމެނެންޓަކީ ޕެސްޓް ދިރިއުޅޭ ތަންކަމަށް ފުލުހަކު ވަނީ ބުނެފައެވެ. ޕެސްޓްގެ ޖީބުގައި އޮތް ތަޅުދަނޑިއަކުން އެތަން ހުޅުވި ކަމަށް ވެސް ފުލުސް މީހާ ވަނީ ބުނެފައެވެ.
ޕެސްޓް ގޮވައިގެން ފުލުހުން އެ ގެއަށް ގޮސް ވަތްއިރު އެތަނުގައި ތިން އަންހެނުންގެ އިތުރުން އެ މައްސަލައިގައި ދައުވާ އުފުލާފައިވާ މުހައްމަދު ސުއައިދު ހުރި ކަމަށް ފުލުހަކު ވަނީ ބުނެފައެވެ.
ފުލުހުން ވަނީ އެ ގެއިން ވެސް މަސްތުވާތަކެއްޗާއި ފައިސާ ހޯދާފައެވެ.
ރެޕް އާޓިސްޓެއްގެ ގޮތުގައި މަގުބޫލުކަން ހޯދާފައިވާ ޕެސްޓުގެ މައްޗަށް އުފުލާފައިވާ ދަޢުވާތައް ސާބިތުވެއްޖެ ނަމަ އުމުރު ދުވަހުގެ ހުކުމެއް އޭނާގެ މަައްޗަށް އަތުވެދާނެއެވެ.
"ރީތި ކުދިން"ގެ ނަމުގައި ނެރުނު ރެޕް ލަވައަކުން 2011 ވަނަ މަޝްހޫރުކަން ހޯދި ޕެސްޓަކީ މިހާރު މަގުބޫލު މިއުޒިކް ލޭބަލް، ސިމްބޮލިކް ރެކޯޑްސްގެ އެންމެ މުހިންމު އެއް ފަންނާނެވެ.
މި ފަހުން ބޭސްފަރުވާއަށް ކަމަށް ބުނެ ކްރިމިނަލް ކޯޓުން ޕެސްޓް ގޭބަންދަށް ބަދަލުކުރިއެވެ. ނަމަވެސް ފަހުން ހައި ކޯޓުން ވަނީ ބޭސްފަރުވާއަށް ގޭ ބަންދަށް ދޫކޮށްލުމަށް ކްރިމިނަލް ކޯޓުން ކުރި އަމުރު ބާތިލްކޮށް ޝަރީއަތް ނިމެންދެން ބަންދުކުރުމަށް އަމުރު ކޮށްފައެވެ.